Read njo LUK 7 Bible Online

LUK 7 - njo bible

LUK 7

¹Nisungtemi angashia pai o ajak jembimar külen, pai Kapernaumi ai.

²Tang noklang madak kibur ka pai meimba kilir ka shiranga tasür dang liasü.

³Kodang pai Yisu indang angashi, Yihuda nunger tamburtem pa dangi odakja, pei kilir kümzüktsü arung ta mepishi.

⁴Aser kodang parnoki Yisu dangi aru, parnoki pa dang kanga mepishia ashi. “Nai pa asoshi ya inyaktsü tetemsü,

⁵kechiaser pai ozü kin meimer, aser pai ozü sinagog yanglutsüogo.”

⁶Aser Yisui parnok den ao. Ano pa kidang nungi talangka moi alidang, noklang madak kiburi tembartem yoka pa dang ashi. “Kibuba, na tim tetem, kechiaser na kü kilempoki aittsü kü dak malang;

⁷mesüra ni ne dangi arutsü malang ta ni bilemer. Saka oji dang shiang aser kü kilirji anebadoktsü

⁸Kechiaser kü kübok temerangertem yur, nia bangdak aliba nisung ka lir; aser ni ka dang ashir, ‘Oang’, aser pai aor; aser ano tangar ka dang ashir, ‘Arung’, aser pai arur; aser kü kilir dang ashir, ‘Ya inyakang’, aser pai aji inyaker.”

⁹Aser kodang Yisui ya angashi pai pa dangji süngmang, aser meyiper pa sülen anitakba telokti dang ashi, “Ni nenok dang shidi Israel pur rongnungasüng iba ama tamang tulu ni munguka.”

¹⁰Aser kodang teyokertem kidangi meyipa aru, kilirsangji aneber angu.

¹¹Ajiser külen Nain ta ajaba yimti kati pai yakta ao; aser pa nütsüngtem aser telokti tulu ka pa den ao.

¹²Aser kodang pa yimti süngkhüm anasa tonga aru, ajiang, amitsür ka chir tasü mang bener aruya liasü; aser amitsürji techir ibaji dang liasü aser yimti nungjagi telok tulu ka sentena la den liasü.

¹³Aser kodang Kibubai la angu, pai la dang aochia bilem aser la dang ashi, “Tejebma.”

¹⁴Pai anasa aru aser lep nungji kongshi, aser lep apurtemi marakzüi noktak. Aser pai ashi. “Asangur, ni ne dang shidi, shishiang.”

¹⁵Aser tasüba nisungji saaka amen aser jembimeso, aser Yisui paji tetsü nem agütsü.

¹⁶Aser ajak dak tetsübu adok aser parnoki Tsüngrem tenüng sanga ashi, “Ainkar tulu ka asenok rongnung adoka lir, aser Tsüngremi pei nübur semdangogo.”

¹⁷Aser pa indang iba osangji Yihuda lima ajak nung aser temeket lima ajakleni prokshia ao.

¹⁸Kodang Yohan nütsüngtemi pa dang item ajak indang ashi,

¹⁹Yohani pa dangi pei nütsüng ana ja-a tena Kibuba dangi yoka ashi. “Tarutsü alibaji na asü, mesüra onoki tangar ka asoshi atatsü?”

²⁰Aser kodang nisungtemi pa dangi aru, parnoki ashi, “Yohan Baptitsübai ne dang iba o asüngdangi onok yok, Tarutsü alibaji na asü, mesüra onoki tangar ka asoshi atatsü?”

²¹Iba mapang nungji pai tashitak tapu jenti aser temenen tanela agi shirangertem aika ngudaktsü.

²²Aser pai parnok dang langzü, “Oang aser nenoki kechi angu aser angashi aji Yohan dang shiang; nükpokertemi angur, tsüngtsükertemi jajar, zütsüra aketertem meshidoker, aser tenarong tajaki angashir, tasürtem shia arudaktsür, sensakertem dang osangtajung sayur.

²³Aser shiri kü dak temetsüdaktsü kecha mangur pa tepelatsü.”

²⁴Aser kodang Yohan tenyartemi pila-a ao, pai teloktem dang Yohan indang ashitsü tenzük; “Kechi ajitsü nenoki aremi ao? Mopungi tsütok azüshiba asü?

²⁵Saka kechi ajitsü nenoki aremi ao? Sobutsü tanük sobuba nisung ka ajitsü asü? Ajiang sentsüprang sobutsü abenertem aser tasoshia alibatem chuba kidang lir.

