Read njo LUK 22 Bible Online

LUK 22 - njo bible

LUK 22

¹Tang Kümtettsü Benjong ta ajaba piyazü meinokba amtsük benjongji anasa ait.

²Aser puti-ungertem aser tezülurtemi paji koda südaktsütsü ta bushi, kechiaser parnoki nisungtem tsübu.

³Idangji terana rongnungji ka, Iskariot Yihuda ta ajaba daki Satan ai;

⁴aser pai oa, puti-ungertem aser tirtem nem pa bendanga agütsütsü iba oji parnok den jembitep.

⁵Aser parnoki pela-a liasü aser pa nem sen agütsütsü nangzük.

⁶Aser Yihudai aji nangzük aser telokti-i memeteti parnok nem pa bendanga agütsütsü mapang tajung ka bushi.

⁷Aser piyazü meinokba amtsük benjong koba nung Kümtetba tenla tepsetsü tim, aji atong.

⁸Aser pai Peter aser Yohan yoka ashi, “Oang, aser asenok asoshi Kümtettsü Benjong achitsü renemang.”

⁹Aser parnoki pa dang ashi, “Nai onok nem ibaji kong renemdaktsünür?”

¹⁰Pai parnok dang ashi, “Ajiang, kodang nenoki yimti jagi idir, idakji nisung ka tzü mori bener nenok den ajuruteptsü. Pa atuba kidang jagi pa sülen oang.

¹¹Aser nenoki kibur dangji ashitsüla, ‘Tesayuri ne dang ashir, ni kü nütsüngtem den Kümtettsü Benjong achitsü aener taktangji kong ali?’

¹²Aser pai nenok dang temaba taktang tulu ka oset dena renemteter sayutsü, idakji renemang.”

¹³Parnoki oa pai parnok dang ashiba amaji angu; aser parnoki Kümtettsü Benjongji renem.

¹⁴Aser kodang mapangji atong pai langbang nungji amen aser tenyartemji pa den liasü.

¹⁵Aser pai parnok dang ashi, “Ni tim matemdang iba benjong ya nenok den chinü,

¹⁶kechiaser ni nenok dang shidi, Tsüngrem Yimli nung ibai matalok tashi ni ibai machitsü.”

¹⁷Aser pai marok ka bena aru, aser kodang pai Tsüngrem nem tenüngsang agütsü aser ashi, “Ibai agiang aser nenok rongnung lemsaang;

¹⁸kechiaser ni nenok dang shidi, tang nungi Tsüngrem Yimli maru tashi ni tsükmenatzü tzü majemtsü.”

¹⁹Aser pai amtsük bena aru aser tenüngsang agütsür külen pai aji sangsa aser parnok nem agütsü aser ashi, “Ibai nenok asoshi agütsüba kü mang. Ni bilemtettsü asoshi nenoki yamai benshiang.”

²⁰Aser benjong chir külenji aji odasa pai marok bena aru aser ashi, “Iba marok kü zü nung tasen tezüngzüktepba lir, koba nenok asoshi tokshir.

²¹Saka ajiang, ni ashioktsüba teka langbang nung kü den lir.

²²Kechiaser atemzüka aliba amato Nisung Chirji atangji asütsü, saka shiba ajanga paji ashioktsür iba nisung asoshibo aiatai!”

²³Aser parnok rongnung shibai ibaji inyaktsü ta parnok kati ka dang asüngdangteptsü tenzük.

²⁴Aser parnok rongnung shiba tulutiba asütsü ta parnoki toktep.

²⁵Aser pai parnok dang ashi, “Bendangertem chubatemi parnok madak kibur akümer, aser shirnok parnok madak tashi lir, parnokji teyarirtem ta ajar.

²⁶Saka nenokbo yamaji masü, oda nenok rongnung shiba tulutiba lir, paji tanubutiba ama aser shiba lenir lir, paji tenzüker ama kümang.

²⁷ Kechiaser chiyungdak amensang asü mesüra anganüsang tuluba? Chiyungdak amensang tuluba masü no? Saka nenok rongnung anganüsang ama ni lir.

²⁸“Saka kü timtem nung maneni alibaji nenok lir;

²⁹Aser nenoki kü Yimli nung chia ajemtsü

³⁰ aser nenoki Chuba menden nung mener Israel kidong teranaji o bendangtsü asoshi kü Bui Yimli ka kü nem atadaktsü yamaji ni nenok nem Yimli ka atadaktsür.

³¹“Simon, Simon, ajiang, satani nenok ajak tsük sepshiba ama septoktsü asoshi nenok agitsü akhang.

³²Saka ne tamang tamakok mangutsü asoshi ni sarasadem, aser na kodang temulung meyipdir nai ne adianutem tashi itdakjang.”

³³Aser pai pa dang ashi, “Kibuba, ni ne den tepuokdaki aotsü aser tasüba dangi aotsüa renema lir.”

³⁴Yisui langzü “Peter, ni ne dang shidi, nai ni memetet ta asemben menangzük tashi taonung ani makongtsü.”

³⁵Aser pai parnok dang ashi, “Kodang ni nenok sen juli, mesüra yangku mesüra tsüngsem mebeni yok, idangji nenok langka agi meperi ama?” Aser parnoki ashi, “Masü.”

