Read njo LUK 23 Bible Online

LUK 23 - njo bible

LUK 23

¹Aser parnok telok ajak apusoa pa Pilat madangi anir aru.

²Aser parnoki pa aitsümesoa ashi, “Iba nisung yagi ozü kin mashilen odakja, aser Kaisar nem alimelen agütsütsü aliba nungtema aser pa sasa paji Khrista Chuba ta jembiba onoki angu.”

³Aser Pilati pa dang asüngdang, “Na Yihuda nunger Chubaji asü?” Aser pai langzü, “Nai aji oda ashir.”

⁴Aser Pilati puti-ungertem aser telok dang ashi, “Ni iba nisung dak tai kecha mangur.”

⁵Saka parnoki tali sashia ashi, “Pai Yihuda ajak nung aser Galil nungi tenzüka iba yimti tashi sayua nisungtem rongrongdaktsür.”

⁶Kodang Pilati ya angashi, iba nisungji Galil nunger asü ta asüngdang.

⁷Aser kodang pai paji Herod yimsüsüdak aliba ta metet, pai paji Herod dangi yok, kechiaser iba mapang nungji pa Yirusalem nung liasü.

⁸Kodang Herodi Yisu angu, pai kanga pela-a liasü, kechiaser pai Yisu indang angashia mapang talangka nungi pa ngunüa liasü; aser pai Yisu nungi temaitsü kar angutsü imla.

⁹Aser pai Yisu dang o aika asüngdang, saka Yisui pa dang kecha melangzü.

¹⁰Aser puti-ungertem aser tezülurtemi anasa arua noktaka ain adoka Yisuji aitsü.

¹¹Herod aser pa temerangertemi pa dang mezüng meshia atala-a benshir külen pa nem sentsüprang sobutsü sobutsür Pilat dangi pa meyipa yok.

¹²Aser iba anogo nungjisa Herod o Pilat na tembar kümtet, kechiaser iba tejaklenjibo parnok kati ka den tsükchitepa liasü.

¹³Idangji Pilati puti-ungertem aser yimsüsürtem aser nisungtemji külemi jatep aser parnok dang ashi,

¹⁴“Iba nisungi nisungtem mashileni odaktsür ka ama nenoki kü dangi anir arur, saka ajiang, nenok madang ni pa atitanger külen nenoki pa aitsüba indang pa dak tai kecha ni mangu,

¹⁵mesüra ano Herodia mangu, kechiaser pai pa asenok dangi yoka lir. Anungji tasütsü langa pai tai kecha meinyak;

¹⁶anungji ni pa dak repa-züker paji chiokdi.”

¹⁷Tang benjong mapang nung pai parnok nem puoka alir ka chioktsüla.

¹⁸Saka parnok ajaki ayimtena ashi, “Iba nisung tepsetang, aser onok dangi Baraba chiokang.”

¹⁹Paji yimti nung yim anema keptepba aser nisung tepsetba asoshi tepuokdak yua liasü.

²⁰Aser Pilati tanaben Yisuji chioknüa parnok den jembi.

²¹Saka parnoki ayimtena ashi, “Angenlokang, pa kangki nung angenlokang.”

²²Tasembenbuba pai parnok dang ashi, “Kechiba, iba nisungi kechi tamajung inyak? Pa dak tasütsüsa langa ashikülaka tamajung ni kecha mangur, anungji ni pa dak züka chiokdi.”

²³Saka parnoki ola tulu agi ayimtena pa kangki nung angenlokang ta ashi. Aser parnoki ayimtenba ola jagi koktet.

²⁴Yamaji parnoki kechi mepishi aji inyaktsü asoshi Pilati mela.

²⁵Aser yimti anema keptepba aser nisung tepsetba asoshi tepuokdak puoka aliba shiba parnoki khangzük, Pilati paji chiok, saka parnoki mulungba ama pai parnok nem Yisu bendanga agütsü.

²⁶Aser kodang parnoki pa anir ao, Kurini nunger nisung ka tenüng agi Simon yimti-i aruya liasü; parnoki paji atsüa aru aser pa dak kangkiji apuloktsü aser Yisu sülen aji bendaktsü.

²⁷Aser telok jenti pa sülen anitak aser tetsürtemi pa atema mang yima anitak.

²⁸Saka Yisui meyiper parnok dang ashi, “Yirusalem jalatem, ni asoshi tejeb saka nenok aser nenok chirnurtem asoshi jebang.

