Read njo MARK 5 Bible Online

MARK 5 - njo bible

MARK 5

¹Parnoki tzüyim külen Gerasin linüki aru.

²Pa kodang rong nungi adok, temenen tanela aliba nisung ka leprungki nungi adoka pa den ajurutep.

³Iba nisung leprungkitem nungji ali, aser shingaia, oda merangsen agia pa malentet,

⁴kechiyong pa aiben yin tsüngden o merang agi alenaka, pai merangsen toksa aser yin tsüngden akosa, aser pa azüoktsü shinga daka tashi maliasü.

⁵Teti, mangli sangwali, pai leprungkitem aser tenemtem nung asatena aser pei sasa lung agi ranga liasü.

⁶Oji nungi Yisu ngua, pai asema arua pa madang apudak,

⁷aser ola tulu agi ayimtena ashi, “Yisu, Na Tematiba Tsüngrem Chir, Na kü den kechi teinyaktsü aka? Ni tekangshi ta ni ne dang Tsüngrem tenüng nung mepishir.”

⁸Kechiyong pai pa dang ashi, “temenen tanela, nisungba dak nungjagi adokang,”

⁹Pai pa dang asüngdang, “Ne tenüng shiba?” Pai pa dang langzü, “Kü tenüng Legion[1] kechiaser onok aika lir.”

¹⁰Aser parnok iba linük nungi taridok ta pai pa dang mepishi.

¹¹Idakji tenem tezülen ak lokti tulu ka chiyima liasü;

¹²aser parnoki pa dang mepishi, “Onok ak lokti dangi yokang, aser onok parnok daki idakjangma.”

¹³Anungji pai parnok odaktsü. Aser temenen tanelatem adok, aser aktem daki ai; aser ak loktiji meyi ana shi liasü, parnok lungbangi asemjena tzüyimi alu, aser parnok tzüyim nungji arakset.

¹⁴Idangji ak pokyimertem ajen aser yimti o yimtsüng aika nung osangji sangoktsü. Aser kechi atalok aji reprangtsü nisungtem aru.

¹⁵Parnoki Yisu dangi aru aser shiba dak temenen tanela jenti liasü paji sü abener, nüji mulungjang tener mena aliba parnoki angu; aser parnok tsübua aküm.

¹⁶Temenen tanela aketba nisung dak aser aktem dak kechi atalok aji angurtemi parnok dang ashi.

¹⁷Aser parnoki Yisu parnok lima temeket nungi aotsü mepishi.

¹⁸Pa rongi ia alidang, temenen tanelatem keta alisang jagi pa den aotsü mepishi.

¹⁹Saka pai pa dang memela, saka pai pa dang ashi, “Ner kinungertem dangi kidangi oang, aser Kibubai na asoshi kechi mapa inyakogo aser ne dang aochiogo, iba indang parnok dang shiang.”

²⁰Aser pai aenshia ao aser Yisui pa asoshi kechi inyak, aji Dekapoli nung sangoktsütsü tenzük; aser nisung ajaki süngmang.

²¹Kodang Yisui tanaben tzüküm külen jagi rong nung ao, telok tulu külemi sentep; aser pa tzüyim anasa liasü.

²²Idangji sinagog madak yimsüsür rongnung ka, tenüng agi Jaira aru, aser pa ngua, pa tsüngdang apudak,

²³aser pa dang kanga mepishia ashi, “Kü jala tasür dang lir; la junga kümer taküm alitsüsa, na arua teka agi nemetang.”

²⁴Aser pai pa den ao. Telok jenti pa sülen anitak aser parnoki pa nungbang.

²⁵Idakji tetsür ka azü aoba tashitak agi küm terana tashi timtem lia arunung,

²⁶mozü shiteter jenti nungi tekangshi jenti ngua la akaba ajak lalu. Lai kecha majangzük, saka tamajungba dang aküm.

²⁷Yisu indang o angazüka, telok nungji lai tezülen nungi arua, pa süoshi nungji kongshi;

²⁸Kechiyong lai bilem; “Ni pa süoshi nung danga kongshira, ni ajungtsü.”

²⁹Idangyongjisa la azü aoba anenadok, aser tashitak nungi la anebogo ta lai pei mang nung metet.

³⁰Idangji Yisui pa dak nungi ain tuguogo ta pei sasa meteta telok rongnung meyipa ashi, “Shibai kü süoshi nung kongshi?”

³¹Pa nütsüngtemi pa dang ashi, “Telokti-i na nungbanga aruba nai angur nung ano nai ashir, ‘Shibai kü dak kongshi?’ ”

³²Shibai ya inyak aji metettsü pai meketa reprang.

³³Saka tetsürlaji tsübuseta aser atentena, la dak kechi atalok, aji meteta lai aru aser pa tsüngdang apudak, aser pa dang ajak shitak ashi.

³⁴Pai la dang ashi, “Tenü, ne tamang agi na junga kümogo, tesünep nung oang, aser ne tashitak nungi junga liang.”

³⁵Pai jembia alidang, sinagog yimsüsür nungi kar arua ashi, “Ne jala süogo. Joko nai Tesayur timtetemdaktsü.”

³⁶Saka parnoki ashiba oji Yisui mangashi aser sinagog nung yimsüsürsang dangji ashi, “Tetsübu, tamang dang amangang.”

³⁷Pai Peter, Yakob, aser Yakob tenu Yohan dak alema nisung shinga pa sülen anidaktsü memela.

³⁸Kodang sinagog nung yimsüsür kidangi parnok aru, rongrongshishi aser mangyimba pai angu.

³⁹Pa aita parnok dang ashi, “Kechiba nenoki asateper aser ajeber? Tanurji masü, saka mejanger dang.”

⁴⁰Parnoki pa menütsü. Saka pai parnok ajak meindoker, tanur tebu tetsü aser pa den alibatem anir tanur alidaki ai.

⁴¹Aiür chanu teka nungji amer pai la dang ashi, “Talitha koumi!”[2] tetezü, “Aiür chanu, shishiang.”

⁴²Idangyongji aiürlaji shishi aser jaja, kechiyong la küm terana tain liasü. Idangji parnok kanga süngmanga aküm.

⁴³Ya shinga danga temetetdaktsü ta pai parnok dang kanga sashia ashi; aser la nem langka tachitsü agüjang ta pai parnok dang ashi.