Read njo LUK 12 Bible Online

LUK 12 - njo bible

LUK 12

¹Iba mapang nungjisa nisung meyirijang aika tetsüng o tetsüng na ajemteptsüsa külemi nungtendang, pai tamasa pei nütsüngtem dang shimeso, “Farisitem anemsüba piyazü asoshi nenoki kümdangang.

²Saka temai madoktsüsa kecha nembanga maka aser memetettsüsa kecha miima mali.

³Anungji ammang nung kechisa shiogo, aji sangwa nung angashitsü aser taktang telungba nung nenok narong nung kechisa tanemi jembiogo aji kilem manung ayimtentsü.

⁴“Aser kü tembartem, ni nenok dang shidi, shiri temang tepseter, aser idakji chia parnoki kecha meinyaktettsü, parnok tetsübu.

⁵Saka nenoki shiba dang tsübutsü tim ni nenok kümdangdaktsüdi, shibai tepseter külen molumi nung ajongoktsütsü tashi lir pa ang tsübuang; hau ni nenok dang shidi pa-ang tsübuang.

⁶Alushijak pungu poisa ana yong mayoker ama? Aser parnok ka danga Tsüngrem madang mamadoker.

⁷Koda ne kolak nung ku ajak pai züngteta lir. Tetsübu, alushijak aika dang nungi nenok taoba.

⁸“Aser ni nenok dang shidi, shirisa nisung madang ni nangzükdir, Nisung Chir-ia paji Tsüngrem tenyartem madang nangzüktsü;

⁹saka shibaisa nisung madang ni menangzüklir, nia Tsüngrem tenyartem madang paji menangzüktsü.

¹⁰Aser shirisa Nisung Chir anema o ka jembidir, pa dang aji atoktsü; saka shibai Tanela Temeshi anema ataladir, pa dang aji matoktsü.

¹¹ Aser kodang parnoki nenok sinagog yimsüsürtem bangdak dangi anir arudir nenoki kechi koda langzütsü mesüra kechi jembitsü ta shisa bulua tebilem.

¹²Kechiaser iba mapang nungjisa nenoki kechi ashitsü tim aji Tanela Temeshi-i nenok dang sayutsü.”

¹³Telokti nungi nisung kati ashi, “Tesayur, küdi dang kü den senmang lemdangang ta shiangma.”

¹⁴Pai pa dang ashi. “Nisung shibai nenok madak ni o bendanger ka aser telemsatsür ka kümdaktsür?”

¹⁵Aser pai parnok dang ashi; “Angang, tenükshiba, chidiyungdi ajak nungi nenok sasa kümdangang, kechiaser nisung ka takümji pa rongsen jenti akabaji masü.”

¹⁶Aser pai parnok dang o-entepba ka ashi, “Takar kati alu nung tsük jenti aru;

¹⁷aser pai pei sasa shisadanga ashi, ‘Ni kechi inyaktsü, kechiaser ni kü tsük konga tayudak maka?’

¹⁸Aser pai ashi, ‘Ni ya inyaktsü, ni kü jentem benzüker tuluba küma yanglutsü aser idakji ni kü tsük aser rongsen ajak rizüngtsü.

¹⁹Aser ni kü tanela dang ashitsü, Tanela, küm aika asoshi na rongsen aika rizünga lir, kazüa liang, chiang, jemang, aser pela liang!’

²⁰Saka Tsüngremi pa dang ashi, ‘Na tamashisang, taonungsa ne taküm ne dak nungi akangtsü aser kechi rongsen nai rizünga aka itemji shir meyong asütsü?’

²¹Anungji shibaisa pei asoshi rongsen rizüngdir, aser Tsüngrem tsüngdang takar masü, pa iba nisung mesüker.”

²²Aser pai pei nütsüngtem dang ashi, “Anungji ni nenok dang shidi, nenok taküm asoshi nenoki kechi achitsü mesüra nenok temang asoshi kechi abentsü ta shisa tebulu.

²³Kechiaser chiyungtsü dang nungi taküm taoba, aser süoshi dang nungi temang taoba.

²⁴Warotem indang bilemdangang; parnoki matener, marur aser terizüngdak ki mesüra jen maka, saka Tsüngremi parnok mesür. Ozütem dang nungi nenok koda taoba lir.

²⁵Aser nenok rongnung shibai teyongyaba agi pa tar süklep ka inloktsü[4] akok?

²⁶Nenoki iba amala mapa tila ka mokokra, kechiba tanga tanüngba indang nenoki shisa bulur?

²⁷Arem labu narotem koda ainer shisadangang; parnoki meinyaker mesüra ang mainer; aji saka ni nenok dang shidi, Solomon pei sentsüwangshi ajak nung item rongnung ka mesüka mesobu.

²⁸Saka Oh, tamang tila nisungtem, kechi arem ai tanü lir aser asüng mimong nung enoka arongtsü, iba nemji Tsüngremi yamai abendaktsü süra, pai idakji chia nenok nem mabendaktsütsü ama?

²⁹Aser nenoki kechi achitsü aser kechi ajemtsü ta tebushima mesüra shisa tebuluma!

³⁰Kechiaser alima kintemi item ajak bushir, saka nenok Tebui item tenüngdaktsü kar ta metet.

