Read njo LUK 8 Bible Online

LUK 8 - njo bible

LUK 8

¹Ajiser külen pai yim tulu aser tilai oa Tsüngrem Yimli Osangtajung sayutsüngi. Aser teranaji pa den liasü.

²Aser ano tetsür kar shirnok nungi temenen tanelatem aridoktsü aser mokokmin tashitaktem anebtsü; Mari, Shiba dang Magdalin ta aja, la dak nungi temenen tanela tenet odaktsü,

³aser Herod temaba kilir Kuza tebutsü Yoana aser Susana aser ano tangar aika pa den liasü. Parnoki parnok akaba agi Yisu aser pa nütsüngtem yaria liasü.

⁴Aser kodang telok tulu ka külemi sentep aser yimti aika nungi nisungtem pa dangi aru, pai parnok den o-entepba ka ajanga jembi.

⁵“Metsü proker ka pei metsü proki ao, aser pai metsü prokdang, metsü kar lenmang tezü nung tsük, aser aji tetsüng agi ajemshi aser anüng ozütem arua aji chima.

⁶Aser metsü kar lungya nung tsük, aser tzü tayi peria mali nung aji meia aindang aruzüka oadok.

⁷Aser metsü kar ai rongnung tsük aser ibaji ai den ina aji moksepadok.

⁸Aser metsü kar ali tajung nung tsük, aji ina atu aser noklang bena tejang atang.” Item o jembidang pai ayimtena ashi. “Nenok rongnung shiba tenarong aten, pai angang.”

⁹Aser kodang telok tulu ka külemi sentep aser yimti aika nungi nisungtem pa dangi aru, pai parnok den o-entepba ka ajanga jembi.

¹⁰ Pai ashi. “Tsüngrem Yimli miim otem metettsü nenok nem agüja lir, saka tangartem asoshibo o-entepba ajanga agütsür, oda nguaka parnoki majitettsü aser angashiaka parnoki mangatettsü.

¹¹“Tang o-entepba tetezüji ya lir, Metsüji Tsüngrem o lir.

¹²Lenmang tezü nung tsükbaji o angashirtem lir, idangji parnok mangmangdaktsütsü aser mezümekümdaktsütsü asoshi mojingi arua parnok mulung nungi oji bener aor.

¹³“Aser lungya nung tsükbatemji, shirnoki oji angashir pela agizüker, saka tera mali nung piga dang amanger aser tatitang mapang nung tsüker.

¹⁴Aser ai rongnung tsükbatemji shirnoki oji angashir, saka parnok taküm lenmang nung aodang shisabuluba, rongsen aser iba shi taküm tepela agi moksepadoker, aser parnoki süngjang junga matanger.

¹⁵Aser ali tajung nung tsükbatemji shirnok temulungjang tajung aser ochi nung lir parnoki oji angashir aji akanga amet aser taremzük nung süngjang tajung atanger.

¹⁶Shingaia milen tsükloker molok agi nembanga mayur, mesüra yipten tugu nung mayur; saka kidangi arurtemi tesangwa angutsü asoshi milen atalokba dong nung ataloka ayur.

¹⁷ Kechiaser jungkai madoktsüsa kecha miima mali, mesüra memetettsüsa aser sangwadaki marutsüsa kecha miima mali.

¹⁸Anungji nenoki kechi angashir ya junga shisadangang, kechiaser shibasa aka pa nem ano tali agütsütsü aser shiba maka pa kechi kar ta bilemer ajia pa nungi bener aotsü.”

¹⁹Idangji pa tetsü aser tenu nunger pa dangi aru, saka telok aliba agi parnoki pa majurutet.

²⁰Aser pa dang ya ashi, “Netsü aser ne adianutem ne den ajurutepnüa kimalen noktaka lir.”

²¹Saka pai parnok dang ashi, “Shirnoki Tsüngrem o angashir inyakdir, parnokji kütsü aser kü adianutem lir.”

²²Kenü anogo pa pei nütsüngtem den rong kati ai, aser pai parnok dang ashi, “Asenoki awatsüng ajanga külen jagi odi.” Anungji parnoki apusoa ao.

²³Saka parnok taodang pa mejangadok. Aser awatsüng nungji yipru mopung adok, aser parnok rong tzü nung angema lendong nung liasü.

²⁴Idangji parnoki pa dangi arua pa mesoa ashi, “Tesayur, tesayur, asenok tesamar.” Aser pa shishia mopung aser tzüsem tesashiji arütsü, aser aji anen aser tesüngjem tulu liasü.

²⁵Idangji pai parnok dang ashi “Nenok tamang kong ali?” Aser parnoki tsübuadok aser süngmangseta kati ka dang ashi, “Ajangla mopung aser tzüsem natia tashi angatsüba iba nisung ya shiba?”

²⁶Idangji Galil linük den indangtepa aliba Gerasin [3] linükji parnoki atong.

²⁷Aser kodang pa tzükümi adok, temenen tanelatem aketba nisung ka yimti nungjagi arua pa den ajurutep; shiba mapang talangka sü mabeni aser kidang meli-i leprungkitem nung liasü.

