Read njo LUK 19 Bible Online

LUK 19 - njo bible

LUK 19

¹Aser pai Yerikoi ai aser aji süia oya liasü.

²Aser ajiang, nisung ka tenüng agi Zakia ta ajaba yangji liasü, shiba alimelen sarur ka aser takar ka liasü.

³Aser pai Yisu shiba ta reprangtsü bushi; saka pa tar tatsü asünung telokti aliba agi pai reprangtsü mokoki liasü.

⁴Anungji pai tejakleni asema ao aser Yisu reprangtsü asoshi mungudong kati atu; kechiaser Yisu ilen jagi aotsü liasü.

⁵Kodang Yisu ajagi aru, pai azüklen repranga pa dang ashi, “Zakia, yakta alung kechiaser tanü ni ner kidang anentsü.”

⁶Anungji pai ilunga alu aser pelashishia Yisu aniket.

⁷Kodang parnoki ya angu, ajaki nemnemtepa ashi. “Pa temenenpur ka kidang anentsü iogo.”

⁸Aser Zakiai noktaka Kibuba dang ashi, “Ajiang, Kibuba, kü rongsen tesadang ka sensaker nem ni agütsüdi, aser ni tai agi kar ket nungi langka agizüka lira, pa nem pezüsü agi tali ni shia agütsütsü.”

⁹Idangji Yisui pa dang ashi, “Tanü iba kidangi tekümtet arua lir kechiaser pa-a Abraham chir.

¹⁰ Kechiaser Nisung Chir samaba bushitsü aser kümzüktsü aru.”

¹¹ Aser parnoki ya angashidang, pai o-entepba ka ashitsü tenzük; kechiaser pa Yirusalem anasa liasü; aser Tsüngrem Yimliji idangjisa adoktsü ta parnoki bilem,

¹²anungji pai ashi. “Tamarener nisung kati pei asoshi yimli ka agizüker meyipa arutsü asoshi linük talang kati ao.

¹³Aser pai pei kilirtem ter, parnok nem sen kaka agütsü aser parnok dang ashi, ‘Item yagi ni maru ashi shishia atang.’

¹⁴Saka par linük sensopurtemi pa sempa aser pa sülen o tongtar ka yoka ashi, ‘Onok madak iba nisung yagi yimsü mesüdaktsünür.’

¹⁵“Yimliji agizüker kodang pa meyipa aru, item kilirtem shirnok nem pai sen agütsü, parnoki shishiba ajanga kechi tajangzük angu aji pai metettsüsa pa madangi parnok jar arutsü pai ashi.

¹⁶Aser mezüngbubaji pa madangi aru aser ashi ‘Kibur, ne sen to agi ni talila ter ajangzüktsüogo.’

¹⁷Aser Kiburi pa dang ashi, ‘Lanlia, kilir tajung, kechiaser na tila ka nung temulung lemteta lia aruogo, na yimti ter madak tashi akatsü.’

¹⁸Tanabubaji arua ashi, ‘Kibur, ne sen to agi ni pungu tali ajangzüktsüogo.’

¹⁹Aser Kiburi pa dang ashi, ‘Na-a yimti pungu madak tashi akatsü.’

²⁰Ano tasembubaji arua ashi, ‘Kibuba, ajiang, ne sen to ni sü nung aleper ayu, aji ya;

²¹kechiaser na tetokdak nisung asünung ni na tsübu. Nai koba ne meyong masü aji agir aser nai koba nung maten aji arur.’

²²Kiburi pa dang ashi, ‘Ne bang o nungi ni ne o bendangdi, na kilir tamajung, ni tetokdak nisung ta, aser kechi kü meyong masü aji ni agir ta, aser kechi ni meprok aji ni arur ta nai metet.

²³Ni arudang ni aji tetemlok keter angutsüsa ajangla kechiba nai kü senji sen amshir ket nung meyutsü?’

