Read njo LUK 4 Bible Online

LUK 4 - njo bible

LUK 4

¹Yisu Tanela Temeshi agi sünga Yordan nungi meyip. Aser Tanela agi anishia arem nung lirnü Mojingi atitanga liasü.

²Item anogo nungji pai kecha machi, aser kodang aji atem, pa ya-a liasü.

³Idangji mojingi pa dang ashi, “Na Tsüngrem Chir süra, iba lung yagi am kümang ta shiang.”

⁴Yisui pa dang langzü, “Ya zülua lir, nisungi am tesa agi taküm melitet.”

⁵Aser mojingi pa anir tua alima yimtitem ajak tenük masepshi nung pai Yisu dang sayu.

⁶Aser mojingi ashi, “Ni ne nem item yimti sentsüwangshi aser bangdak ajak agütsüdi; kechiaser ya kü nem agütsüogo, aser shiba nemsa ni agütsünüdir ya ni agütsütsü.

⁷Anungji nai ni külemang, aser item ajak ne meyong asütsü”

⁸Idangji Yisui pa dang langzü, “Ya zülua lir, nai Kibuba ne Tsüngrem külemang, aser pa kija dang nai tenzükang.”

⁹Aser ano mojingi pa Yirusalemi anir atu, aser tenla ki kilem kolak nung pa mendaktsü, aser pa dang ashi, “Na Tsüngrem Chir süra, ne sasa yangnungi pungzükang.

¹⁰Kechiaser ya zülua lir, ‘Pai pei tenyartem na yaritsü yoktsü,

¹¹aser ne tsüng lung manung matsüktsü asoshi parnoki na parnok kabu nung ajungzüktsü.’ ”

¹²Idangji Yisui pa dang langzü, “Ya shia lir, nai Kibuba ne Tsüngrem tatitang.”

¹³Aser mojingi tatitang ajakji temer külen mapang tajung ka madok tashi pa nungi kenpiga asoshi pila-a ao.

¹⁴Aser Tanela ain nung Yisu Galili meyipa shilang, aser pa indang osangji linük temeket ajakleni ao.

¹⁵Yisui parnok sinagogtem nung sayu aser ajaki pa asang.

¹⁶Aser pa kodang nübu ajung, pa yintetdak yim Nazareti aru, aser pa yimsü amato pai amungnü sinagogi ai aser pai Lai azüngtsü noktak.

¹⁷Pa nem Isaia ainkar kaket agütsü aser kaketji lapokdang kechi nung yamai zülua liasü angu,

¹⁸“Kibuba Tanela kü dak lir, kechiaser sensaker dang osangtajung sayutsüngitsü pai ni mezüja shimtet. Puoka alirtem dang techiokba sangoktsütsü, nükpokertem tenük lapoktsütsü, Ajemrepba nisung nüji küma yoktsü.

¹⁹Kibubai agizüktsüba küm sangoktsütsü asoshi pai ni yok.

²⁰Pai kaketji nempanger tenzüker nem meyipa agütsür amen aser sinagog nung alir ajaki pa dak tenük ranglok.

²¹Idangji pai parnok dang ashitsü tenzük, “Tanü iba Lai nenok narong nung atalokogo.”

²²Aser ajaki pa indang tajung jembia aser pa tebang nungi adokba taochi otem nungji parnoki süngmang; aser parnoki ashi, “Ibai Yosef chirto masü no?”

²³Aser pai parnok dang ashi, “Atangji nenoki iba shin o kü dang ashitsü, Tanebtsür, ne sasa anebjang, kechisa nai Kapernaum nung inyakba indang onoki angashi, aji yangi pei lima nunga inyakang.”

²⁴Aser pai ashi, “Ni nenok dang shitak shidi, ainkar shinga pei lima nung magizüker.

²⁵Saka atangji ni nenok dang ashir, Elija anogo nung Israel nung kodang küm asem ser ita trok anüng shibanga liasü, aser kodang alima ajak nung ayawara tulu adok amitsür jenti liasü.

²⁶Aser Elija parnok rongnung shinga dangia meyok, saka Sidon linük nung Zarefta amitsür ka dangi ang yok.

²⁷Aser ainkar Elisha mapang nung zütsüra aketer nisung aika Israel nung liasü, saka Siria nunger Naman dak alaka parnok shinga memeshitok.”

²⁸Kodang sinagog nung alirtemi ibai angashi, parnok ajak terasaba agi asüng.

²⁹Aser parnoki aramesoa pa yimti nungi aridok, aser koba tokong nung parnok yimti yanglua liasü. Nüngkümbangi pa tekolak langkoshishi sür merepzüka yoktsü anir ao.

³⁰Saka parnok tetsüngdai pa jenteta ao.

³¹Aser pai Galil nung yimti ka Kapernaumi alu, aser amungnü pai parnok dang sayua liasü.

³²Parnoki pai sayuba nung süngmang, kechiaser pa tesayuba bangdakji tashi keta liasü.

³³Aser sinagog nungji temenen tanelai apuba nisung ka liasü, aser pai ola tulu agi ayimten,

³⁴“Hai, na onok den inyaktsü kechi aka, Nazaret nunger Yisu? Na onok samatsütsü aru asü? Na shiba-ar ni meteta lir, Na Tsüngrem meyong Temeshisang.”

³⁵Yisui pa dak metenokja ashi, “Mokorai liang, aser pa nungi adokang!” Aser kodang tanela jagi pa tiyong nung laodaktsü, pai pa dak tamajung kecha meinyaki pa dak nungi temai adok.

³⁶Parnok ajak süngmanga kati ka dang ashi, “Ya kechi o? Kechi ain aser tashi agi pai temenen tanelatem dang ozüng agütsür, aser parnok oadoker?”

³⁷Aser pa indang jembiba temeket linük ajakleni sangdonga ao.

³⁸Pai sinagog toktsü aser Simoner kidangi ait. Simon tebutsü tetsü ramen agi shiranga liasü, aser la indang parnoki Yisu dang ashi.

³⁹Idangji la anasa oa noktaker pai ramenji arütsü, aser iba jagi la toktsü, aser idangyongjisa lai shishia parnok nem awazüa agütsü.

⁴⁰Anü luya alidang, tashitak tapu tapu agi shiranger shiaji parnoki Yisu dangi anir aru. Aser parnok shia dakji pai pei teka agi kongshia parnok anebtsü.

⁴¹Aser temenen tanelatem nisung jenti dak nungi adoka ayimtena ashi, “Na Tsüngrem Chir.” Saka pai parnokji metenoktsü aser jembitsü parnok dang memela; kechiaser parnoki paji Khrista ta metet.

⁴²Aser anepdang akümdang, pai azüngmeyakdak tesem kati pila-a ao. Aser telokti-i pa bushia aru aser parnok metoktsütsü parnoki nungtem.

⁴³Saka pai parnok dang ashi, “Yimtitem tanga nunga ni Tsüngrem osangtajung sayutsüngitsüla, kechiaser ya asoshi ni yok.”

⁴⁴Aser pa Galil sinagogtem nung sayutsüngia liasü.