Read njo LUK 24 Bible Online

LUK 24 - njo bible

LUK 24

¹Saka deobar anepungi parnoki teronem menembaji bener parnoki leper jagi aru.

²Aser parnoki lungji leper nungjagi mekeptoker angu,

³saka kodang parnoki ajagi ai parnoki Kibuba temangji mangu.

⁴Iba indang parnok rata-mata alidang, ajiang, nisung ana sentsüprang sü abener parnok anasa noktak.

⁵Aser parnoki tsübuadok aser parnok tejak ali nung apudaka alidang nisungtem jagi parnok dang ashi, “Kechiba nenoki takümji tasür rongnung bushir? Pa yangi mali, saka shia aruogo.

⁶Pa kodang Galil nung liasü, pai nenok dang koda jembi ibaji bilemtetang.

⁷‘Nisung Chirji menenpurtem ket nung bendanga agütsütsü aser kangki nung angenloktsüla aser asemnübuba nung shia arutsüla’ ta pai shiogo.”

⁸Aser parnoki pa otem bilemtet,

⁹idangji parnoki leper nungi meyipa aru aser ya ajak terka aser tanüngba ajak dang ashi.

¹⁰Aser parnokji Mari Magdalin, Yoana, aser Yakob tetsü Mari liasü; aser parnok den tangar tetsürtemi tenyartem dang itemi ashi.

¹¹Saka item o ajak nütsüngtem atema amajok osang ama aküm, kechiaser parnoki tetsürtemi ashiba o dakji mamang.

¹²Saka Peteri aramesoa leper jagi asem aser pai mokrema lur telunglenji ajidang nung pai sü tanükji dang balaka nung angu aser kechi atalok ta pai süngmanga kidangi aru.

¹³Iba anogo nungji parnok rongnung nisung ana Yirusalem nungi mile tenet shi oa yim ka tenüng agi Emmai oya liasü.

¹⁴Aser kechisa atalok item ajak indang tena jembitepa liasü.

¹⁵Tenati külemi asüngdangtepa jembidang, Yisua parnok anasai aru, aser parnok den ao.

¹⁶Saka paji meshitettsüsa parnok tenük chilar liasü.

¹⁷Aser pai parnok dang ashi, “Nena jajadang jembitepba o to kechi?” Aser tejak mekümer parnoki ajemajema noktak.

¹⁸Aser tena rongnung nisung ka tenüng agi Kleopai langzü, “Yirusalem nung munger idakji item anogo nungji kechi atalok nai dang memetet no?”

¹⁹Aser pai parnok dang ashi, “Kechi ama?” Aser parnoki pa dang ashi, “Nazaret nunger Yisu indang, shiba o aser mapa nung Tsüngrem aser nisung ajak madang tashi aitba ainkar ka liasü.

²⁰Asenok putiungertem aser yimsüsürtemi pa südaktsütsü aija bendanga agütsü, aser pa kangki nung angenlok.

²¹Saka paji Israel Kümtettsüsang ta onoki imla-a liasü. Hau, ya ajak alema, item ataloker tanü agi anogo asemnübuba lir.

²²Ano onok medemer tetsürtem kari onok süngmangdaktsü, parnokji anepungi leper nung liasü,

²³aser parnoki pa temang mangu; aser parnoki kotak tenyartem adoka angu ta arua shia liasü; aser kotak tenyartemi pa taküm lir ta ashi.

²⁴Onok den alir kari leperi oa tetsürtemi ashiba amaji angu, saka parnoki pa mangu.”

²⁵Aser pai parnok dang ashi, “Oh tamashi purtem, aser ainkartemi ashiba ajak temulung nung meilungi amangtsüba purtem!

²⁶Khristaji pei sentsüwangshi daki aitsü atema pai item timtem tekangshi abentsü tenüngdaktsü masü ama?”

²⁷Aser Mosa aser ainkartem ajak nungi tenzüka pa indang zülubatemji pai parnok dang rateta sayu.

²⁸Aser parnoki aoba yimji anasa atong; aser ano pabo talangba aotsü amai liasü.

²⁹Saka parnoki pa ajungshia ashi, “Onok den ata-a liang, kechiaser anü talangka luogo aser nikongtsütsü lir.” Aser pai parnok den anentsü atu.

³⁰Kodang pai parnok den chiyungtsü amen, pai amtsük bena aru aser moatsü, aser aji sangsa aser parnok nem agütsü.

³¹Idangji parnok tenük lapokadok aser parnoki paji shiteta aküm; aser parnoki paji mungui samadok.

³²Aser tena kati ka den jembitepa ashi, “Lenmang nung pai asenok den jembia Laishiba rateta sayudang, asenok temulungjang nung marong ama?”

³³Aser parnoki iba mapang nungjisa aramesoa Yirusalemi meyip, aser terkaji aser parnok den alirtem külemi sentepa ngur ashi,

³⁴“Kibuba atangji shia aruogo; aser Simon madangi adokogo!”

³⁵Idangji lenmang nung kechisa atalok aser kechi koda amtsük sangsadang pai parnok nem paji shiteta kümdaktsü iba indang parnoki ashi.

³⁶Aser parnoki item o jembia alidang, Yisuji parnok rongnung noktak aser parnok dang ashi. “Nenok den tesünep liang.”

³⁷Saka parnoki aoksa aser tsübu, aser tanela ka angu ta bilem.

³⁸Saka pai parnok dang ashi, “Kechiba nenoki aoksar? Aser nenok mulung nung arentaka bilema asüngdangteper?

³⁹Kü teka aser tetsüng ajiang, kechiaser nenoki kü dak shi aser teret keta anguba ama tanela ka dak shi aser teret keta mangutsü.”

⁴⁰Aser kodang pai ya ashi, pai pei teka aser tetsüng parnok dang sayu.

⁴¹Aser parnoki tepela agi mamangteti süngmangdang pai parnok dang ashi, “Yangi nenok langka tachitsü lir ma?”

⁴²Aser parnoki pa nem ango tamen temelang ka agütsü.

⁴³Aser pai aji agizük aser parnok tsüngdang achi.

⁴⁴Idangji pai parnok dang ashi, “Mosa ozüng, aser Tenüngsang kentem nung kü indang kechisa zülu, itemji ataloktsü tenüngdaktsü ta, kü o itemi ni nenok den alidang jembiogo.”

⁴⁵Idangji parnoki Laishiba angatettsüsa pai parnok mulung lapoktsü;

⁴⁶aser pai parnok dang ashi, “Khrista tuo ashitsüla, aser asemnübuba nung tasü nungi shia arutsü.

⁴⁷Aser Yirusalem nungi tenzüka kin ajak dang temulung meyipba aser temenen tatokba pa tenüng nung sayutsüngitsüla.

⁴⁸Item indang nenok kulitem lir.

⁴⁹Aser ajiang, kü Bui nangzükba ni nenok dangi yoker, saka temaba nungi nenok dangi ain maru tashi nenoki yimti nung mungang.”

⁵⁰Aser pai parnok Bethani tashi anir ao, aser pai pei teka mekanga parnok moatsü.

⁵¹Pai parnok moatsüdang, pa parnok nungi pila, aser kotaki anir atu.

⁵²Aser parnoki pa külem, aser tepela tulu agi Yirusalemi meyipa aru.

⁵³Aser Tsüngrem tenüng sanga, parnok tenla kidang maneni liasü.