²⁴Aser anasa noktakertem dang pai ashi, ‘Pa nungi senji bener oang aser sen ter akaba nem agüjang.’

²⁵Parnoki pa dang ashi, ‘Kibur, pa sen ter kar!’

²⁶Pai ashi, ‘Ni nenok dang shidi, shiba aka pa nem tali agütsütsü, saka shiba maka pa kechisa aka ajia pa nungi bener aotsü.’

²⁷Saka parnok madak ni yimsü mesüdaktsünüba kü tsükchirtemji yangi anir arung aser kü madang parnokji tepsetang.”

²⁸Aser ya shir külen, pai tejakleni oa, Yirusalemi tuya liasü.

²⁹Kodang Oliv tenem ta ajaba nung Bethfage aser Bethani anasa pai aru, pai nütsüng ana yoka ashi,

³⁰“Nenok jakdang aliba yim jagi oang, yangji nenoki aidang gado chanu ka sentaka angutsü, koba nung nisungi ano kodanga memendang, aji sala-ang aser yagi anir arung.

³¹Aser nenok dang ya kechiba salar ta kari asüngdangra, nenoki yamai shiang, ‘Kibuba asoshi ya tenüngdaktsü.’ ”

³²Aser parnoki ao aser parnok dang ashiba ama angu.

³³Aser parnoki gado chanuji salaya alidang, iba kiburi parnok dang ashi, “Kechiba nenoki gado chanuji salar?”

³⁴Aser parnoki ashi, “Kibuba asoshi ya tenüngdaktsü.”

³⁵Aser parnoki aji Yisu dangi anir aru, aser parnoki sü amungloktsü aser idakji Yisu mendaktsü.

³⁶Aser pa gado rongdong nung sanger aodang parnoki lenmang nung sü lemtsü.

³⁷Aser tang Oliv tenem tsüng anasa arudang nütsüngtem telok ajonga jagi parnoki anguba tesüngmangtsü mapatem indang pelateptsü aser Tsüngrem tenüng asangtsü apusoa ashi,

³⁸“Kibuba tenüng nung shiba arur, iba Chubaji temoatsüba lir! Kotak nung tesünep aser tematiba nung Tsüngrem dang sentsüwangshi!”

³⁹Aser telok rongnungji Farisitem kari ashi. “Tesayur, ne nütsüngtem mokorai lidakjang!”

⁴⁰Aser pai langzü, “Ni nenok dang shidi, itemi mokorai lira, lungtem jagi ayimtentsü!”

⁴¹Aser pai kodang anasai aru pai aji ngua iba asoshi ajeb.

⁴²Aser ashi, “Tesünep adokdaktsütsü asoshi kechi nüngdak aji tanüa nai metetla sang! Saka tang ne tenük nungi itemji nembanga lir!

⁴³Kechiaser ne dangi anogotem arutsü, kodang ne tsükchirtemi na meketbanga ali jara yanglutsü aser ajaklen na shibangtsü.

⁴⁴Aser parnoki na aser ne den aliba nüburtem ajonga ali nung laodakja samatsütsü. Aser parnoki idaki lung ka manung lung ka danga anünga metoktsütsü: Kechiaser nai na semdangi aruba mapangji memetet.”

⁴⁵Aser pai tenla kidangi atu aser tayokertem kimai arizüka yokmesoa,

⁴⁶parnok dang ashi, “Ya zülua lir, kü kiji sarasademba ki ta ajatsü; saka nenoki rakzükraktemer leprungki kümdaktsüogo.”

⁴⁷Aser pai anogo shia tenla kidang sayua liasü, saka putiungertemi aser ozüng sayurtemi aser nisungtem rongnung tongtibangtemi paji samatsütsü bushi.

⁴⁸Saka parnoki inyaktettsüsa parnoki kecha mungutet, kechiaser nisung ajaki pai sayuba nung ojang ka danga mezüdoki jangra-a anga.