Read njo LUK 17 Bible Online

LUK 17 - njo bible

LUK 17

¹Pai pei nütsüngtem dang ashi, “Temetsüdaktsü adokdaktsütsüsa tatitangtem arulanglang; saka shiba ajanga itemji arudir pa asoshi aiatai!

²Item tilatem rongnung ka danga shibai metsüdaktsüdir, pa asoshi temenüngba lungpak ka tekong nung iloker tzüyim nung pungok ang jungla.

³Nenoki nenok sasa kümdangang; ne adianui tai menara, arüjang, aser pai temulung meyipra, pa nem tatok agüjang.

⁴Pai anogo ka nung tenetben na anema tai menara aser tenetben ni temulung meyiper ta meyipa shira nai pa dang tai adoktsüla.”

⁵Aser tenyartem terana jagi Kibuba dang ashi, “Onok tamang züindakjang.”

⁶Aser Kibubai ashi. “Nenok dak tamang jibijang taka lira, nenoki iba korishi dong dang ashitsü, ‘atsütetang aser tzüyim nungji ajungokjang’ aser yagi nenok o angatsü.

⁷“Saka nenok rongnung shiba kilir ka aka aser pai alu alar aser santem anüker pa alu nungi adokdang shibai shitet, ‘Yakta arung aser chiyungtsü menang!’

⁸Saka pai pa dangji yamai ang mashir ama, ‘Ni asoshi chiyungtsüji renemang aser nangri kanger ni chiyunga majem tashi ni anganüang aser aji sür külen na chiyunga ajemtsü’ ta pai mashir ama?

⁹Kilir jagi pai ashiba inyak nung pai pa tenüng asangtsü ama?

¹⁰Yamaji nenokia nenok dang ashiba inyakmar külen shiang, ‘Onok tagidak makaba lartem kechi teinyaktsü lir aji dang onoki inyak.’ ”

¹¹Pai Yirusalemi aoba lenmang nung Samaria aser Galil tsüngda ajanga süi.

¹²Aser pa yim kati aidang zütsüra aketba nisung ter-i pa ajuru,

¹³aser parnoki ola adoka ayimtena ashi, “Yisu, Tesayur, onok dang aochiangma!”

¹⁴Kodang pai parnok angu, pai parnok dang ashi, “Oang, aser putirtem dang nenok sasa sayuang.” Aser parnok taodangji parnok meshiteta aküm.

¹⁵Parnok rongnung kati pa anebogo ta meteta ola tulu agi Tsüngrem nem sentsüwangshi agüja pai meyipa aru,

¹⁶aser pai Yisu tsüngdang apudaka pa nem tenüngsang agütsü, aser paji Samaria nunger ka liasü.

¹⁷Yisui langzü, “Nisung ter meshitet masü no? Tukubo kong ali?

¹⁸Iba bendanger nisung ka dak alaka Tsüngrem tenüng asangtsü meyipa aruba shinga mali asü no?”

¹⁹Aser pai pa dang ashi, “Shishiang aser oang, ne tamang agi na junga kümogo.”

²⁰Tsüngrem Yimli kodang arutsü ta Farisitemi asüngdang, aser pai parnok dang langzü, “Tsüngrem Yimliji penzütsüsa temaitsütem agi marur;

²¹mesüra shingaia yamai mashir, ‘yangi ajiang mesüra oagi ajiang;’ kechiaser ajiang, Tsüngrem Yimli nenok rongnung lir!”

²²Aser pai nütsüngtem dang ashi, “Mapang ka arutsü kodang nenoki Nisung Chir anogotem ngunütsü, saka nenoki ya mangutsü.

²³Parnoki nenok dang ashitsü, ‘Oagiji ajiang! mesüra yangi ajiang!’ Saka aji reprangtsü parnok sülen tanitak.

²⁴Kechiaser kechi koda tsüngpret anüng tip külen pret nung anüng tip külen tashi sangwar, yamaji Nisung Chir pa anogo nunga alitsü.

²⁵Saka tamasa pa kanga tuo ashitsüla aser iba putui pa jentoktsü.

²⁶Aser Noa anogo nung aliba ama yamaji Nisung Chir anogo nunga alitsü.

²⁷Noai rongi matuba anogo tashi aser tzümetsüng arua parnok ajak mesamatsü tashi parnok chia jema, anioka aser kiba kiyi yoka liasü. Aser tzümetsüngji aru aser parnok ajak okshia samatsü.

²⁸Ibai Lot mapang nung koma liasü yamaji alitsü. Parnoki achi, parnoki ajem, parnoki ali, parnoki ayok; parnoki tsünü aser parnoki yanglu.

²⁹Saka Loti Sodom nungi oadokba anogo nungji mi aser tarongba lung anüng nungi tzünglu ama alu, aser parnok ajak samadaktsü.

³⁰Yamajisa Nisung Chir jungkai adokba anogojia alitsü.

³¹Iba anogo nungji shiba kilem nung lidir, pa par kidang aliba rongsen abentsü teluma aser shiba alu nung lidir, pa-a meyipa tetuguma.

³²Saka Lot kinungtsü bilemtetang!

³³Shibai pei taküm ajangzüktsü merangdir aji samatsü. Saka shibai pei taküm samadir pai aji kümzüktsü.

³⁴Ni nenok dang shidi, paonungji yipten ka nung nisung ana alitsü, ka anitsü aser tangarji toktsütsü.

³⁵Tetsür ana semki ka nung külemi tsük senya alitsü, ka anitsü aser tangarji toktsütsü.

³⁶Nisung ana alu nung alitsü, ka anitsü aser ka toktsütsü.”

³⁷Aser parnoki pa dang ashi, “Kong, Kibuba?” Pai parnok dang ashi, “Kong tasü mang lidir, yangji hogontem külemi senteptsü.”