²⁶Saka nenoki kechi ajitsü ao? Ainkar ka asü? Hau, ni nenok dang shidi, ainkar danga taoba.

²⁷Pa indang koma zülua lir: ‘Ajiang, kü tenyar, shibai ne jakdang ne lenmang renemtsü, pa ne jakdang ni yoker.’

²⁸Ni nenok dang shidi, tetsüri asoba rongnung Yohan dang nungi tuluba shinga melika; saka shiba Tsüngrem Yimli nung tilatiba lir pabo pa dang nungi tuluba lir.”

²⁹ Aser kodang nisung ajaki aser alimelen sarurtemi ya angashi, parnoki Tsüngrem metentsü, aser Yohan baptitsüba agi baptia liasü;

³⁰saka Farisitem aser ozüng metetertemibo parnok sasa Tsüngremi sayuba mangai pai baptitsüba magi.

³¹Anungji Yisui ashi, “Süra, kechi den iba putu nisungtem ni medemdangtsü, aser parnok kechi mesük?

³²Tanurtem shishidak mena alirtemi jembiba, ‘Onoki nenok dang jemji apu, aser nenoki metsüngsang; onoki mang ayim, saka nenoki majeb’ ta ashirtem parnok lir.

³³Kechiaser Yohan Baptitsüba chi chiyunga mesüra yi jema maru, aser nenoki ashir, ‘Pa dak temenen tanela lir!’

³⁴Nisung Chir chiyunga jema aru, aser nenoki ashir, ‘Ajiang, pabo chidiyungdir, aser yi jemer alimelen sarur aser temenenpur tembar!’

³⁵Saka shisatsüji pei süngjangtem agi metendaktsür.”

³⁶Anungji Yisui ashi, “Süra, kechi den iba putu nisungtem ni medemdangtsü, aser parnok kechi mesük?

³⁷Aser ajiang, yimti nung aliba temenentsür kati kodang pa Farisi nungba kidang chiyungdak mena lir ta angashi, teronem totzü bongdang ka bener aru;

³⁸aser pa sülen pa tetsüng züngdang lai jeba noktak, aser la nüktzü agi pa tetsüng metentsütsü tenzük aser la kolak ku agi pa tetsüng aidoktsü, aser pa tetsüng kanga mesepa lai totzü agi mezütsü.

³⁹Anungji kodang pa jaokba Farisi nungba jagi aji angu, pai pei sasa dang ashi. “Iba nisung ainkar ka süra, pa dak kongshilaji shiba, aser la kechi ama tetsür ka pai metetla, kechiaser laji temenentsür ka lir.”

⁴⁰Aser Yisui pa dang langzü, “Simon, ni ne dang langka shidi” Aser pai pa dang langzü, “Tesayur, shiangma.”

⁴¹“Taputsür nisung ka dang sentsütsür ana liasü; kati sen noklang pungu aser tangar kati sen tenem sentsü tsüa liasü.

⁴²Kodang parnok taotsü kecha makai liasü, pai tenaprongla dang sentsüji atok. Anungji tena rongnung shibai pa dang tali meimtsü”

⁴³Simoni langzü, “Shiba dang pai tali atok, iba jagi pa dang tali meimtsü ta ni bilemer.” Aser pai pa dang ashi, “Nai bilembaji shitak.”

⁴⁴Aser pai tetsürla tsütsüji meyipa shir Simon dang ashi, “Iba tetsür nai angur südi? Ni ne kidangi atuaka, tetsüng shidoktsü asoshi nai kü nem tzü magütsü. Saka laibo la nüktzü agi kü tsüng metentsü, aser lai la ku agi aidoktsü.

⁴⁵Nai kü dak tebang memesep, saka laibo ni arudang nungi kü tetsüng mesepba manener.

⁴⁶Totzü agi nai kü kolak meloktsü, saka laibo kü tetsüng totzü agi mezütsü.

⁴⁷Anungji ni ne dang shidi; la temenen aika liaka atoker, kechiaser lai kanga meim, saka shiba dang tera dang atoker, iba jagi tera dang meimer.”

⁴⁸Aser pai la dang ashi, “Ne menentem atoker.”

⁴⁹Aser pa den chiyungdak amenertemi bilemtsü tenzük, “Temenen atokba nisung ya shiba?”

⁵⁰Aser pai tetsürla dangji ashi, “Ne tamang agi na kümzükogo, tesünep nung oang.”