²⁹Kechiaser ajiang, anogotem arudagi, koba nung parnoki ashitsü, ‘Tapunglatem aser kodanga tanur masortem aser kodanga mama meyongdaktsürtem temoatsü.’

³⁰Idangji parnoki tenemtem dang shia tenzüktsü. ‘Onok dak tsükang;’ aser tokongtem dang ashitsü, ‘Onok nembangang.’

³¹Kechiaser parnoki süngdong tajem dak ya inyakra, süngdong taro nung kechi inyaktsü?”

³²Aser tamajung benshiba tangar nisung ana pa den südaktsütsü asoshi anir aru.

³³Aser kodang parnoki Tekolak Ret ta ajaba linük jagi aru, idakji parnoki pa kangki nung angenlok, aser tamajung inyakba nisung ka pa tajichilen aser ka tabelen ta kangki nung angenlok.

³⁴Aser Yisui ashi, “Oba, parnok dang tai tokang, kechiaser parnoki kechi inyaker aji parnoki memetet.” Idangji parnoki an toktanga pa süoshi parnok rongnung lemsa.

³⁵Aser nisungtemi anasa noktaker repranga liasü, saka yimsüsürtemi pa atala-a ashi, “Pai tangarbo kümzük; pa Tsüngremer Khrista, Teshimtetsangji süra, pai pei sasa kümzükang!”

³⁶Aser temerangertemia pa dangi arua tasentzü agütsü aser pa atala-a ashi,

³⁷“Na Yihuda nunger Chubaji süra, ne sasa kümzükang.”

³⁸Aser pa kolaklenji iba tezüluba ya liasü. “IBAI YIHUDA NUNGER CHUBAJI lir.”

³⁹Aser tamajung inyaker rongnung ka shiba pa den külemi meta, pai pa dak sensaja ashi, “Na Khristaji masü no? Ne sasa aser onok kümzükang.”

⁴⁰Saka tangar ka jagi paji arüja ashi, “Asenok temerenshi kasa angur sür nung nai Tsüngrem metsübur no?

⁴¹Aser asenbo ya atangji tim dang; kechiaser asenbo asen yari tajangzük ngudagi; saka iba nisung yagi kecha tai meinyak.”

⁴²Aser pai ashi, “Yisu na kodang ne Chuba yimli ain nung arudir, ni bilemtetangma.”

⁴³Aser pai pa dang langzü, “Atangji ni ne dang shidi, tanüsa na kü den Paradise nung alitsü.”

⁴⁴Ibai terana baji shi liasü, aser asem baji tashi alima ajonga nung tesangwa madoki mangadok.

⁴⁵Aser anüi pei tesangwa magütsüi aküm aser tenla kidang teyindangba sü tiyongi shimadok.

⁴⁶Aser Yisui ola tulu agi ayimtena ashi. “Oba ne ket nung ni kü nela bendanga agütsür.” Aser aji shir külen pai pei taküm bendanga agütsü.

⁴⁷Aser kechi atalok aji kodang noklang madak kiburi angu, pai Tsüngrem tenüng sanga ashi. “Atangji iba nisung temeshi liasü.”

⁴⁸Aser tatalokbaji reprangtsü sentepba telok jagi kechi atalok aji angudang parnok ajaki pei teku nung tsünga kidangi meyipa ao.

⁴⁹ Aser pa den metetteper ajak aser Galil nungi pa sülen anitakba tetsürtemi oji nungi itemji repranga noktak.

⁵⁰Tang Yihuda nunger yimti Arimathia nungi nisung ka tenüng agi Yosef liasü, paji yimsüsüba mungdang züngsem ka temeshi aser nisung tajung liasü.

⁵¹Shibai parnok nükjidong aser mapa nungji aura maka, aser Tsüngrem Yimli arubaji repranga liasü,

⁵²iba nisung jagi Pilat dangi oa Yisu mang meshi.

⁵³Aser pai aji ajungzüka sü tanük ka agi mei, aser lung nung angenpoka aliba leper koba nung nisung kodanga meyudang iba nungji ayu.

⁵⁴Ibaji terenemba anogo aser amungnüji anasa aita liasü.

⁵⁵Aser Galil nungi pa den aruba tetsürtemi tesülen anitak, aser leperji aser pa mangji koda yua liasü itemji parnoki angu.

⁵⁶ Aser parnoki meyipa aru, aser teronem menemba aser temezütsüba pa mang asoshi renem. Aser amungnü ozüng amato parnoki anisüngzük.