Read njo LUK 15 Bible Online

LUK 15 - njo bible

LUK 15

¹Alimelen sarurtem aser temenenpurtem ajak pa o angatsü pa anasai aruya liasü.

²Aser Farisitem aser tezülurtemi nüngnünga ashi, “Iba nisung yagi temenenpurtem agizüker aser parnok den chiyunger.”

³Anungji pai parnok dang iba o-entepba ya ashi,

⁴“Nenok rongnung san noklang ka akaba nisung kati item rongnung ka madokra, pai kechi inyaktsü? Pai tukur-tukuji arem nung toktsür, temadokbaji mangu tashi bushitsü.

⁵Aser pai aji kodang angur, pai pelashishia pei tapubang manung ajongloker.

⁶Aser kodang pai kidangi arur, pei tembartem aser kiyongertem jatepa parnok dang ashir, ‘Kü den pelatepang, kechiaser ni kü temadokba santo nguogo.’

⁷Anungji ni nenok dang shidi, Yamaji temulung meyiptsü nüngdak makaba temeshipur tukur-tuku dangbo temulung meyipa aruba temenenpur ka agi kotak nung tali tepelaba asütsü.

⁸“Ano taribi sen ter akaba tetsür kati item rongnung ka madokra, lai milen tsükloker ki oka aji mangu tashi anebalua mebushir ama?

⁹Aser kodang lai aji angu, lai tembartem aser kiyongertem jateper aser ashir, ‘Kü den pelatepang, kechiaser kü tesamaba sento ni nguogo.’

¹⁰Ni nenok dang shidi, yamaji temulung meyipba temenen nisung ka agi Tsüngrem tenyartem rongnung tepela lir.

¹¹“Aser pai ashi, nisung ka jabaso ana liasü,

¹²Tanubusang jagi tebu dang ashi, ‘Oba, ne rongsen nungi kü shilem kechi lir aji kü nem kua.’ Anungji tebui pei rongsen parnok nem lemsa agütsü.

¹³Anogo ishika lir külen jabaso tanubusangi pei oset ajak bener alima talang kati aeni ao. Idakji pai pei rongsen lalushibonga temenen benshia ali.

¹⁴Aser pai pei rongsen ajak endokmar külen iba lima nungji aya-wara kanga tulu ka adok aser pa kanga sensak aten.

¹⁵Idangji iba lima alir nübur rongnung ka den pai semloka ali, aser kibur jagi moapu nung ak anüktsü yok.

¹⁶Aser ak-i achiba matsüklashi teküp achitsü pai yongya saka shingaia pa nem kecha magütsü.

¹⁷Saka kodang pa temulung tanga aru pai ashi, Kübu den ayangertem kwika chiyungtsü peria aser ano talia angur, saka nibo idaki taya agi tasür.

¹⁸Ni apusoa kübu dangi odi, aser ni pa dang ashitsü, ‘Oba, kotak anema aser ne madang ni temenen menaogo;

¹⁹ni joko ne jabaso ta ajatsü metemsü; ne ayangertem rongnung ka ama ni amshiang.’

²⁰“Aser pai apusoa tebu dangi aru. Saka pa ano apiga nung alidang, tebui pa ngua aochia bilema asema ao aser tekong nung azüit aser pa tebang mesep.

²¹Idangji techiri tebu dang ashi, ‘Oba, kotak anema aser ne madang ni tai menaogo; ni joko ner jabaso ta ajatsü metemsü.’

²²Saka tebui kilirtem dang ashi, ‘Sobutsü tajungtiba yakta bena arung aser aji pa nem sobujang, pa temeyong nung küri aser tetsüng nung tsüngsem semokjang.

²³Aser nashi chanu teyirabaji anir arung aser tepsetang aser asenoki chiyunga pelatepdi.

²⁴Kechiaser kü jabaso ibai tasü liasü, aser tanaben taküm lir; pa sama-a liasü, saka tang meyipa nguogo.’ Aser parnoki pelateptsü tenzük.

²⁵“Idangji par jabaso tambusangji alu nung liasü; aser pai adoka ki anasa arudang kentenba aser tsüngsangba ola pai angashi.

²⁶Aser pai kilirtem rongnungi ka aja aser ya kechi tetezü ta asüngdang.

²⁷Aser kilir jagi pa dang langzü, ‘Nenu shilanga lir, aser nebui nashi chanu teyirabato tepset kechiaser pai nenu junga aser anema lia meyipa angu.’

²⁸Saka pa tediji ain adok aser kidangi metuli ta ashi. Anungji tebui kimai adoka pa dang mepishi.

²⁹Saka pai tebu dang langzü, ‘Ajiangjo, küm paikati ni ne dang tenzüka aru, aser nai ashiba o kodanga mangai mali; saka kü tembartem den pelateptsü asoshi kü nem nai kodanga nabong chanu ka danga magütsü.

³⁰Saka kodang iba ner jabaso shibai nüktapangtatsürtem den ne sen chima aser kodang pa meyipa aru, pa asoshi nai nashi chanu teyirabato tepset.’

³¹Idangji tebui pa dang langzü, ‘Kü jabaso, na teti kü den lir aser kü meyong ajakji ne meyong lir.

³²Saka asenoki temulung chia pelateptsü tim dang lir, kechiaser nenu tasü liasü, aser tang pa tanaben taküm lir, pa madoka liasü saka tang pa nguogo.’ ”