Read njo LUK 21 Bible Online

LUK 21 - njo bible

LUK 21

¹Pai reprangketa yok aser takartemi parnok sempet sen tenla sen rizüngdak enokya angu;

²aser sensaker amitsür kati idakji poisa ana enoktsüba pai angu.

³Aser pai ashi, “Atangji ni nenok dang shidi, ajak dang tali iba sensaker amitsüri enoktsüogo;

⁴kechiaser parnok ajaki parnok rongsen moshia akaba nungi tenla sen rizüngdak enoktsü, saka lai la sensakba nungi la taküm asoshi akaba ajak enoktsü.”

⁵Aser kari tenla ki indang, ya koda tajinütsü lung aser tenlatem agi tobur junga yanglu ta jembidang, pai ashi,

⁶“Nenoki kechi jembir item asoshi anogotem arutsü, kodang lung ka manung ka melokshi-i yangi anünga malitsü.”

⁷Aser parnoki pa dang asüngdang, “Tesayur, süra itemi kodang ataloktsü? Aser kodang ya ataloktsü mapang anasa aitdir temaitsüji kechi alitsü?”

⁸Pai ashi, “Nenok mashileni anir moudaktsütsü kümdangang kechiaser aikati kü nüng nung arua, ‘Ni paji’ aser ‘mapang tongogo’ ta ashitsü! Parnok sülenji tanitakma,

⁹Kodang nenoki raraba aser rongrongba osang angashidir, tsübua telima, kechiaser itemi tamasa ataloktsüla; saka tatemji idangjibo masütsü.”

¹⁰Idangji pai parnok dang ashi, “Kini kin anema aser yimli-i yimli anema apusotsü.

¹¹Aser menoknok tulu aser tesem tesem nung ayawara aser tashitak wara alitsü aser anüng nungi tetsübutsü aser temaitsü tulu adoktsü.

¹²Saka item ajak marudang kü nüng atema parnoki parnok teka nenok dak sotaktsü aser sinagogtem aser tepuokdak nung nenokji bendanga agüja rishikangshitsü.

¹³Idangji nenoki kuli agütsütsü mapang alitsü.

¹⁴Anungji nenoki koda langzütsü aji mapang matongdang yongi mebilemtsü lemtetang.

¹⁵Kechiaser nenok tsükchirtem ajaki makoktsüba aser melangzüktettsüba tebang aser shisatsü ni nenok nem agütsütsü.

¹⁶Saka nenok tsüraburtem aser adianutem aser kimangtem aser tembartem ajanga ang nenokji bendanga agütsütsü, aser nenok karbo parnoki südaktsütsü.

¹⁷Aser kü nüng atema ajaki nenok sempatsü.

¹⁸Saka nenok kolak nung aliba kujang kata mesamatsü.

¹⁹Nenok taremzükba ajanga nenoki nenok takümji ajangzüktettsü.

²⁰“Saka kodang Yirusalemji temerangertemi meketbanga nenoki ngudir, idangji iba teraksatsüba mapangji anasa ta metetang.

²¹Idangji Yihuda lima nung alirtem tenemi jenang, aser shirnok yimti tiyong nung ali parnoka pila-a oang, aser shirnok oagi yimtsüng nungji ali parnoki yimti jagi teyima.

²²Kechiaser zülua aliba ajak ataloktsü asoshi ya tayang küpzükba anogotem lir.

²³Iba tensa nung temang mazüngi alirtem aser mama yongdaktsürtem asoshi aiatai! Kechiaser alima nung timtem tulu aser iba nüburtem madak Tsüngrem terasaba tulu alitsü.

²⁴Aser parnok nok agi laotsü; aser parnokji pua kintem ajak dangi anir aotsü. Aser Bendangertem mapang matalok tashi parnoki Yirusalemji ajemshitsü.

²⁵“Aser anü, ita aser petinutem nung temaitsü alitsü alima nung kintemji tzüyim aser tzüsem arütepba ola agi tamataridaktsüba nungji tim atemtsü.

²⁶Nisungtemji tetsübu aser alima nung anendaka aliba tataloktsü jagi süchia aotsü, kechiaser anüng aintem anokshitsü.

²⁷Idangji parnoki Nisung Chir mepet nung ain aser sentsüwangshi tulu keter aruba angutsü.

²⁸Kodang itemji atalokmesodir, azüklen reprangang, aser nenok kolak roka tuang, kechiaser nenok tekümtet anasa aiter.”

²⁹Pai parnok dang o-entepba ka ashi, “Mungudong dak aser süngdongtem ajak ajiang,

³⁰parnok kodang süngo lanu adokdir, joko mei anasa lir ta nenoki meteter.

³¹Yamajisa kodang nenokia item ataloka aruba ngudir, Tsüngrem Yimli anasa lir ta metetang.

³²Ni nenok dang atangji shidi, ajak matalok tashi iba putu süia maotsü.

³³Anüng o ali na süitemtsü, saka kü o mesüitemtsü.

³⁴“Saka nenok sasa indang kümdangang, aji mesüra chidiyungdi aser yi mesepba aser iba taküm shisa bulu agi nenok temulung taret akümtsü, aser iba anogoji sang ka ama arutsü

³⁵Kechiaser yamaji alima ajak nung alir madangi arutsü.

³⁶Tataloktsü aliba item ajak nungi nenoki jenbutettsü aser Nisung Chir tsüngdang noktaktsü asoshi, nenoki mapang shia saksalema sarasademang.”

³⁷Aser anogo shia pai tenla kidang sayua liasü, aser aonung shia pai oa Oliv ta ajaba tenem nung ayip.

³⁸Aser anepungi nisung ajaki tenla kidangi pa o angatsü pa dangi aru.