Read njo LUK 1 Bible Online

LUK 1 - njo bible

LUK 1

¹Tamarener Theofil; onok rongnung tatalokbatem koba indang tetenzük nung shiri tenük agi itemji angu aser aji tenzükertem liasü,

²onok nem osang koma agütsü, yamaji nisung aikati, item bendentsü meranga liasü.

³Aser iba indang tetenzük nungi ajak shitak ta ni bushiteta liasü.

⁴Na kechi nung sayua ali idakji ochibaji nai metettsü asoshi nia ne dangi tatongi zülutsü junger ta bilem.

⁵Yihuda[1] nunger chuba Herod mapang nung, Abia putir-ren shilem nungi putir ka tenüng agi Zakaria, aser pa kinungtsü Aron semchir ka tenüng agi Elizabet liasü.

⁶Tenaprongla Tsüngrem tsüngdang temeshi liasü; Kibubar ozüngtem aser temelabatem amshia tai maket liasü.

⁷Saka parnok tanur maliasü; kechiaser Elizabet tapung, aser tenaprongla arishi talangka süir liasü.

⁸Pai pei tataren nung Tsüngrem madang tekülemba mapa inyakdang putir mapa yimsü amato,

⁹Kibuba temeshidaki tua liangmesen arongtsü an toktangba pa dak kao.

¹⁰Liangmesen arongba mapang telok ajongai kima sarasadema liasü.

¹¹Idangji liangmesen arongba tenladak tajichilen Kibuba tenyar ka pa madangi adoka noktak.

¹²Kodang Zakariai paji angu, pa aoksa, aser tetsübu agi asüng,

¹³saka tenyar jagi pa dang ashi, “Tetsübuma Zakaria, kechiyong nai sarasademba angashiogo aser nebutsü Elizabeti ne nem jabaso ka sotsütsü aser nai pa tenüng Yohan ta ajatsü.

¹⁴Aser nai tepela angutsü aser ne mulung achitsü aser pa asoba nungji jentipur pelatsü.

¹⁵Kechiyong Kibuba tsüngdang pa tulu akümtsü. Aser pai yi mesüra mejemtzü majemtsü, saka pa tetsü nu menden nungi Tanela Temeshi agi sünga alitsü.

¹⁶Aser pai Israel nunger aika Kibuba parnok Tsüngrem dangi meyipdaktsütsü.

¹⁷ Tebutem temulung techirtem dangi meyipdaktsütsü aser tashi mangabapur temeshipur shisatsü dangi meyipdaktsütsü asoshi, asen Kibuba asoshi renema alibapur renemtsütsü asoshi pa jakdang Elija tanela aser ain nung pai aotsü.”

¹⁸Zakariai tenyar dangji ashi, “Kechi koda ni aji metettsü? Kechiyong ni tambur kümogo aser yamaji kü kinungtsüa tantsür kümogo.”

¹⁹Tenyar jagi pa dang langzü, “Tsüngrem tsüngdang noktakba Gabrielji ni lir, aser ne den jembitsü aser iba osang tajung bener arutsütsü ni yoka lir, aser pa nüng temeshi lir.

²⁰Ajiang, item ataloktsüba anogoji maru tashi na ola makai aser o mejembiteti alitsü. Kechiaser kü o koba mapang shitak nung ataloktsü aka aji nai mamang.”

²¹Nisungtemji Zakaria ata-a liasü pa papigaji tenla ki nung aliba asoshi parnok süngmanga liasü.

²²Kodang pa kimai adok, pai parnok den mejembitet aser pai mangdang ka nguogo ta parnoki metet. Pai parnok dang temaitsü agi tuyu aser pai o mejembiteti liasü.

²³Pai tataren tenzükbaji kodang atem, pai pei kidangi aru.

²⁴Item anogoji süir pa kinungtsü Elizabet mashisa aküm, aser ita pungu tashi lai pei sasa miimshia ashi,

²⁵“Nisung rongnungi kü maksü endoktsü asoshi Kibubai kü dang taochi agi inyakogo!”

