Read njo MARK 6 Bible Online

MARK 6 - njo bible

MARK 6

¹Pa yangnungjagi ao aser pei limai aru; aser pa nütsüngtemi pa sülen anitak.

²Amungnü pai sinagog nung sayutsü tenzük; aser aikati pai sayuba angashia süngmanga ashi, “Nisung yagi item o ya kechi nungi angu? Pa nem agütsüba shisatsüji kechi? Pa ket agi mapa tulutem inyakteter?

³Ya Mari chir, süng mapa inyaksang, aser Yakob, Yose, Yihuda, aser Simon nunger tedito masü no? Aser pa aianutem idaki asenok den melika ma?” Aser parnok pa dak chitaka kümadok.

⁴Yisui parnok dang ashi, “Pei lima, pei adianu rongnung, aser pei kinungertem dak alaka ainkar kaji mesangi malir.”

⁵Pai idakji shirangba nisung ishika dak teka agi nemeta anebtsüba dak alaka tesüngmangtsü ain mapa meinyaktet.

⁶Aser parnoki mamangba ngua pai süngmang. Pai temeket yimtem sema sayutsüngia ao.

⁷Pai teranaji aja, aser anana yoktsü tenzük, aser parnok nem pai temenen tanelatem madak tashi-ain agütsü,

⁸aser parnok lenmang asoshi mechi ka alema, amtsük süshia, yangku süshia, parnok sen juli nung sen süshia, kecha mabentsü ashi;

⁹ano tsüngsem asemtsüla saka süpoksü talila mabentsüla.

¹⁰Pai parnok dang ashi, “Koba kidangisa nenok idir, iba yimti metoktsü tashi nenok yangji liang;

¹¹ aser kechi nungsa nenok magizüklir, mesüra parnoki nenok osang mangalir, parnok anema kuli asütsü asoshi nenok pila-a aodang nenok tetsüng nungi auyi temtokang.”

¹²Parnoki ao aser nisungtem ajak temulung meyiptsü asoshi sayutsüngi,

¹³ aser parnoki temenen tanelatem aika aridoktsü aser shiranger aika dak totzü mezüja anebtsü.

¹⁴ Herod chubai iba indang angashi, kechiyong Yisu nüngsang ajaklen meteta aküm. Kari ashi, “Yohan baptitsüba tasü nungi shia aruogo; anungji item ain pa dak lia mapa inyaker.”

¹⁵Saka tangartemi ashi, “Ibai Elia, aser ano tangari ashi, ainkar rongnung ka ama, ibaia ainkar ka lir.”

¹⁶Saka Herodi iba indang angashia ashi, “Yohan shiba ni tekolak atang, pa shia aruogo.”

¹⁷ Kechiaser Herodi pei sasa nisung yoka Yohan apu, aser pa tenu Filip kinungtsü Herodiala meji nung pai pa tsüngden chiokdak alena ayu; kechiaser pai Herodiala agi.

¹⁸Kechiyong Yohani Herod dang ashi, “Nenu kinungtsü na asoshi agitsü tim masü.”

¹⁹Herodialai pa anema jashi, aser pa tepsetnü. Saka lai makok,

²⁰kechiyong Herodi Yohanji ochi aser temeshi nisung ta meteta, pa tsübu, aser pa kümzüka ayu. Pai Yohan osang angashidang kanga ratamata-a liaka, pai jembibaji anganüa liasü.

²¹Saka kodang mapang tetemsü aru Herodi pa tasoba anogo bilemteta amungdang par tongtipurtem o temeranger telok tanishirtem aser Galil nung tazüngpurtem asoshi benjong ka agütsü.

²²Kodang Herodiala jala ait aser tsüngsang, lai Herod aser pa den chiyungdak amenertem peladaktsü. Idangji chubai aiürla dang ashi, “Nai kechisa aginür, meshiang, ni ne nem agütsütsü.”

²³Pai la dang azüngashi, “Nai kü dang kechisa meshidir, kü yimli tesadang tashia ni agütsütsü.”

²⁴Lai ao aser pei tetsü dang asüngdang, “Ni kechi meshitsü?” Tetsüi ashi, “Yohan baptitsüba kolak.”

²⁵Lai yakta dang chuba dangi meyipa arua ashi, “Yohan baptitsüba kolak su ka nung kü nem tangsa nai agüjang ta ni mepishir.”

²⁶Chubaji kanga dang jashia aküm, saka pai azüngashiba yong, aser chiyungdak amenertem atema, pai la dang ma ta meshitet.

