Read njo LUK 16 Bible Online

LUK 16 - njo bible

LUK 16

¹Pai ano nütsüngtem dang ashi, “Takar ka par ketdangser ka liasü, aser pai kibur rongsen lalushibongdagi ta taitsübatem pa anema kibur dangi bener aru.

²Aser pai pa aja aser pa dang ashi, ‘Ne indang ni angashiba ya kechi? Ne mapa züngdangtepa kü dang sayuang, kechiaser joko na ketdangsüba mapa meinyaktet.’

³Aser ketdangsüba jagi pei sasa ashi, ‘Kü kiburi ni nungi ketdangsüba mapa agizüka bener oadokra ni koda asütsü? Ni ali atutsü tashi mait aser ano meshimetsütsüa aaker.

⁴Kodang ni ketdangsüba mapa nungi anentsüdir, kü tembartemi parnok kidangi ni aniketdaktsütsü asoshi ni kechi inyaktsü aji ni meteta lir.’

⁵Idangji par kibur dang sentsütsür ka ka pa dangi ja-a, mezüngbuba dang ashi, ‘Nai kü kibur nem agütsütsü sentsü kwi tsüa ali?’

⁶Pai ashi, ‘Totzü tatakzük noklang ka.’ Aser pai pa dang ashi, ‘Ne tenangzüktepba kaket bena arung, yakta mener tenem ta züluang.’

⁷Idangji pai ano tangar ka dang ashi, ‘Na-a sentsü kwi tsüa ali?’ Pai ashi, ‘Tsük yimchi noklang ka.’ Pai pa dang ashi, ‘Ne tenangzüktepba kaket bena arur tir ta züluang.’

⁸Aser pa kiburi ochi mashiba ketdangsürji pai tasa ka-a inyakba asoshi pa tenüng asang; kechiaser tesangwa chirtemdangbo iba lima chirtem parnok pei putu nung kanga agia shisa takaba lir.

⁹“Aser ni nenok dang shidi, Nenoki pei asoshi tiyazü rongsen agi tembartem kümdakjang, anungji aji kodang endokmadir, parnoki tatem makaba kidangi nenok anikettsü.

¹⁰Shiba dak kanga tila nung temulung lemteter, pa dak jenti nunga temulung alemtsü, saka shiba dak kanga tila ka nung temulung lemteta mali, pa dak jenti nunga temulung malemtsü.

¹¹Anungji memeshiba rongsen nung nenok dak temulung melemtetra temeshiba rongsen nung nenok dak shibai temulung lemtettsü?

¹²Aser tangar meyong rongsen nungji nenok dak temulung melemtetra, shibai nenok nem nenok meyong agütsütsü?

¹³ Kilir shingaia kibur ana metenzüktet; kechiaser pai ka sempatsü aser ka meimtsü. Mesüra pai ka tsütsü semloktsü aser tangarbaji mezüngmeshitsü. Nenoki Tsüngrem aser rongsen külemi metenzüktet.”

¹⁴Aser sen penbuba Farisitemi item ajak angashi aser parnoki pa mezüngmeshia atala.

¹⁵Saka pai parnok dang ashi, “Nenoki nenok sasa nisung madang temeten bushir, saka Tsüngremi nenok mulungjang meteta lir, kechiaser nisung rongnung ulua alibaji Tsüngrem madang kanga tesembatsü.

¹⁶“Yohan Baptitsüba aruba tashi Mosa ozüng aser ainkartem kaket kanga tongtibang liasü; iba tensa nungjagi Tsüngrem Yimli osangtajung sayutsüngia lir, aser ajagi nungtepa air.

¹⁷Saka ozüng tasüto tilatiba ka tsük dang nungibo anüng aser ali samatsü temelaba

¹⁸Shibai pei kinungtsü palar tangar agidir, pai nüktapangta benshir aser kinungpui paladokba tetsürji shibai agidir pai nüktapangta benshir.

¹⁹Takar ka liasü, shibai sü tanük aser sentsüprang süoshi sobur, kenüamati pelashishia benjong yanglua liasü.

²⁰Aser komo agi zükbangba meshimetsür ka tenüng agi Lazar, par kishi anasa ontaka liasü.

²¹Aser takarsang langbang nungi tsükba chiyungtsü tanük-tari achitsü pai yongya. Aser azütemi arua pa komo menak.

²²Aser ya adok, meshimetsürji asü, aser tenyartemi pa Abraham tekui bener ao. Takarsangjia asü aser pa arem;

²³aser pa asü yim nung kanga kangshia alidang, pai pei tenük rangketa yok nung pai talang nungji Abraham angu aser pa teku nung Lazar ajunga liasü.

²⁴Aser pai ayimtena ashi. ‘Oba Abraham, kü dang aochiang, aser Lazari pa temeyong banglak tzü nung asenoker kü temeli nung jenoka mokongdaktsütsü yokang, kechiaser iba milak agi ni kanga kangshia lir.’

²⁵Saka Abrahami ashi. ‘Techir, na pei taküm alidang, nai ne tajungtiba tia angu ta bilemtetang, aser Lazar yamaji tamajungba tia nung liasü; saka tang pa yangi tesünep nung lir, aser na tekangshi nung lir.

²⁶Aser ano yang nungi nenok dangi shirnoki onüdir makoktsü aser ano idak nungjagi onok dangi shinga arutsü makoktsü asoshi asenok tsüngda nung teti tatem makaba tazüngla tulu ka lir.’

²⁷Aser pai ashi, ‘Ajangla oba, kü kidangi pa yokangma ta ne dang mepishir,

²⁸kechiaser kü adianu pungu lir, pai parnok dang kuli agütsütsü yokang; aji mesüra, parnoka iba tekangshidaki arutsüla.’

²⁹Saka Abrahami ashi. ‘Parnok Mosa aser ainkartem Lai tesayuba kar; parnoki parnok o angadakjang.’

³⁰Aser pai ashi, ‘Masü, oba Abraham, saka tasürtem nungi nisung ka parnok dangi ora, parnoki temulung meyiptsü.’

³¹Aser pai pa dang ashi, ‘Parnoki Mosa aser ainkartem Lai tesayubatem mangara, tasürtem nungi nisung ka shia aruaka parnoki mamangtsü.’ ”