Read njo MARK 9 Bible Online

MARK 9 - njo bible

MARK 9

¹Pai parnok dang ashi, “Züngpong ni nenok dang ashir, Tsüngrem Yimli ain nung aruba mangu tashi, yangi noktaka alir rongnung kari tasüba kodaka-ang majurutsü.”

² Anogo troknü lir külen, Yisui Peter, Yakob, aser Yohan tenem talang kati parnok anir atu. Aser parnok madang pa sentsü melenadok.

³Aser pa süoshi alima nung alir shingaia kodanga mesünga meshidokdangba ama kanga mesünga aser sentsüpranga aküm.

⁴Parnok dangi Elija aser Mosa adok; aser parnoki Yisu den jembia liasü.

⁵Aser Peteri Yisu dang ashi, “Tesayur, asenok yangi aliba ya junger. Asenoki semtu asem yangludi. Na asoshi ka, Mosa asoshi ka; aser Elija asoshi ka.”

⁶Kechiyong pai kecha meshitet, kechiaser parnok kanga tsübuseta liasü.

⁷ Parnok sübanga mepet ka aru aser mepet nungjagi ola ka adoka ashi, “Ibai kü meimba Chir, nenoki pa dang angang.”

⁸Aser idangyongji parnoki meketa reprang aser parnok den Yisu dak alaka joko tangar shinga mangu.

⁹Parnok tenem nungi aludang parnoki kechi tenem nung atalokba angu, Nisung Chir tasü nungi shia maru tashi shinga danga teshi ta pai nungtem.

¹⁰Tashibaji dang parnoki mamai ayu; aser sür shia aruba tetezüji kechi ta parnok o parnok na jembitep.

¹¹Parnoki pa dang asüngdang, “Kechiba Elija tama arutsüla ta tezülurtemi ashir?”

¹²Pai parnok dang langzü, “Atangji Elija tama arutsü aser ajak tanaben yanglushitsü; aser Nisung Chir indang ya, pa kanga tuo ashitsü aser mesükshitsü ta kechi koda zülua lir?

¹³Saka ni nenok dang shidi, Elija aruadokogo, aser zülua aliba ama, parnoki pa dang parnok benshinütsü benshi.”

¹⁴Kodang parnoki nütsüngtem dangi aru, telok tulu ka parnok meketa aser tezülurtemi parnok den o toktepba parnoki angu.

¹⁵Idangyongji telok ajaki pa ngua süngmang, aser pa dangi asema oa salem agütsü.

¹⁶Pai parnok dang asüngdang, “Nenoki parnok den kechi asüngdangteper?”

¹⁷Aser telok rongnung kati pa dang langzü, “Tesayur, ni ozü chir shiba dak ola madokdaktsüba tanela ia lir, pa ne dangi anir aru;

¹⁸kodangsa pa yagi timtemdaktsüdir, pa toktena aitdaktsür aser tebang nungi poja adoker, pai tepu shiteper aser togima akümer. Ni ne nütsüngtem dang ya aridokjang ta asüngdang, saka parnoki makok.”

¹⁹Pai parnok dang langzü, “Oh tamang makaba putu, ni nenok den kopiga alitsü? Ni nenok den kopiga aremzüka alitsü? Pa kü dangi anir arung.”

²⁰Parnoki pa Yisu dangi anir aru. Kodang pai Yisu angu, idangyongji tanelai pa kanga ateptena aitdaktsü, aser ali nungji lao aser tebang nungi poja adoka lungzü.

²¹Yisui tebu dang asüngdang, “Pa dak ya adoker mapang kopiga asütsü” Tebui langzü, “Lanuwa nungi,

²²aser aiben iba yagi pa mi o tzü nungsa pa samatsütsü asoshi nungoktsüogo. Saka nai langka inyaktsü kokra, ozü dang aochiang aser yariangma.”

²³Yisui pa dang ashi, “Nai kokra ta!” Shibai amanger pa asoshi ajak takoktsü.

²⁴Idangyongji tanur tebu jagi nüktzü yima ayimtena ashi, “Ni amanger, nai ni mamangba asoshi yariangma.”