²⁷Idangyongji chubai Yohan kolak bener arutsü temeranger tanüker ka yok. Pai oa tsüngden chiokdak pa tekolak atang,

²⁸aser pa tekolak su ka nung bener arua aiürla nemji agütsü, aser aiürlai aji pei tetsü nem agütsü.

²⁹Kodang Yohan nütsüngtemi iba indang angashi, parnok aru aser pa mang bener oa leper nung ayu.

³⁰Tenyartem Yisu dangi külemi sentep, aser parnoki inyakba aser sayuba ajakji pa dang ashi.

³¹Pai parnok dang ashi, “Tazüngdak tesem kati nenoki arung aser kenpiga anisüngzükang;” kechiaser aika oli aruli ta liasü, aser parnok chiyungtsüa mapang mungutet.

³²Anungji parnok rongnung azüngmeyakdak tesem kati ao.

³³Saka nisungtem shirnoki parnok oya angu, aikati parnok shitet, yimti ajak nungi aritepa tetsüng agi ajiagi asema ao aser parnok jakdang atong.

³⁴ Pa adokdang pai telok tulu ka angu, aser pai parnok asoshi aochia bilem, kechiaser parnok sannüker maliba santem ama liasü; aser pai parnok dang tapu meyina indang sayumeso.

³⁵Kanga menua kümer pa nütsüngtem pa dangi arua ashi, “Ya azüngmeyakdak lir, aser kanga menua kümogo;

³⁶parnok langka tachitsü alitsüsa temeket alutem aser yimtem dangi parnok yokadokang.”

³⁷Saka pai parnok pa dang ashi, “Nenoki parnok nem langka tachitsü agüjangma.” Parnoki pa dang ashi, “Onoki oa amtsük sen noklang ana jenjang alir, parnok nem tachitsü agütsütsü asü?”

³⁸Saka pai parnok dang ashi, “Nenok amtsük kwika aka? Oa reprangdangangma.” Parnoki metetteper ashi, “Amtsük pungu, aser ango ana kar.”

³⁹Aser ai manung telok telok küma menang ta pai parnok nem ozüng agütsü.

⁴⁰Parnok taren taren noklang ka ka aser tenem-tenem amen.

⁴¹Pai amtsük pungu aser ango anaji amer, anünglen repranga moatsü, aser amtsükji sangsa, aser parnok madang ayutsü nütsüngtem nem agütsü; aser ango anaji pai parnok rongnung lemsa.

⁴²Parnok ajaki aji achi aser tip atem.

⁴³Parnoki tanük-tari agi molok terana sünga benden aser ango nungia yamaji liasü.

⁴⁴Aser amtsük achirtemji parnok tebur meyi pungu liasü.

⁴⁵Idangyongji pa nütsüngtem rong kati idaktsü aser pa dang tama tzü külen Bethsaidai odaktsü aser pai telokji senshidakja ata-a ali.

⁴⁶Parnok dang tepila o shir, pai sarasademtsü tenemi atu.

⁴⁷Aser nikongtsütsü akümdang, rongji tzüyim tiyong nung liasü aser Pa ali takong nung kija liasü.

⁴⁸Parnok rongitsü kangshir ta pai angu, kechiaser yipru mopungji parnok anema aon; aser anepdang yakta ano mesangwadang Yisui tzüyim ma nung jaja-a parnok tsütsüi aru, aser pai parnok ajateta süia oya liasü.

⁴⁹Saka parnoki pa tzüyim manung jajabaji ngua, aji temenen tanela ka ta bilem, aser parnoki ayimten,

⁵⁰kechiaser parnok ajaki pa angu aser tsübuadok. Saka indangji pai parnok den jembi aser ashi, “Tasü itang, Niar, tetsübuma.”

⁵¹Aser pai parnok dangi rongjagi ait aser yipru mopungji anenadok, aser parnoki kanga bangkatep,

⁵²kechiaser parnoki amtsük indangbo mangatet, aser parnok mulung merajemi liasü.

⁵³Kodang parnoki tzüyim ajanga oa Gennesaret atong, parnok tzüyimkhüm nung anen.

⁵⁴Kodang parnok rong nungi adok, idang yongjisa nisungtemi pa ajitetadok,

⁵⁵aser iba temeket ajak nungi asemtepa, pa kechi nung liasü ta parnoki angazük, ajagi shiranger nisungtem yipten nung parnoki bener arutsü tenzük.

⁵⁶Aser yimtsüngtem, yimtitem mesüra, alutem, kongisa pa ait parnoki shirangertem shishidak yur, pa sütsüng nung danga kongshitsü pa dang mepishi aser kwikati pa dak kongshi parnok ajak aneb.