Read njo LUK 18 Bible Online

LUK 18 - njo bible

LUK 18

¹Parnoki teti tezü metangi sarasademtsü tim ta o-entepba ka pai parnok dang ashi.

²Pai ashi, “Yimti ka nung Obendanger ka liasü, shibai Tsüngremji metsübu aser nisunga mezüngmeshi.

³Aser iba yimti nungji amitsür ka liasü shibai aiben pa dangi arua ashi. ‘Kü tsükchir anema obendangba lateta kü nem agüjang.’

⁴Kenpiga pai nungtem saka tesülen pai pei sasa ashi, ‘Ni Tsüngremji metsübur aser nisung danga mezüngmeshiaka,

⁵oda iba amitsüri ni timtemdaktsü nung ni la o bendangdi, kechiaser lai maneni dang aruba agi ni lakteter.’ ”

⁶Aser Kibubai ashi, “Ochi mashiba obendangeri ashibaji angangma.

⁷Aser Tsüngremi shimtetbatem shirnoki anüngdang aser aonung maneni pa dang ayimtener; Tsüngremi parnok atema o mebendangtsütsü ama?

⁸Ni nenok dang shidi, pai parnok asoshi yakta metentsütsü. Aji sakasa kodang Nisung Chir arudir alima nung pai tamang ngudi ma?”

⁹Aser nisung kar shirnoki pei sasa temeshi ta züngshia pei sasa dak tamang ayur aser tangar sensatsür parnok dang o-entepba pai ashi.

¹⁰“Nisung ana sarasademtsü tenla kidangi atu. Ka Farisi aser tangar kaji alimelen sarur.

¹¹Farisi nungbaji noktaka pai yamai sarasadem, ‘Oh Tsüngrem, tangar nisungtem oda rongsen rakzükraktemertem, ochi mashirtem, nüktapangtartem mesüra ibala alimelen sarur ka ama ni masü, anungji ni ne tenüng asanger.

¹²Ni hapta nung anaben tashi lumir, ni anguba ajak nungi tershilem shitak agütsür.’

¹³Saka alimelen sarubaji tera pila oa noktaka pai pei tenük kotaklen rangketa mereprangi, pei sasa teku nung tsünga ashi, ‘Oh Tsüngrem, ni temenen nisung ka, kü dang aochiang!’

¹⁴ Ni nenok dang shidi, tangarba dang nungibo iba nisung jagi Tsüngrem tsüngdang temeten ngur pei kidangi ao, kechiaser shibaisa pei sasa uludir, pa tila akümtsü, saka shibaisa pei sasa ajemaludir pa ulutsütsü.”

¹⁵Aser pa nem kongshidaktsütsü asoshi parnoki pa dangi tila-tanurtem anir aru; saka kodang nütsüngtemi aji angu, parnoki parnokji arütsü.

¹⁶Saka Yisui parnok pa dangi aja aser ashi, “Tila-tanurtem kü dangi arudakjang. Parnok tesongtem, kechiaser Tsüngrem Yimliji ibala pur meyong.

¹⁷Atangji ni nenok dang shidi, shibaisa tila-tanur ka ama Tsüngrem Yimliji magizüker, pai kodakaanga aji agi maitsü.”

¹⁸Aser yimsüsür kati pa dang asüngdang, “Tesayur tajung, teti taküm senmang amangtsü asoshi ni kechi inyaktsüla?”

¹⁹Aser Yisui pa dang ashi, “Nai kechiba kü dang tajung ta ajar? Tsüngrem dak alema shinga tajung mali.

²⁰Nai ozüngtem meteter, ‘Nüktapangta tebenshi, tetepset, tauya, tiyazü kuli teyi, nebu aser netsü akhüm tsübuang.’ ”

²¹Idangji nisungba jagi langzü, “Item ajak ni lanuwa nungi benshia arudagi.”

²²Aser kodang Yisui ya angashi, pai pa dang ashi, “Na ano langka agi madoksa. Na akaba ajak yokang aser aji sensaker nem lema agüjang, aser kotak nung na rongsen akatsü, aser arung kü sülen anitakang.”

²³Saka kodang pai item o angashi, pa jashia aküm kechiaser pa kanga takar liasü.

²⁴Yisui pa dak repranga ashi, “Takari Tsüngrem Yimli-i aitsü koda tasak!

²⁵Kechiaser takari Tsüngrem Yimli-i aitsü dang nungibo ajem ki ateta ut süia aotsü temelaba.”

²⁶Aser ya angashirtemi ashi, “Ajangla shiba-ang kümzüktsü?”

²⁷Saka pai ashi, “Kechi meimchir asoshi tamakoktsü, aji Tsüngrem asoshibo takoktsü.”

²⁸Aser Peteri ashi, “Onoki onok kibongtem toktsüogo aser ne sülen anitak.”

²⁹Aser pai parnok dang ashi, “Atangji ni nenok dang shidi, shibaisa kibong süshia, kibutsü süshia, techirtem süshia Tsüngrem Yimli atema toktsüogo,

³⁰pai iba mapang nung kanga tali angutsü aser tarutsü mapang nung teti taküm angutsü.”

³¹Aser teranaji pa den anir oa parnok dang ashi, “Atangji asenoki tang Yirusalemi atur, aser Nisung Chir indang ainkartemi kechisa zülua toktsü item shiaji abensa-a ataloka arutsü.

³²Kechiaser paji Bendangertem ket nung bendanga agütsütsü, aser sensatsütsü aser mak süa benshitsü aser metzü metsüloktsütsü.

³³Aser parnoki pa dak azüktsü aser pa tepsettsü, saka asemnübuba nung pa shia arutsü.”

³⁴Saka nütsüngtemi item o tetezü kecha mangatet. Aser iba ashibaji parnok nungi miimbanga liasü aser aji parnoki mangatet.

³⁵Pai Yeriko anasai arudang nükpoker ka lenmang tezülen mener meshimetsüa liasü.

³⁶Aser telokti ka süia aoba angashia ya kechi sür ta pai asüngdang.

³⁷Nazaret nunger Yisu süidagi ta parnoki ashi.

³⁸Aser pai ayimtena ashi, “Dawid Chir Yisu, kü dang aochiangma!”

³⁹Aser Shirnok tejaklen liasü parnoki paji arütsü aser ajemajema liang ta pa dang ashi, saka pai ano taliang ayimtena ashi, “Dawid Chir, kü dang aochiangma!”

⁴⁰Anungji Yisui noktak aser pa dangi nükpok sangji anir arung ta ashi. Aser kodang pai anasai aru, Yisui pa dang asüngdang,

⁴¹“Na asoshi ni kechi inyakdaktsünür?” Idangji pai langzü, “Kibuba, ni ngunür.”

⁴²Aser Yisui pa dang ashi, “Nai nguang! Ne tamang agi na junga anebtsüogo.”

⁴³Aser idangyongjisa pai angu, aser Tsüngrem tenüng sanga pa sülen anitak. Aser nisung ajaki pa ngua Tsüngrem tenüng asang.