Read njo LUK 2 Bible Online

LUK 2 - njo bible

LUK 2

¹Item anogo nungji alima ajak nung tenüng zülutsüla ta Kaisar Augusta nungi ozüng ka sangdong.

²Aji Kurini Siria lima nung governor alidang mezüng nütsüng yongsük zülutenba liasü.

³Aser nisung ajak pei tenüng zülutsü pei yimti-i ao.

⁴Yosefa Galil nung aliba Nazaret yimti nungi Yihuda nung aliba Bethlehem ta ajaba Dawid yimti-i ao, kechiaser pa Dawid kidong nungi liasü.

⁵Pai aniasünga aliba Mari, shiba temang mazüngi liasü, la den tenüng zülutsü asoshi ao.

⁶Parnok yangji alidang, la nu amungtsü mapang tonga aru.

⁷Lai pei mezüng jabaso aso aser kinü sü agi meia tsük mejakdak su ka nung ayu. Kechiaser parnok asoshi tanendakji taktang mali asü.

⁸Aser iba linük nungji sannükertem moapu nung aonung pei san telok nükya liasü.

⁹Kibuba kotak tenyar ka parnok dangi jungkai adok; aser Kibuba sentsüwangshi parnok meketa yalok. Aser parnok tetsübu agi asüng.

¹⁰Aser tenyar jagi parnok dang ashi, “Tetsübu kechiaser ajiang, ni nenok dangi tepelatsü osangtajung tulu bener arutsür.

¹¹Kechiaser tanü nenok nem Dawid yimti nung Kümtetdakba ka soja lir, paji Kibuba Khrista lir.

¹²Aser nenok dang temaitsüji ya alitsü: nenoki tanur ka kinü sü agi meir tsük mejakdak su nung mejanga angutsü.”

¹³Aser aoksa tenyar denji kotaker telok nungi jenti adoka Tsüngrem tenüng sanga ashi,

¹⁴“Tematiba nung aliba Tsüngrem dang sentsüwangshi, aser alima nung pa temulung achiba nisungtem rongnung tesünep.”

¹⁵Kodang tenyartemji parnok nungi pila-a kotaki atu, sannükertemi kati ka den jembitepa ashi, “Kechi Kibubai asenok dang metetdaktsü aser kechi atalok, tang asenoki Bethlehemi oa aji reprangdangdi.”

¹⁶Aser parnoki ilunga ao, aser Mari o Yosef na den kinü tanurji tsük mejakdak su nung mejanga angu.

¹⁷Kodang parnoki aji angu, iba tanur indang parnok dang ashibaji metetdaktsü.

¹⁸Aji angashir ajaki parnok dang sannükertemi ashiba indang süngmang.

¹⁹Saka Maribo item tatalokbatem ajakji pei mulung nung rizünga yua item indang shisadanga liasü.

²⁰Aser parnok dang ashiba amato sannükertem jagi angashiba aser anguba ajak asoshi parnoki Tsüngrem tenüng sanga aser pa sentsüwangshidakja meyipa aru.

²¹ Aser tinü buba nung kodang pa mejeptoktsü; la nu menden nung pa metanglok dang tenyari tenüng agütsüba ama, pa tenüng Yisu ta aja.

²²Mosa Ozüng amato parnok meshitettsü anogo abensadang, Kibuba nem bendanga agütsütsü asoshi parnoki Yisu Yirusalemi anir aru.

²³Kechiaser Kibuba ozüng nung zülua aliba amato, “Mezüng asoba jabaso shiaji Kibuba madang temeshi ta ajatsü.”

²⁴Tenlatsü asoshi Kibuba ozüng nung aliba amato, guduru chanu ana parnoki tenla.

²⁵Tang Yirusalem nung Simon ta ajaba temeshi aser bendanga agütsüba nisung ka liasü. Aser Israel süneptsüba asoshi pai ata-a liasü; Tanela Temeshi pa madak liasü.

