Read njo MARK 4 Bible Online

MARK 4 - njo bible

MARK 4

¹Pai tanaben tzüküm nung sayutsü tenzük, aser telok kanga tulu ka pa dangi sentep, anungji pa rong kati ai aser tzüyim manung iba rong nungji amen, aser telok ajak tzüyim tsütsü ali nungji liasü.

²O-entepba agi o tapu aika agi pai parnok dang sayu aser pa tesayuba nungji pai parnok dang ashi,

³Metsü proker ka metsü proki ao.

⁴Pai prokyonga aodang, metsü kar Lenmang tezü nung tsük, aser ozütem arua aji chimadok.

⁵Kar ali kanga malidak lungya nung tsük, aser idangji mokua mei, aser ali aroka mali nung,

⁶kodang anü adok aji rongloka apu, aser iba dakji tera malinung arorepadok.

⁷Kar ai rongnung tsük aser aitemji ina aji moksep, aser yangji tejang matang.

⁸Aser metsü kar ali tajung nung tsük aser aji mei, ain aser tejang tangtsü, oda semerbena, rokerbena, aser noklangbena tejang atang.”

⁹Aser pai ashi, “Shiba dak tangashitsü tenarong aten pai angang.”

¹⁰Kodang pa kija liasü, nütsüng terana aser pa meketa alirtemi o-entepba indangji pa dang asüngdang.

¹¹Yisui parnok dang ashi, “Tsüngrem Yimli miim o nenok nem agüja lir, saka tezülen alirtem asoshi o-entepbatem agi jembir;

¹² anungji; ‘Atangji parnoki tangubo angutsü saka majitettsü, atangji tangashibo angashitsü saka mangatettsü, ashiko parnoki tanaben meyiptsü aser parnok dang atoktsü.’ ”

¹³Pai parnok dang ashi, “Nenoki iba o-entepbaji mangateter no? Sürabang nenoki kodaser o-entepba ajakji angatettsü?

¹⁴Metsü proker jagi Osangtajungji proker,

¹⁵lenmang tezülen kechi nung metsüji prok, itemji ya, parnoki angashir idangyongjisa satan arur aser parnok dak kechi osangtajung prok aji bener aor.

¹⁶Lungya nung metsü prokbaji itemi, shiri osangji angashir idangyongjisa pelaseta agizüker,

¹⁷saka pei dak tera mali nung mapang tatsüka dang alir; aser kodang osang asoshi timtem tekangshi arudir idangyongji parnok metsüdaker.

¹⁸Ayi rongnung prokba karji ya, parnoki osangji angashir,

¹⁹saka alima indang shisa buluba, rongsen penbuba aser tanga osettem azüabungba aita osangji mokseper ibala dakji tejang matanger.

²⁰Aser ali tajung nung prokbaji itemi, shiri osangji angashir, aji agizüker aser semerbena, rokerbena aser noklangbena tejang atanger.”

²¹Yisui parnok dang ashi, “Milen pei atalokba dong nung meyui molok telung nung, mesüra yipten kübok nung, ayutsü bena aru asü?

²² Kechiaser jungkai madoktsü kecha memiimtet, mesüra sangwadaki arutsüba dak alaka kecha miima maka.

²³Nisung kar dak tangashitsü tenarong tena lira, pai angang.”

²⁴Pai parnok dang ashi, “Nenoki kechi angar, temulung agüjang. Kechi touzük agi nenoki ozüktsüdir, aji nenok nem ozüktsütsü, aser aji oda nenok nem talia enoktsütsü.

²⁵ Kechiaser shiba aka pa nem talia agütsütsü; aser shiba maka pa kechi aka ajia pa nungi bener aotsü.”

²⁶Pai parnok dang ashi, “Tsüngrem Yimliji oda nisung kati ali nung metsüjang prokba amai lir;

²⁷Pai aonung mejanger aser anüngdang saaka alir, aser metsüjangji mokua ainer, sakasa aji kodaser ainer pai aji memeteter.

²⁸ Ali-i pei sasa tejang tangtsür; tamasa to, ajiser tsükjong, aser tatemsa tsükjong tamen.

²⁹Saka kodang tsükji mendir, idangji pai ninok yoker, kechiaser aluruwa tonga aruogo.”

³⁰Pai ashi, “Asenoki Tsüngrem Yimliji kechi mesüker ta shitet? Ya kechi tatishitsü agi ratettsütsü?

³¹Ya jibijang ka mesüker, koba ali nung prokdang, alima nung metsüjang ajak dang tilatiba lir;

³²saka ya kodang proka aser mokua meidir, tzünüsenbongtsü ajak dang tuluba akümer, aser kongsang tulu asanger, anungji anüng ozütem arua iba akhümbok nung alitsü akoker.”

³³Yamala o-entepba jenti agi, parnoki angatettsü akokba tashi pai parnok dang jembi.

³⁴Aser o-entepba kata medenibo pai parnok den mejembi; saka kibok nung pai pei nütsüngtem dang kechisarena ajak rateta sayu.

³⁵Panüji nikongtsütsü akümdang, pai parnok dang ashi, “Asenoki tzü külen jagi odi.”

³⁶Telokji toktsür, pa rong nung koma liasü, yamaji parnoki pa parnok den anir ao. Aser ano tanga rongtema pa den liasü.

³⁷Aser yipru mopung tulu ka adok aser tzüsem jagi rong nung muoka ait, anungji joko rongji süngya liasü.

³⁸Saka pabo ronglanglen pakti manung metaloker mejanga liasü. Parnoki pa meso aser ashi, “Tesayur, asenok samatsü nai mapayur no?”

³⁹Pai shishi aser yipru mopungji arütsü aser tzüyim dang ashi, “Marakzüi süngjema liang.” Yipru mopungji anen aser tesüngjem tulu liasü.

⁴⁰Aser pai parnok dang ashi, “Kechiba nenoki tsübur, nenoki ano tamang makar no?”

⁴¹Aser parnok kanga tsübu aser parnok o parnok na jembitepa ashi, “Ajangla yipru mopung o tzüsemia tashi angatsüba ya shiba?”