Read njo LUK 11 Bible Online

LUK 11 - njo bible

LUK 11

¹Aser tesem ka nung pa sarasadema liasü, aser pa kodang atem, pa nütsüngtem rongnung kati ashi, “Kibuba, Yohani pa nütsüngtem dang sayuba ama, onok dang sarasademtsü sayuang.”

²Aser pai parnok dang ashi, “Kodang nenoki sarasademdir, nenoki yamai shiang, ‘Oba, ne nüng temeshi sang; Ne Yimli arung. Kotak nung koda lir, alima nung aji oda ne mulung sang.

³Anogo shia chiyungtsü onok nem kua.

⁴Aser ozü menentem tokang, kechiaser shiri onok dang tai menar parnok ajak dang onokia tai atoker; aser tatitangba dangi onok tanima.’ ”

⁵Aser pai parnok dang ashi, “Nenok rongnung shiba tembar ka ali, pai pa dangi ayatrem nung oa ashitsü, temba, kü nem amtsük asem apujang;

⁶kechiaser kü tembar aener ka kü dangi arua lir aser pa nem tagütsütsü ni kecha maka.

⁷Aser pai kilung nungi langzüa ashi, kü nem timtem tagütsü, ki shibangadokogo, aser ozü tanurtem kü den yipten nung mejanga lir. Ni ne nem agütsütsü asoshi shishitsü makok.

⁸Ni nenok dang shidi, paji pa temba saka pai shishia magütsünütsü, saka oda pai kanga dang mepishi nung pai shishia pa tenüngdaktsü ajak pa nem agütsütsü.

⁹Aser ni nenok dang shidi, meshiang, aser aji nenok nem agütsütsü, bushiang aser nenoki angutsü; akoshiang, aser aji nenok nem lapoktsütsü.

¹⁰Kechiaser temeshir shiai agizüker, aser shibai bushir pai angur; aser shibai akoshir aji pa nem lapoktsütsü.

¹¹Nenok rongnung tebu kati par chiri amtsük ka meshi nung pa nem lung ka agütsütsüba shiba lir? Mesüra ango ka meshi nung pai pa nem ango melen per ka agütsütsüba shiba ali?

¹²Mesüra pai entsü ka meshi nung jepja ka agütsütsü asü?

¹³Ajangla, nenok mejungi liaka nenok chirtem nem sempet tajung agütsütsü nenoki metetra, nenok kotaker Tebui pa dang meshir nem Tanela Temeshi koda tali magütsütsü?”

¹⁴Aser pai temenen tanela ka aridokya liasü, koba o mejembitetba suwar ka liasü. Kodang temenen tanelaji oadok, nisung jagi o jembi, aser telokti-i süngmang.

¹⁵Saka parnok rongnung kari ashi, “Temenen chuba Belzebul agi pai temenen tanelatem aridoker.”

¹⁶Aser tangar kari pa tendanga kotak nungi temaitsü ka meshi.

¹⁷Saka parnok tebilemba meteta, pai parnok dang ashi, “Koba yimli pei anema lemsadir teraksa akümer, aser kibong kati pei anema lemsara aji laor.

¹⁸Aser Satana pei sasa lemsara ajangla pa yimli koda noktaktsü? Kechiaser Belzebul agi ni temenen tanelatem aridoker ta nenoki ashir.

¹⁹Aser ni Belzebul agi temenen tanelatem aridokra, nenok chirtemi shiba agi parnok aridoker? Anungji parnokji nenok o bendanger asütsü.

²⁰Saka ni Tsüngrem tashi agi temenen tanelatem aridokra, ajangla Tsüngrem Yimli nenok dangi arua lir.

²¹Kodang tashi tait nisung kati nok o nü tabensa bener pei talidak anüker, par rongsen kümzüka lir.

²²Saka kodang tashi taitba nisung kati pa dak pungloker aser pa akoker pai tamang ka-a aliba nok-onü pa ket nungi rakzüka bener aor aser terakzükbatemji pai lemsar.

²³ Shiba kü den mali pa ni anema lir aser shibai kü den mebendener pai prokshir.

²⁴“Kodang temenen tanelaji nisung ka dak nungi adoker, tesüngzükdak aser takongdak tesem ka bushia aor aser kecha mangu nung pai ashir, ozü ki koba nungi ni aru ajagi meyipa odi.

²⁵Aser pai meyipa arudangji pai aji oktoker tiptema angur.

²⁶Idangji pai aor aser pa dang nungi tamajungba tanga tanelatem tenet anir arur, aser parnoki aji agi ia alir; aser iba nisung tesü tiaji mezüng tia dang nungi tamajungba akümer.”

²⁷Aser pai ya shia alidang, telokti nungi tetsür kati ola adoka pa dang ashi, “Nu menden kobai na aben aser mama koba nai ayong tepelatsü!”