²⁶Ita trokbuba nung Galil nung aliba yimti ka tenüng agi Nazaret;

²⁷Dawid kidong nungi nisung ka tenüng agi Yosef, shibai aiür ka aniasünga liasü, la dangi Tsüngremi tenyar Gabrielji yok. Aser aiürla tenüngji Mari liasü.

²⁸La dangi pa ao aser ashi, “Pela-a liang, na taochi kanga angula, Kibuba ne den lir.”

²⁹Saka iba o angashiba nungji la kanga shisa bulua aküm, aser la mulung nung ya kechi amala salem o ka ta lai bilema liasü.

³⁰Aser tenyar jagi la dang ashi, “Tetsübuma, Mari, kechiaser Tsüngrem nungi nai taochi nguogo.

³¹Na mashisa akümtsü aser tanur ka asotsü, aser nai pa tenüng Yisu ta ajatsü.

³²Pa tulu alitsü aser pa dang Tematiba meyong Chir ta ajatsü, Kibuba Tsüngremi pa tebu Dawid chuba menden pa nem agütsütsü.

³³Yakob kidong madak pai teti tatem makai chubatsü aser pa chuba yimliji tatem makai alitsü.”

³⁴Saka Mari-i tenyar dangji ashi, “Ni kinungpu mali nung ya kechi koda takoktsü?”

³⁵Tenyar jagi la dang langzü, “Tanela Temeshi ne dangi arutsü, Tematiba aini na akhümbangtsü. Anungji tasotsü aliba tanur dang Tsüngrem chir ta ajatsü,

³⁶aser ajiang, ner kinunger Elizabet la tantsür liaka, la dak tanur ka tangloka la mashisa lir aser shiba dang tapungla ta aja la mashisa kümer ita trokbuba lir.

³⁷Kechiaser Tsüngrem denbo kecha tamakoktsü malitsü.”

³⁸Aser Mari-i ashi, “Ni Kibuba tenzükla, kü dang ne o amaji lidakjangma.” Aser tenyar jagi la nungi pila.

³⁹Item anogo nungji Mari-i aramesoa tenem linük nung aliba Yihuda yimti jagi ilunga ao.

⁴⁰Lai Zakaria kidangi ai aser Elizabet dang salem ashi.

⁴¹Kodang Elizabeti Mari o angashi, la nu menden nung tanur jagi pungten, aser Elizabet Tanela Temeshi agi asüng.

⁴²Aser lai ola tulu agi ayimtena ashi, “Tetsürtem rongnung na temoatsüba aser ne nu menden tejang temoatsüba.

⁴³Kü Kibuba tetsü kü dangi arutsüsa kechiba ya kü dak ang ataloker?

⁴⁴Kechiaser ajiang, ne salem o kü narongi aidang kü nu menden nung tepela agi tanuri pungten.

⁴⁵Kibuba nungi la dang, kechi jembiogo aji ataloktsü ta shibai amangogo la temoatsüba.”

⁴⁶ Aser Mari-i ashi, “Kü nelai Kibuba uludaktsür,

⁴⁷aser kü nelai kü kümtetdakba Tsüngrem dak pelaseter,

⁴⁸ Kechiaser pai pei tenzükla ajemaluba züngshiogo, kechiaser ajiang tang mapang nungi putu ajaki kü dang temoatsüba ta ajatsü.

⁴⁹Kechiaser shiba Takoksang lir, pai ni asoshi mapa tulu inyakogo, pa tenüng temeshi lir.

⁵⁰Pa tsüburtem madak pa yimlibilem putusa putu alitsü.

⁵¹Pai pei teka agi pei tashi sayu, temulungjang nung asüküm bilemba nisungtemji pai prokshidaktsüogo.

