Read njo LUK 6 Bible Online

LUK 6 - njo bible

LUK 6

¹Amungnü pa alu ajanga oya liasü, aser pa nütsüngtemi tsükjong metsükzüka parnok teka nung aji menoka achitsü tenzük.

²Saka Farisitem rongnung kari ashi, “Amungnü kechi inyaktsü tim masü aji kechiba nenoki inyaker?”

³Yisui parnok dang langzü, “Dawid aser pa den alirtem kodang ya-a liasü, pai kechi inyak,

⁴koda pai Tsüngrem kidangi ai, aser Tsüngrem madang ayuba amtsük koba putirtem dak alaka shingaia achitsü makok, aji agiteta achi aser pa den alirtem nema agütsü aji nenoki mezüngdangka ma?”

⁵Aser pai parnok dang ashi, “Nisung Chirji amungnü Kibuba lir.”

⁶Ano tanga Amungnü ka nung pai sinagogi ai aser sayutsü tenzük; aser teka ashirepba nisung ka idakji liasü.

⁷Tezülurtem aser Farisitemi pai amungnü anebtsüdisü manebtsülir ta pa tai aputsü mita ata.

⁸Saka pai parnok tebilemba metet, aser teka ashirepba nisung dangji ashi, “Aramesoang, aser tiyong nungji noktakang.” Aser pai arameso aser idakji noktak.

⁹Yisui parnok dang ashi, “Ni nenok dang asüngdangdi, Amungnü tajung inyaktsü tim asü, tamajung inyaktsü tim; taküm kümzüktsü asü samadaktsütsü?”

¹⁰Aser pai parnok ajak dak meketa reprang, aser pa dang ashi,[2] “Ne teka songtokang.” Aser pai yamaji inyak, aser pa teka anebadok.

¹¹Saka parnok mit adoka, parnoki Yisu dak kechi inyaktsü kati ka den bangjemtep.

¹²Item anogo nungji pai tenemi sarasademtsü atu; aser ammang tepiyong pai Tsüngrem dang sarasadema liasü.

¹³Aser anüngdang akümdang pai pei nütsüngtem pa dangi aja, aser parnok rongnungi terana shimtet shir dang pai tenyartem ta tenüng agütsü:

¹⁴Simon shiba dang pai Peter ta aja, aser pa tenu Andria, Yakob aser Yohan, Filip aser Bartholoma,

¹⁵Mathi, aser Toma, aser Alfa chir Yakob, Simon shiba dang Zealot ta aja,

¹⁶aser Yakob chir Yihuda, Yihuda Iskariot, shiba tashioktsür ka aküm.

¹⁷Pai parnok den külemi alua lenten ka nung noktak. Nütsüngtem telok tulu ka, aser nisungtem aika Yihuda lima aser Yirusalem nungi aser Tair o Sidon tzüküm nungi pa o angatsü aser parnok tashitak anebdaktsütsü asoshi pa dangi aru;

¹⁸aser shirnok temenen tanelatemi kangshibatem liasü parnokji anebdaktsü.

¹⁹Aser telokti ajaki pa dak kongshitsü bushia liasü, kechiaser pa dak nungi ain adoka parnok ajak anebtsü.

²⁰Pai pei nütsüngtem dak tenük ranglok aser repranga ashi, “Nenok sensakertem tepelatsü, kechiaser Tsüngrem Yimli nenok meyong.

²¹Nenok tang yaseta alirtem tepelatsü, kechiaser nenok tip atemtsü. Nenok tang ajebertem tepelatsü, kechiaser nenok menüa alitsü.

²²“Kodang Nisung Chir atema nisungi nenok sempadir, aser kodang parnoki parnok nungi nenok piladaktsüdir, aser nenok atala-a arütsüdir, aser nenok tenüng tamajung ama endokdir, nenok tepelatsü.

²³ Iba anogo nungji pela-ang aser tepela agi pungtenang, kechiaser ajiang, kotak nung nenok sempet lir, kechiaser par tetsü-teboutemi ainkartem dang yamaji inyak.

²⁴Saka nenok takartem aiatai, kechiaser nenoki nenok tesünep nguogo.

²⁵Nenok tang peria akabatem aiatai, kechiaser nenok yaseta alitsü. Nenok tang menüa alirtem aiatai, kechiaser nenoki mang ayimtsü aser ajebtsü.

²⁶“Kodang nisung ajaki nenok sanga jembidir aiatai, kechiaser yamaji par tetsü-teboutemi tiyazü ainkartem dang benshi.

