Read njo MARK 3 Bible Online

MARK 3 - njo bible

MARK 3

¹Pai tanaben sinagogi ait, aser idakji teka ashirepba nisung ka liasü.

²Pai pa amungnü anebtsüdisü, manebtsülir ta pa aitsütsü asoshi parnoki mita ata.

³Pai teka ashirepba nisung dangji ashi, “Yagi arua noktakang.”

⁴Pai parnok dang ashi, “Amungnü tajung inyaktsü tim asü, tamajung inyaktsü tim; taküm kümzüktsü asü, mesüra tepsettsü?” Saka parnoki mokorai ali.

⁵Parnok temulung merangbaji ngua pai mit adoka parnok meketa ajia nisungba dangji ashi, “Ne teka songtokang.” Pai aji songtok, aser pa teka akhi ama kümadok.

⁶Farisitem kimai adok aser idangyongji parnoki pa kodaser samatsütsü, pa anema Herod telok den tasa asa.

⁷Yisui pei nütsüngtem den tzüyim leni meyip, aser Galil nungi telok ka anitak; aser Yihuda lima nungi,

⁸aser Yirusalem nungi Idumea aser Yordan külen nungi, Tair aser Sidon temeket linük nungi telok tulu kati pai inyakba angashia pa dangi aru.

⁹ Anungji telok jagi pa dak menungshidaktsütsü asoshi pai pei nütsüng dang rong tila ka renema atang ta ashi;

¹⁰kechiaser pai nisung aika anebtsü, aser shiranger ajaki pa dak kongshitsü asoshi nungtepa aru.

¹¹Kodangsa temenen tanelatemi pa angu, parnoki pa tsüngdang apudaker aser ayimtena ashi, “Na Tsüngrem Chirji lir;”

¹²saka pa indang odia mesangtongtsüla ta pai parnok ajang ajanga nungtem.

¹³Pai tenemi atu aser pai mulungba ama itemji aja; aser parnoki pa dangi aru.

¹⁴Pai terana shimtet, shir dang tenyartem ta ajar, anungji parnoki pa den alitsü, sayutsüngi yoktsü,

¹⁵aser temenen tanelatem aridoktsü tashi-ain parnok nem agütsü:

¹⁶Item teranaji pai shimtet; aser pai Simon dang Peter ta aja,

¹⁷Zebedi chir Yakob aser tenu Yohan (pai parnok dang Boanarges, tetezü Tsüngmok chirtem, ta aja),

¹⁸Andria, Filip Bartholoma, Mathi, Toma, Alfa chir Yakob, Thadia, Kanan nunger Simon,

¹⁹aser Yihuda Iskariot, shibai pa bendanga agütsü.

²⁰Pai ki kati atu; aser telokji tanaben senten, anungji parnoki techiyunga mechiyungtet.

²¹Pa den külemi alirtemi aji angashidang pa sottsü tugu, kechiyong parnoki ashi, “Pa yia matar.”

²² Yirusalem nungi aluba tezülurtemi ashi, “Pa dak Belzebul lir, aser temenen tanelatem tongtiba tashi agi pai temenen tanelatem aridoker.”

²³Pai parnok pa dangi aja, aser o-entepbatem agi parnok den pai jembi: “Satani kodaser Satan aridoktet?

²⁴Yimli ka pei sasa lemsara, iba yimliji melitet.

²⁵Kibong kati pei sasa lemsara, iba kibongji noktaka melitet.

²⁶Aser Satani pei sasa anema apusor lemsara, pai noktaka melitet, saka tatem tongogo.

²⁷Tashi tait nisungji tamasa alena meyura, shiangaia tashitait kidang jagi ia, par oset-tsüset rakzükraktemtsü makok.

²⁸Atangji ni nenok dang ashir, temenen ajak aser tatalaba kechi agisa ataladir nisung chirtem dang atoktsü.

²⁹ Saka shibaisa Tanela Temeshi anema ataladir putusa putu tatok maka; joko tatem makaba temenen menar”

³⁰kechiaser parnoki ashi, “Pa dak temenen tanela lir.”

³¹Pa tetsü aser tenu nungertem aru, aser kima noktaker pa tajai yok.

³²Telok ka pa meketa mena liasü aser parnoki pa dang ashi, “Ajiangjo, netsü aser nenu nungeri kima na bushidagi.”

³³Pai parnok dang langzü, “Kütsü aser künu nungertem shir?”

³⁴Aser pa meketa amenertem dak repranga pai ashi, “Kütsü aser künu nungertem ajiang.

³⁵Shiri Tsüngrem mulungba inyaker, paji kü adianu, aser ai-anu, aser kütsü lir.”