⁵² Pai chubatem parnok chuba menden nungi aludaktsüogo; aser ajemalurtem ajungketdaktsüogo.

⁵³Ayabatem tajung agi pai parnok tiptemdaktsüogo. Aser takartem pai tazüng yokogo.

⁵⁴Pai pei tenzüker Israel dang, pa yimlibilem bilemtettsü asoshi yariogo,

⁵⁵ Asen tebutem dang ama, pa metsü Abraham dang teti asoshi jembiba ama.”

⁵⁶Aser Mari-i la den ita asem shi ali, aser lar kidangi meyipa ao.

⁵⁷Elizabet asoshi nu amungtsü anogo abensa aru aser lai jabaso ka aso.

⁵⁸Aser lar kiyongertem aser kinungertemi la dang Kibubai yimlibilem tulu sayuba indang angashi aser parnoki la den pelatep.

⁵⁹Idangji anogo tinübuba nung parnoki pa mejeptokdaktsütsü aru, aser parnoki tebu nüngten Zakaria jadaktsünü.

⁶⁰Saka tetsüi ashi, “Masü, pa tenüng Yohan ta ajatsü.”

⁶¹Parnoki la dang ashi, “Ner kinunger rongnung iba tenüng agi ajaba shinga mali.”

⁶²Pai jabasoji shiba jadaktsünür ta parnoki tebu dang temaitsü sayu.

⁶³Tezülutsü lungpak ka pai meshi, aser zülu, “Pa tenüng Yohan.” Idangji parnok ajak pangka.

⁶⁴Idangjisa pa tebang lapokadok aser temeli saladok aser Tsüngrem sanga o jembi.

⁶⁵Aser parnok kiyongertem ajak madaki tetsübutsü alu aser Yihuda tenem linük ajaklen item ajak indang jembia liasü.

⁶⁶Item angashir ajaki ya pei mulung nung yua ashi, “Süra, iba tanur kechi asütsü?” Kechiaser Kibuba teka pa den liasü.

⁶⁷Aser tanur tebu Zakaria Tanela Temeshi agi sünga shina ashi:

⁶⁸“Israel Tsüngrem Kibuba sangdakjang, kechiaser pai pei nübur semdangogo aser parnok alangzükogo.

⁶⁹Pa tenzüker Dawid kidong nungi asenok asoshi, tekümtet tezü ka pai adokdaktsüogo.

⁷⁰Asen tebutem dang ainkartem ajanga akhi mapang nungi koba pai jembi;

⁷¹oda asen tsükchirtem nungi aser asenok sempartem ket nungi asenok kümzüktsü.

⁷²Aji oda pai asen tetsüteboutem dang yimlibilem nangzükba ataloktsütsüsa aser pa temeshi tezüngzüktepba bilemtettsüsa;

⁷³azüngashiba koba pai asenok tebu Abraham dang azüngashi;

⁷⁴oda asenokji tsükchirtem nungi kümzüker külen tetsübu makai;

⁷⁵pa madang temeshiba aser ochishiba nung, asen arishi tepiyong pa tenzüktsüji asenok dang melatsü.

⁷⁶ Aser tebusang, na Tematiba meyong ainkar ta ajatsü, kechiyong Kibuba jakdang pa lenmang renemtsütsü asoshi na aotsü.

⁷⁷Oda pei nübur nem parnok taitem atokba ajanga, tekümtet metetba shisatsü agütsütsü.

⁷⁸Asen Tsüngrem temeim yimlibilem agi temalen nungi, anogo tasen ka adokba jagi asenok semdangtsü.

⁷⁹ Ammang aser tasüba akhüm nung amenbatem manung sangwatsü asoshi; tesünep lenmang leni asen tetsüng anitsü asoshi na Kibuba jakdang pa lenmang renemi aotsü.”

⁸⁰Aser tanurji ain, aser tanela nung tashi ita aküm aser Israel dang pa sayuba anogo matong tashi pa lisem lima arem nung ali.