²⁷“Saka nenok kü o angartem nenok dang ni shidi, nenok tsükchirtem dang meimang; nenok sempartem dang tajung benshiang.

²⁸Nenok atakatemertem dang moajang, nenok mezüngmeshirtem asoshi sarasademjang.

²⁹Kari tenibong külen mara, ano tip külenjia meyipjang aser kari ne sü agizükra, pa nem ne süpoksüa agidakjang.

³⁰Ne dang meshir shia nem agüjang aser shibai ne rongsen rakzüker aor pa nungi meyipa temeshima.

³¹ Aser nisungtemi nenok dang kechi koda inyakdaktsünür, yamaji nenoki parnok dang inyakang.

³²Nenok meimertem dang nenoki meimra nenoki kechi nüngsang angutsü? Kechiaser temenenpurtemia parnok meimertem dang meimer.

³³Aser shiri nenok dang tajung inyaker, nenoki parnok dang dang tajung inyakra, nenoki kechi nüngsang angutsü?

³⁴Aser shir nungi nenoki tanaben meyipa angutsü imlar, parnok nem aputsüra, nenoki kechi nüngsang angutsü? Tanaben kasaji meyipa angutsü asoshi temenenpurtemia temenenpurtem nem aputsür.

³⁵Saka nenok tsükchirtem meimang, parnok dang tajung inyakang aser meyipa angutsü meimlai apujang; aser nenok tajangzük tulu alitsü. Aser nenok Tematiba Chirtem akümtsü kechiaser tenüngsang magütsür rogo aser tamajung nisung tsütsü pa temeim lir.

³⁶Kechi koda nenok Tebu yimlibilem lir, yamaji nenoka yimlibilem liang.

³⁷“Nenoki o tebendang, aser nenok o mebendangtsü; nenoki taitsü, aser nenok maitsütsü; tai tokang, aser nenok danga tai atoktsü.

³⁸Agüjang, aser nenok nem agütsütsü, nenok nem tatakzük dang tali nemshia, moshia, ataker agütsütsü kechiaser kechi touzük agi nenoki ozüktsüdir, aji nenok nem meyipa ozüktsütsü.

³⁹Aser pai ano parnok dang o entepba ka ashi, “Nükpokeri nükpoker len anitsü koker ma? Tenaprongla kangla nungji masongli ma?

⁴⁰Tesayur dang nungi nütsüng temaba masü, saka nütsüng shia kodang peria kümdir, pei tesayur ama alitsü.

⁴¹Aser nai pei tenük nung anak tilaka ia aliba mungui, ne adianu tenük nung anak aliba ajir?

⁴²Mesüra nai ne tenük nung aliba anak ne sasa mangu sür ne adianu dang ne tenük nung aliba anakji endoktsüdi ta shitettsü? Anemsübatem, ne tenük nungi anakji mezüng endokang aserbo nai ne adianu tenük nung aliba anakji jungjunga angutsü.

⁴³“Kechiaser süngdong tajung nung süngjang tamajung matanger, mesüra ano süngdong tamajung nung süngjang tajung matanger.

⁴⁴Kechiaser süngdong shiaji pei süngjang agi meteter. Kechiaser ayidong nungi nisungi mungu maonger, mesüra korishidong nungi parnoki tsükmenatzü jang maonger.

⁴⁵ Nisung tajungi pei mulungjang nung tajung rizünga aliba nungi tajung agiteter; aser nisung tamajungi pei mulungjang tamajung nung rizünga aliba nungi tamajung agiteter, kechiaser kechi agi temulungjang sünga alir aji pei tebangi jembir.

⁴⁶“Aser kechiba nenoki kü dang Kibuba, Kibuba, ta ajar, saka ni ashiba meinyaker?

⁴⁷Shibaisa kü dangi arur aser kü otem angar aser itemji inyaker aji ni nenok dang sayudi.

⁴⁸Pa lung manung tazüngdak tarok toa ki yangluba nisung mesüker; aser kodang tzümetsüng adok, iba tzü jagi ki dak nungshitsü saka marakzüi ali, kechiaser ibaji jungjunga yanglua liasü

⁴⁹Saka shibai angashir aser meinyaker, paji tazüngdak tajung ka merenemi mashi-i ali tesem ka nung ki yangluba nisung mesüker, aser iba ki dakji tzümetsüng agi nungshitsü, idangyongji khenyongi iba kiji laoadoker aser iba ki raksabaji tulu liasü.”