Read njo MARK 2 Bible Online

MARK 2 - njo bible

MARK 2

¹Anogo ishika lir külen kodang pa Kapernaumi tanaben aru, pa kidang lir ta angazük.

²Nisung jenti sentep nungji joko parnok masem, oda kishizüng tonga mesemi nungten, aser parnok dang pai sayutsüngia liasü.

³Idangji togimra agi shiranger ka, nisung pezüi apur pa dangi anir aru.

⁴Telok aliba agi parnoki Yisu anasai marutet; anungji parnoki pa alidak teindang kilemji rakpok aser aji lupoker togimra agi shirangba nisung ontaka aliba yiptenji ajungzüka ludaktsü.

⁵Yisui kodang parnok tamangji angu togimra agi shirangba dang pai ashi, “Tebu ne menen tokogo.”

⁶Saka idakji tezülurtem kar mena liasü aser parnoki pei mulung nung shisadang,

⁷“Kechiba iba nisung yagi yamai jembir? Pai Tsüngrem atalaa jembir. Tsüngrem dak alema shibai temenen atoktsü akok?”

⁸Idangji parnoki parnok mulung nung yamaji shisadanger ta Yisui pei mulung nung meteta, parnok dang ashi, “Nenoki kechiba itemi nenok mulungjang nung shisadanger?

⁹Togimra agi shirangba dang, ‘Ne menen tokogo’, ta ashitsü temelaba asü, mesüra ‘Noktakang, aser ne yipten benang aser jaja-ang’ ta ashitsü temelaba?”

¹⁰Saka Nisung Chir dak temenen atoktsü tashi-ain lir ta nenoki metettsü asoshi, pai togimra agi shirangba dang ashi,

¹¹“Ni ne dang ashir, shishiang, aser yipten bener ner kidangi oang.”

¹²Pai shishi, aser idangyongji pa yipten bena aru aser parnok jakdang nungi oadok, anungji parnok ajak süngmang aser Tsüngrem sentsüwangshia ashi, “Onoki kodanga yamai munguka.”

¹³Pai tanaben tzüyimküm tsütsü leni ao; aser telok ajak pa dangi senten, anungji pai parnok dang sayumeso.

¹⁴Aser pai süia aodang, Alfa chir Levi alimelen sarudak mena pai angu, aser pai pa dang ashi, “Kü sülen anitakang.” Pai arameso aser pa sülen anitak.

¹⁵Kodang Yisu Levier kidang chiyungdak mena liasü, aser idakji alimelen sarurtem aser temenenpur aika Yisu aser pa nütsüngtem den külemi mena liasü; aser parnoki pa sülen anitak.

¹⁶Kodang pa temenenpurtem aser alimelen sarurtem den chiyunga parnoki angu, Farisi rongnung tezülurtemi pa nütsüngtem dang ashi, “Pai Kechiba alimelen sarurtem aser temenenpurtem den chiyunger?”

¹⁷Yisui ya angashia parnok dang ashi, “Anema alirtem asoshi mozü shiteter tenüngdaktsü maka, saka shirangertem asoshi tenüngdaktsü. Temeshipurtem masü, saka temenenpurtem ajatsü ni aru.”

¹⁸Yohan nütsüngtem aser Farisitemi lumia liasü, aser nisungtemi arua pa dang ashi, “Kechiba Yohan nütsüngtem aser Farisitemi lumir, saka ne nütsüngtemi melumir”

¹⁹Yisui parnok dang ashi, “Kiyimsang parnok den ali tashi kiyimba tembartemi lumitsü asü? Kiyimsang parnok den ali tashi parnok lumitsü makok.

²⁰Saka anogotem arutsü, kodang kiyimsang parnok nungi anir aotsü, idangji iba anogo nungji parnoki lumitsü.

²¹Shingaia sü tejen nung sü tasen mateploker; pai yamaji inyakra, tateplokba tasen jagi tejenbajia shizüka tapok tulu padaktsür.

²²Shingaia yi tasen shiküp juli tejen nung meshioker; pai yamaji inyakra, yi jagi shiküp juliji pokmatsü, aser yi o shiküp juli anaprongla samatsü; saka yi tasen shiküp juli tasen nung shioktsüla.”

²³ Amungnü ka pai alu ajanga süidang, tuodak nung pa nütsüngtemi tsükjong mitmeso.

²⁴Idangji Farisitemi ashi, “Ajiang, kechi amungnü inyaktsü tim masü aji kechiba parnoki inyaker?”

²⁵ Aser pai parnok dang ashi, “Dawid aser pa den alirtem nüngdaka alidang aser ayadang, pai kechi inyak aji nenoki kodanga mezüngdangka ma?

²⁶ Pai koda Abiathar putir alidang Tsüngrem kidangi ai, aser Tsüngrem madang ayuba amtsük, koba putir dak alaka tangari achitsü tim masü, aji achi aser pa den alirtem nema agütsü?”

²⁷Pai parnok dang ashi, “Meimchir asoshi Amungnü yanglu, saka Amungnü asoshi meimchir meyanglu;

²⁸aji asünung Nisung Chir Amungnü Kibuba lir.”