³⁶Aser pai parnok dang ashi, “Saka tang shiba sen juli mesüra yangku aka itemji benang aser shiba nok maka, pai sü yokang aser nok ka aliang.

³⁷Kechiaser ni nenok dang shidi, kü indang zülua alibaji ataloktsü, aser ozüng raksartem den pa züngsem, kechiaser kü indang ashibaji ataloktsü.”

³⁸Aser parnoki ashi, “Kibuba, ajiang, yangi nok ana lir.” Aser pai parnok dang ashi, “Aji teperi.”

³⁹Aser pai adoka pa yimsü amato Oliv tenem leni ao; aser nütsüngtema pa sülen anitak.

⁴⁰Aser kodang pa iba jagi aru pai parnok dang ashi, “Nenok tatitang nung metsüktsü asoshi sarasademang.”

⁴¹Pai parnok nungi tatsüka pila-a ao, aser apudaka sarasadem,

⁴²“Oba, nai mulungra, iba marok ni nungi agienangma; aji saka kü mulung masü, ne mulung sang.”

⁴³Aser kotak nungi tenyar ka adoka pa tashi itdaktsü. Aser timtem kanga ali nung pai kanga sarasadem.

⁴⁴Aser pa asentzü azü ama jenzüka ali nung tsük.

⁴⁵Aser kodang pai sarasademba nungi shishi, pai nütsüngtem dangi aru aser parnok jashia mejanga angu.

⁴⁶Aser pai parnok dang ashi, “Kechiba nenoki mejanger? Shishiang aser nenok tatitang nung metsüktsü sarasademang.”

⁴⁷Pai jembia alidang telok ka aru aser Yihuda ta ajaba terana rongnungji ka pai parnok anir aru. Pai Yisu anasa oa pa dak tebang mesep;

⁴⁸Saka Yisui pa dang ashi, “Yihuda, tebang mesepba ka agi nai Nisung Chir ashioktsür ama?”

⁴⁹Aser kechi ataloktsü, aji pa meketa alirtemi angudang parnoki ashi, “Kibuba, onoki nok agi lepdi ni?”

⁵⁰Aser parnok rongnung kati temaba putir kilir ka dak lepoktsü aser pa tenarong tajichi leptoktsü.

⁵¹Saka Yisui ashi, “Nenoki joko ibai ojang dang benshiang.” Aser pa tenarong nungji kongshia pa anebtsü.

⁵²Idangji puti-ungertem, tenla kidang tirtem aser tamburtem dang Yisui ashi, “Rakzükraktemer ka anema arur ama nok aser süngsütem bener nenoki ni anema arur no?

⁵³ Kodang tenla kidang ni nenok den kenüamati liasü, idangji nenoki kü dak teka mai; Saka ya nenok mapang, aser tammang ain lir.”

⁵⁴Idangji parnoki pa apu aser temaba putir kidangi anir ao, Peteri aji ngua oji nungi anitak.

⁵⁵Kodang parnoki kima tiyong nung mi apu aser külemi amen, Peteri parnok rongnung amen.

⁵⁶Aser aiür kati pa mitsüng nung mena ngua pa dak rangketa repranga ashi, “Iba nisung ya pa den liasü.”

⁵⁷Saka pai menangzüki ashi. “Tetsür, ni pa memetet.”

⁵⁸Ano kenpiga lir külen tangar kati pa angu aser ashi, “Na-a parnok rongnung ka lir.” Saka Peteri langzü, “Nisung, ni masü.”

⁵⁹Aser mapang tatsüka lir külen tangar kati nenshia ashi. “Atangji iba nisung ya pa den liasü, kechiaser pa Galil nunger.”

⁶⁰Saka Peteri ashi, “Nisung nai kechi ashir aji ni memetet.” Aser ano pai jembia alidang, ani akong.

⁶¹Aser Kibubai meyiper Peter dak reprang. Aser taonung ani makongdang nai ni asemben tashi menangzüktsü ta Kibubai ashiba pai bilemtet.

⁶²Aser pai tatsüka pila-a ao aser kanga ajeb.

⁶³Aser Yisu dak ametertemi pa atala aser pa dak azük.

⁶⁴Aser parnoki pa tenük nembangtsü aser pa dang asüngdanga ashi, “Ne dak azükbaji shiba? Shibai ne dak azüker shiang.”

⁶⁵Aser tanga o aika agi parnoki pa anema atala-a jembi.

⁶⁶Aser anepdang kümli-i tamburtem mungdang nungji putiungertem o tezülurtem na sentep; aser parnoki pa parnok mungdangi anir arua ashi,

⁶⁷“Na Khristaji süra onok dang shiang.” Saka pai parnok dang ashi, “Ni nenok dang shira nenoki mamangtsü;

⁶⁸aser ni nenok dang asüngdangra nenoki melangzütsü.

⁶⁹Saka tang nungi Nisung chir Tsüngrem ain tajichilen mena alitsü.”

⁷⁰Aser parnok ajaki ashi, “Süra, na Tsüngrem Chir asü?” Aser pai parnok dang ashi, “Nenoki paji ni ta ashir.”

⁷¹Aser parnoki ashi, “Asenoki kechi kuli tali tenüngdaktsü aka! Kechiaser pa tebang ajanga asenoki tejangja angashiogo!”