²⁵Kodang Yisui telok ka asema aruya angu, pai temenen tanelaji arütsü, aser ashi, “Na suwar aser tenarong tajak tanela, ni ne dang ashir, pa dak nungi adokang aser kodanga pa daki tei.”

²⁶Pai asa aser kanga ateptena aitdaktsür adok, aser tanurji tasü ama aküm, anungji aikati pa süogo ta bilem.

²⁷Saka Yisui pa teka nung amer atsümeso, aser pai noktak.

²⁸Pa kodang ki kati aru pa nütsüngtemi kibok nung pa dang asüngdang, “Kechiba onoki aji maridoktet?”

²⁹Aser pai parnok dang ashi, “Yamalaibo sarasadem dak alema kecha agia maridokteter.”

³⁰Parnok idak nungjagi apuso aser Galil ajanga süi, aser pai aji nisung shinga nema memetetdaktsünü;

³¹kechiyong pai nütsüngtem dang sayua ashi, “Nisung Chir meimchir ket nung bendanga agütsütsü, aser parnoki pa tepsetsü, aser pa kodang tepsetdir, asemnü lir pa shia arutsü.”

³²Saka tashiba oji parnoki mangatet, aser pa dang asüngdangtsü parnoki tsübua liasü.

³³Parnoki Kapernaumi aru. Kodang pa kidang liasü pai parnok dang asüngdang, “Nenoki lenmang nung kechi jembitepba liasü?”

³⁴ Saka parnoki ola madok, kechiyong shiba tulutiba ta parnoki lenmang nungji atitep.

³⁵Pai mener teranaji aja aser pai parnok dang ashi, “Nisung kari tazüngba kümnüra pa ajak dang tilatiba aser ajak tenzüker akümtsüla.”

³⁶Pai tanur ka ajunga arua parnok tiyong nung yutsü, aser pai teka nung tanurji ajunger parnok dang ashi,

³⁷“Kü nüng atema shibai ibala tanur chanu ka agizükdir, pai ni agizüker aser shibai ni agizükdir ni agizüker dang masü, saka shibai ni yok pa agizüker.”

³⁸Yohani pa dang ashi, “Tesayur, nisung kati ne tenüng nung temenen tanelatem aridoktsüba onoki angu, aser onoki pa nemtem, kechiaser pai onok sülen manidak.”

³⁹Saka Yisui ashi, “Pa tenemtem, kechiyong kü tenüng nüng sayatenya inyakeri ano yakta ni majung indang tesülen jembitsü akok.”

⁴⁰ Kechiyong shibai asenok manemer, pa asenok asoshi lir.

⁴¹ Kechiyong nenok Khrista meyong asü nung shibaisa nenok nem tzü marok ka danga jemdaktsüdir, atangji, ni nenok dang ashir, pai pei tajangzük kodaka-ang mesamatsü.

⁴²“Kü dak amangba item tila rongnung ka danga shibai metsüdaktsüdir, pa asoshi temenüngba lungpak tulu ka tekong nung iloker tzüyim nung pungoka asü tajungba süla.

⁴³Ne ket agi na metsüdaktsüra, aji leptokang; teka ana tener aseptsü makokba molumi-i aodangbo, lemtar taküm daki ai na asoshi tajungba.

⁴⁴Kong parnok mesen masür, aser molumi kodanga maseper.

⁴⁵Ne tetsüng agi na metsüdaktsüra, aji leptokang; tetsüng ana tener molumi aodangbo, tetsüng tsüker taküm daki ai na asoshi tajungba.

⁴⁶Kong parnok mesen masür, aser molumi maseper.

⁴⁷ Ne tenük agi na metsüdaktsüra, aji aroktokang, tenük ana tener molumi nung puokdangbo, tenük ka tener Tsüngrem Yimli-i ai na asoshi tajungba.

⁴⁸ Molumi nungji parnok mesen masür, aser molumi kodanga maseper.

⁴⁹Kechiyong tarongba tenla metsü agi merüktettsüba ama nisung shia mi agi merüktettsü.

⁵⁰ Metsü junger; saka metsü dak tanangji samadokra, nenoki aji kechi agi nangdaktsütsü? Nenok dak metsü lidakjang aser nenok o nenok na putepa liang.”