²⁶Pai Kibuba meyong Khristaji mangu tashi tasüba mangutsüla ta Tanela Temeshi agi pa dang jungkai adoka liasü.

²⁷Tanela nung pai tenla kidangi atu. Kodang tsüraburi ozüng nung aliba ama benshitsü Yisu anir aru,

²⁸Simoni paji ajungzük aser Tsüngrem dang moaja ashi;

²⁹“Tang, Kibuba, ne o amato nai ne tenzüker tesünep nung piladakjangma.

³⁰Kechiaser kü tenüki ne tekümtet nguogo;

³¹Koba nai nüburtem ajak asoshi renemogo.”

³² Oda Bendangertem dangi tesangwa ka jungkai adokba aser ne nübur Israel dangi sentsüwangshi asoshi.

³³Aser pa tebu aser pa tetsü pa indang jembiba nung süngmanga liasü.

³⁴Idangji Simoni parnok moatsü aser tetsü Mari dang ashi, “Ajiang, temulung aika nungi tebilemba jungkai adoktsü asoshi, Israel pur rongnung aika laoba mesotsü asoshi aser temaitsü koba anema o jembitsü, aji asoshi iba tanur shimteta lir.

³⁵Aser nok ka agi ne tanela ateta atsüngtsü.”

³⁶Asher kin nungi Fanuel jala rongnung ka ainkarla tenüng agi Ana ta ajaba ka liasü. La kanga tantsür liasü aser la aiwa mapang nungi tenzüka pei kinungpu den küm tenet lir külen;

³⁷aser la küm tir-pezü tashi amia liasü. Lai lumia mepishiba agi anüngdang aser aonung oda anogoshia külema tenla kidang nungi mepila.

³⁸Iba mapang nungjisa tua lai Tsüngrem nem tenüngsang agütsü, aser Yirusalem tekümtet asoshi atartem ajak dang pa indang jembi.

³⁹Kodang Kibuba ozüng amato parnoki ajak renem, parnoki Galil nung aliba pei yimti Nazareti meyipa shilang.

⁴⁰Aser tanurji ain aser tashi ita aküm, aser pa shisatsü agi sünga, aser Tsüngrem taochi pa madak liasü.

⁴¹Pa Tsüraburi küm shia Kümtettsü Benjong nung adentsü parnoki Yirusalemi atu.

⁴²Kodang pa küm terana tain liasü, Benjong yimsü amato parnoki Yirusalemi atu;

⁴³aser kodang Benjongji atem, parnok meyipa shilangdang, tanur Yisuji Yirusalem nung ata-a liasü, aser pa tsüraburi aji memeteti liasü.

⁴⁴Saka par medemer den alitsü ta bilema, parnoki kenü anogo lenmang oadok. Idangji parnoki paji parnok kinungertem aser medemertem rongnung bushi.

⁴⁵Saka kodang parnoki pa mangu, parnoki pa bushia Yirusalemi aru.

⁴⁶Anogo asem süir külen, parnoki pa tenla kidang tesayurtem rongnung o anga-a aser tasüngdangbatem asüngdanga mena angu;

⁴⁷aser pa o angashir ajaki pa tangatetba aser telangzübatemji ngua süngmang.

⁴⁸Kodang parnoki pa angu, parnoki süngmang, aser tetsüi pa dang ashi, “Tebusang, kechiba nai onok dang yamai benshir? Ajiang, nebu künabo temulung makai na bushir?”

⁴⁹Pai parnok dang ashi, “Nenoki kechiba ni bushia liasü? Ni kü Bu kidang alitsüla ta nenoki memetet no?”

⁵⁰Saka pai parnok dang ashibaji parnoki mangatet.

⁵¹Aser pai parnok den Nazareti aru, aser idakji pai parnok dang tashi anga-a liasü, aser item ajak tetsüi pei mulung nung yua liasü.

⁵²Aser Yisu shisatsü nung, temang nung, Tsüngrem aser nisung matsüngdang taochi nung ain.