²⁸Saka pai ashi, “Aji saka shirnoki oji angashir aser angashiba ama inyaker parnok tepelatsü”

²⁹Aser telokti pa dangi sentenya alidang, pai jembimeso; “Iba putu tamajung putu ka lir aser yangi nisungtemi temaitsü ka bushir, saka Yona temaitsü dak alema tanga temaitsü kecha magütsütsü.

³⁰Kechiaser Ninevi nunger asoshi Yona koda temaitsü ka aküm, aji oda Nisung Chir-a iba putu asoshi temaitsü ka alitsü.

³¹Anüolentip chubatsüri iba putu nisungtem den obendangdak noktaktsü aser parnok aitsütsü. Kechiaser lai ali tatem nungi Solomon shisatsü angatsü aru, saka ajiang, Solomon dang tuluba ka yangi lir.

³²Ninevi nungeri obendangdak iba putu den noktaktsü aser iba putu aitsütsü; kechiaser Yona sayutsüngiba nung parnoki temulung meyip, saka ajiang, Yona dang tuluba ka yangi lir.

³³“Milen tsükloker külen shingai a miima mayur mesüra molok agi sembanga mayur, saka shirnok kidangi aiter parnok nem tesangwa agütsütsü asoshi milendong nung ataloka ayur.

³⁴Ne tenük ne temang asoshi milen lir. Kodang ne tenük junga lir, ne temang ajonga sangwa alitsü; saka kodang ne tenük junga melilir ne temang ajonga tammang agi sünga alitsü.

³⁵Anungji ne dak aliba tesangwaji tammang masütsüsa kanga kümdanga liangma.

³⁶Anungji ne mang ajongaji tesangwa agi sünga lira, ne dak tammang kecha malitsü. Milen agi ne nem tesangwa agütsüba ama ne mang sangwa sangwa-a alitsü.”

³⁷Kodang pai o jembitem, Farisi kati pa den chiyungtsü pa jaok; anungji pai ao aser chiyungdak amen.

³⁸Pai teka memetsüki dang chiyungba ngua, Farisi nungbaji süngmangadok.

³⁹Anungji Kibubai pa dang ashi, “Oda nenok Farisitemi marok aser su tema shidoker, saka nenok telunglen ambangyim aser tamajung agi sünga lir.

⁴⁰Nenok tamashi nisungtem, Tsüngrem shibai tema yanglu, paisa telunga meyanglu ama?

⁴¹Saka nenok marok aser su nung kechi lir aji sensaker nem agüjang aser nenok dak ajak merüka alitsü.

⁴²“Saka nenok Farisitem, aiatai! kechiaser nenoki napa aser an menemtsü aser tanga ansotsü shia tershilem tenla agütsür, saka nenoki tim obendangba aser Tsüngrem temeim toktsür, itemia nenoki inyaker alitsüla aser tangajia mesentoktsüla,

⁴³Nenok Farisitem aiatai! Kechiaser nenoki sinagogtem nung temaba menden sabur aser shishidak salem aginür.

⁴⁴Nenok aiatai! Kechiaser nenok nisungi manguba lepertem ama koba manung nisungtemi memeteti jajar.”

⁴⁵Aser ozüng meteter kati pa dang langzü, “Tesayur, nai ya ashiba agi onok mezüngmeshir.”

⁴⁶Aser Yisui ashi, “Nenok ozüng metetertem aiatai, kechiaser mebentettsüsa khu nenoki nisungtem nem bendaktsür, saka nenoki pei sasa khu dakji temeyong agi danga mekongshir.

⁴⁷Nenok aiatai! Kechiaser nenok tetsü tebutemi tepsetba ainkartem leper nenoki yanglur.

⁴⁸Anungji nenok tetsü-teboutem mapa asoshi kulitemji nenok lir, aser nenoki itemji hau asür; kechiaser parnoki ainkartem tepset, aser nenoki parnok leper yanglur.

⁴⁹“Anungji Tsüngrem shisatsüia ashir, ‘Ni nenok dangi ainkartem aser tenyartem yoktsü aser parnoki parnok rongnung kar tepsettsü aser kar rishikangshitsü.’

⁵⁰Anungji alima tetenzük nungi ainkartem azü tokshiba ajak,

⁵¹Abel zü nungi tenladak o temeshidak-na tsüngda nung samaba Zekaria zü tashi iba putu dang nungi akangtsü. Hau, ni nenok dang shidi, iba putu dang nungi aji akangtsü.

⁵²Nenok ozüng metetertem aiatai! Kechiaser nenoki shisatsü ki sabi bener aor, saka nenok sasa iba ki jagi marur aser tangar shir aji agi aitsü meranger parnoka nenoki nokdanger.”

⁵³Aser kodang pa idak nungjagi oadok ozüng metetertemi aser Farisitemi pa anema o aika jembi aser pa dangi tasüngdangba jenti aru,

⁵⁴aser pai langzüba nungji langka tai lira pa aputsü parnoki mita ali.