³¹Aji saka nenoki pa Yimli bushiang aser pai nenok nem item ajak bendenloktsütsü.

³²“Tetsübu, telok tilaba, kechiaser nenok Tebui tepela agi nenok nem Yimliji agütsütsü pai mulungba lir.

³³Nenok akabatem yokang aser makar nem angati agüjang aser kotak nung rongsen rizüngang kong auür anasa marur aser tarütsü agi meraksatsür; iba rongsen den tejen makümba sen julitem nenoki pei asoshi renemang.

³⁴Kechiaser kong ne rongsen lir, yangji ne mulunga lir.

³⁵“Nenoki nangri kangang aser milen tsükloka saksalema liang.

³⁶Aser kilirtem shirnoki pei kibur shiba kiyir benjongdak nungi kidangi shilangba ata-a alir aser kiburi arua kishi nung akoshidang idangjisa pa nem lapoktsür, item nisungtem ama liang.

³⁷Kilirtem shiri kibur arudang nüka lia angur parnok tepelatsü! Ni nenok dang shitak shidi, pai pei sasa nangri akangtsü aser parnok chiyungdaktsütsü asoshi mendaktsütsü aser arua parnok nem anganütsü.

³⁸Pai mita anükba mapang tanabuba aser tasembuba nung arua, aser parnok yamaji ngura, item kilirtem tepelatsü!

³⁹Saka ya metetang, koba mapang nung auür arutsü kiburi metet asübo pai nüka lila aser par ki merakpokdaktsüla.

⁴⁰Nenok renema alitsüla, kechiaser nenoki meimlaba mapang ka nungang Nisung Chir arutsü.”

⁴¹Peteri ashi, “Kibuba, o-entepba ya onok asoshi jembir asü, mesüra ajak asoshi?”

⁴²Aser Kibubai langzü, “Ajangla kiburi par kibong anishidaktsütsüba aser par kilirtem nem mapang shitak nung chiyungtsü shilem anganüdaktsütsü asoshi yutsüba temulung lemtetba aser shisa taka kilirji shiba?

⁴³Par kibur arudang kilir shibai yamaji inyaka ngudir, iba kilirji tepelatsü!

⁴⁴Atangji ni nenok dang ashir, pai par rongsen ajak madak pa yutsütsü.

⁴⁵Saka iba kilir jagi kü kibur menurang arutsü ta pei mulung nung shia kilirtem aser kilitsürtem dak azüktsü aser achitsü aser ajemtsü aser yi agi meseptsü apusora,

⁴⁶aser meimlaba anogo aser memetetba mapang ka nung iba kilir kiburji arutsü aser pa merenshitsü aser temulung melemtetba purtem den paji yutsütsü.

⁴⁷Aser kilir shibai pei kibur mulung meteter merenemer, mesüra pai mulungba amaji meinyaker pai kanga sashia azükbaji angutsü.

⁴⁸Saka shibai memetet aser tazükba angutsü temsüa inyaktet pa tazükba tera agi azüktsü. Aser shiba nemsa jenti agüja lir pa nungi jenti akangtsü; aser shir ket nung temulung lema jenti yuja lir pa nungi tali meshitsü.

⁴⁹“Alima nung mi adokdaktsütsü ni aru, aser ya jangruadok asübo koda jungla?

⁵⁰Saka ni baptiba ka agi baptitsüba lir. Aser ya merenem tashi ni khu agi neneta lir.

⁵¹Alima nung yimjung adokdaktsütsü ni aru ta bilemer asü? Ni nenok dang shidi, masü, saka telemsa adokdaktsütsü.

⁵²Kechiaser ki ka nung pungu alibaji lemsatsütsü, oda asemi ana anema aser anati asem anema telemsa adoktsü.

⁵³Tebui techir anema, techiri tebu anema, tetsüi jala anema, jalai tetsü anema, kinungpu tetsüi par chir kinungtsü anema aser lai pei kinungpu tetsü anema nenok rongnung yamaji telemsa adoktsü.”

⁵⁴Aser pai telokti dang ashi, “Kodang nenoki anüolentsütsü mepet ka adokya ngudir, idangyongji nenoki ashir, tzünglu arudagi, aser yamaji ataloker.

⁵⁵Aser kodang anüolentip mopung aonba nenoki angur, nenoki ashir, anü tsüktsüka aputsü; aser yamaji ataloker.

⁵⁶Nenok anemsübatem, nenoki alima aser anüng jak ratettsü meteter, saka kechiba nenoki iba mapang tetezü koda shitettsü ajibo memeteter?

⁵⁷“Aser kechi shitakba lir aji kechiba nenoki pei sasa angatettepa makümer?

⁵⁸Kechiaser na metbuba den obendanger dangi aodang, lenmang nung pa den nai puteptsü asoshi merangang; aji oda mesüra pai na obendanger ket nung anioktsütsü aser obendangeri na tepuoker ket nung bendanga agütsütsü aser tepuokeri na tsüngden chiokdak puoktsü.

⁵⁹Ni ne dang shidi, nai tatembuba poisa kaji meküpdang tashi idak nungjagi na kodaka-angamadoktsü.”