²⁸Pai kodang Yisu angu, pai ayimtena Yisu tsüngdang apudak aser ola tulu adoka ashi, “Yisu, Tematiba Tsüngrem Chir kü den inyaktsü na kechi aka? Ni tekangshi ta ni ajang ajanga ne dang mepishir.”

²⁹Kechiaser temenen tanelaji nisungba dak nungjagi adoktsü pai ozüng agütsü. Kechiaser aiben dang yagi pa apu aser merangsen agi alena tanüker kübok yua liasü. Aji saka talenbaji raktanger temenen tanelai pa aremi aridok.

³⁰Aser Yisui pa dang asüngdang, “Ne tenüng shiba?” Aser pai langzü, “Aika” kechiaser temenen tanela jenti pa daki ia liasü.

³¹Aser bonglang makaba ongkeni parnok teyok ta parnoki pa dang mepishi.

³²Idakji ak lokti tulu ka tokong nungji chiyima liasü, anungji parnok daki idakjang ta parnoki pa dang mepishi. Anungji pai parnok odaktsü.

³³Idangyongjisa nisungba dak nungi temenen tanelatemji adok aser aktem daki ai aser ak telokji lungbangi asema lua awatsüngi ai aser arakset.

³⁴Aser kodang ak pokyimertemi kechi atalok aji angu, parnok ajen aser yimti aser linük nung aji ashi.

³⁵Idangji kechi atalok aji reprangtsü parnok ao, aser parnoki Yisu dangi aru, aser shiba nungi temenen tanelatem oadok iba nisungji sü abener nüji küma Yisu tsüngdang mena angu aser parnoki tsübu.

³⁶Aser aji angurtemi temenen tanelatemi apuba nisungji koda aneb aji ashi.

³⁷Aser Gerasin temeket nung aliba purtem ajaki parnok nungi pilatsü pa dang mepishi, kechiaser parnok tetsübu agi asüng; anungji pa rong kati ai aser meyipa ao.

³⁸Saka shiba dak nungi temenen tanelatem adok iba nisung Yisu den alitsü pa dang mepishi, saka Yisui pa yoka ashi,

³⁹“Ner kidangi meyipa oang, aser na asoshi Tsüngremi mapa tulu koda inyak aji sangokjang.” Yamaji oa yimti nungji Yisui pa asoshi kodaka inyak aji sangoktsü.

⁴⁰Kodang Yisu awatsüng külenji meyipa shilang, telokti-i pa pelaseta agizük, kechiaser parnok ajak pa ata-a liasü.

⁴¹Aser ajiang, nisung ka tenüng agi Yaira aru, shiba sinagog nung lenir ka liasü; pai Yisu tsüngdang apudaka par kidangi arung ta mepishi,

⁴²kechiaser par jala ka dang, küm terana tain aser la tasütsüsa shiranga liasü.

⁴³Aser pa aodang telokti-i pa nungbang, aser küm terana azü ayimba tetsür ka shibai mozü shitetertem nem taa agütsütsü asoshi la akaba ajak endok, saka shingaia la manebtsütet;

⁴⁴iba tetsürji pa sülen aru aser pa sütsüng nung kongshi, aser idangyongji la azü ayimba anen.

⁴⁵Idangji Yisui ashi, “Shibai kü dak kongshi?” Kodang ajaki menangzük, Peteri ashi, “Tesayur, telokti-i na meketbanga anunger.”

⁴⁶Saka Yisui ashi, “Nisung kati kü dak kongshiogo, kechiaser kü dak nungi ain tuguogo ta ni metet.”

⁴⁷Aser kodang tetsürlai oda aji miima meyutet ta metet, lai atentena aru, aser Yisu tsüngdang apudaka nisung ajak madang lai kechi asoshi pa dak kongshi aser idangyongjisa la koda anebadok aji ashi.

⁴⁸Aser Yisui la dang ashi, “Tenü, ne tamang agi na anebogo; tesünep nung oang.”

⁴⁹Ano pa jembia alidang, nisung ka sinagog nung lenir kidang nungi aru aser ashi, “Ner jala süogo, joko Tesayur timtetemdaktsü.”

⁵⁰Saka Yisui ya angashia pa dang ashi. “Tetsübu, tamang dang amangang, aser la junga akümtsü.”

⁵¹Aser kodang pa kidang jagi aru, Peter, Yohan, Yakob aser aiürla tebu o tetsü-na, parnok dak alema nisung shinga pa den aitdaktsütsü memela.

⁵²Aser aikati la asoshi mangyima jeba liasü; saka Yisui ashi, “Tejeb, kechiyong la tasü masü saka mejanger dang.”

⁵³Aser parnoki laji tasüa ta meteta pa atala-a menütsü.

⁵⁴Saka pai la teka nung amer ja-a ashi, “Tenü, shishiang.”

⁵⁵Idangji la taküm meyipa aru aser la sakadok, aser la nem langka tachitsü agüjang ta pai ashi.

⁵⁶Aser la tsüraburi süngmang saka iba inyakba indang shinga danga teshi ta parnok dang pai ashi.