Read njo LUK 20 Bible Online

LUK 20 - njo bible

LUK 20

¹Kenü anogo pai tenla kidang nisungtem dang osangtajungji sayutsüngia aser sayua alidang, tamburtem den puti ungertem aser ozüng sayurtem pa dangi aru,

²aser pa dang asüngdanga ashi, “Onok dang shiang; kechi ain agi nai itemi inyaker? Mesüra ne nem iba ain agütsüba ya shiba?”

³Aser pai parnok dang langzü, “Nia nenok dang o ka asüngdangdi, tang kü dang shiang;

⁴Yohan Baptitsüba kotak nungi asü mesüra nisung nungi?”

⁵Parnoki parnok rongnung ashishitepa ashi. “Kotak nungi ta asenoki shira, kechiba nenoki pa dang mamang ta pai ashitsü.

⁶Ano nisung nungi ta asenoki shira, nisung ajaki asenok dak lung agi aontsü, kechiaser Yohanji ainkar ka ta parnoki amanger.”

⁷Anungji parnoki langzü, “Paji kong nungiar onoki memetet.”

⁸Aser Yisui parnok dang ashi, “Kechi ain agi ni itemi inyaker nia nenok dang meshili.”

⁹Aser nisung kar shirnoki pei sasa temeshi ta züngshia pei sasa dak tamang ayur aser tangar sensatsür parnok dang o-entepba pai ashi.

¹⁰Aser mapang tatong nung aluyimertemi pa nem tsükmenatzü lu süngjang aongtsü asoshi pai parnok dangi kilir ka yok; saka aluyimertemi pa dak azük aser paji teka tazüng yok.

¹¹Aser ano pai tangar kilir ka yok, aser parnoki pa daka azük aser pa dak maksüa benshir teka tazüng yok

¹²Ano pai tasembenbuba-a yok saka parnoki pa-a yirutsü aser aridok.

¹³Aser tsükmenatzü lu kibubai ashi, ‘Ni kechi inyaktsü? Ni kü temeimba jabaso yoktsü, ashiko parnoki pa dangbo akhüm tsübutsü.’

¹⁴Saka kodang aluyimertemi paji angu parnoki jembitepa ashi, ‘Ibai senmangbaji lir; asenoki pa tepsetdi aser senmangji asenok meyong akümtsü.’

¹⁵Parnoki paji tsükmenatzü lu nungi meindok aser paji tepset. Anungji tsükmenatzü lu kiburi parnok dang kechi inyaktsü?

¹⁶Pai arutsü aser item aluyimertem samatsütsü aser tsükmenatzü luji tangar nem yimdaktsütsü.” Aser kodang parnoki aji angashi parnoki ashi, “Tsüngremi aji songtemangma.”

¹⁷ Saka pai parnok dak repranga ashi, “Ajangla zülua aliba o ya kechi? ‘Kisürtemi koba lung magi aji kinük nung tongtiba aküm.’

¹⁸“Iba lung manungji shiba tsükdir pa anüka ajensatsütsü; aser shiba dak iba lung tsükdir, iba jagi pa auyi küma akusatsütsü.”

¹⁹Aser iba mapang nungjisa ozüng sayurtem aser puti ungertemi pa dak teka aitsü asoshi merang; saka parnoki nisungtem tsübu, kechiaser o-entepbaji pai parnok anema jembi ta parnoki metet.

²⁰Aser governor yimsüsüba aser bangdak tashi nem paji bendanga agütsütsü asoshi pai jembiba nungi langka tai aputsü asoshi temeshi ama sayua itdangitertem parnoki yok aser paji mita ata.

²¹Aser parnoki pa dang asüngdang, “Nai shitak ashir aser sayur, aser shinga tejak merepranger saka ochi agi Tsüngrem lenmangji sayur ta onoki metet.

²²Onoki Kaisar nem alimelen agütsütsü tim asü masü?”

²³Saka pai parnok külakba meteta parnok dang ashi,

²⁴“Kü dang adholi ka sayuang. Ya shiba noksa aser shiba tenüng züluba?” Aser parnoki langzü, “Kaisar”

²⁵Anungji pai parnok dang ashi, “Ajangla kechi Kaisar meyong aji Kaisar nem agüjang aser kechi Tsüngrem meyong aji Tsüngrem nem agüjang.”

²⁶Aser parnoki nisungtem tsüngdang pai ashiba nungi langka tai ajiteta pa aputsü mokoki liasü aser pai langzüba nungji parnoki süngmang aser ola madok.

²⁷Aser tasürtem shia marutsü ta jembiba Sadukitem kar pa dangi aru,

²⁸aser parnoki pa dang asüngdang, “Tesayur, nisung ka kinungtsü toktsür techir meli-i süadokra, pa tenui kinungtsüji agitsüla aser pa tedi asoshi metsü adokdaktsütsüla ta Mosai onok nem zülua toktsü.

²⁹Tang adianu tenet liasü. Mezüngbubai kinungtsü ka agi aser techir meli-i süadok;

³⁰aser tanabuba aser tasembubai la agi,

³¹yamaji tenetpronglai techir metoktsüi asü.

³²Aser tesülen tetsürlajia asü.

³³Anungji tasürtem shia aruba mapang nung laji shiba kinungtsü asütsü? Kechiaser parnok tenetpronglai laji kinungtsü asütsü agi.”

³⁴Aser Yisui parnok dang ashi, “Iba lima chirtemi ki ayimer aser kiyi-i aor;

³⁵saka parnok shir kotak lima aser shia aruba ngutettsüsa temsüa lir parnokji ki mayimer aser kiyi-i meyoker.

³⁶Aser parnok asütsü makok, kechiaser parnok kotak tenyartem den kasa, aser tasü nungi shia aruba chirtem asünung, parnok Tsüngrem chirtem lir.

³⁷ Aser süngsem indang Lai nungto kong Mosai Kibuba dang Abraham Tsüngrem, Isak Tsüngrem aser Yakob Tsüngrem ta aja, iba jagi tasürtem shia arubaji lir ta sayur.”

³⁸Anungji pa tasürtem Tsüngrem masü, saka akümlirtem Tsüngrem; kechiaser ajak pa ajanga taküm alir.”

³⁹Aser ozüng sayurtem kari langzü, “Tesayur, nai junga shiogo.”

⁴⁰Joko parnoki pa dang tasüngdangba tali asüngdangtsü kecha temulung moulutet.

⁴¹Saka pai parnok dang ashi, “Khristaji Dawid chir ta parnoki koda ashir?

⁴²Kechiaser Dawidi pei sasa Tenüngsang Ken kaket nung ashi, ‘Kibubai kü Kibuba dang ashi, ni ne tsükchir ne tsüng kübok mayu tashi

⁴³ na kü tajichilen menang.’

⁴⁴Anungji Dawidi pa dang Kibuba ta jara, ajangla Khristaji koda Dawid chir asütsü?”

⁴⁵Aser nisung ajaki angashia pai nütsüngtem dang ashi,

⁴⁶“Tezülurtem asoshi kümdangang; shiri sü talanglang abener jajanür, aser shishidak salem aginür aser sinagog nung temaba menden aginür; aser yimpoksüdak tamaren menden aginür;

⁴⁷Shiri amitsür ki chimar, aser anemsü agi talanglang sarasademer; parnoki tai tuluba angutsü.”