Read njo LUK 9 Bible Online

LUK 9 - njo bible

LUK 9

¹Aser pai teranaji külemi jatep aser tashitaktem anebtsütsü aser temenen tanelatem ajak aridoktsü parnok nem tashi-ain agütsü.

²Aser Tsüngrem Yimli sayutsüngitsü aser shirangertem anebtsütsü pai parnok yok.

³Aser pai parnok dang ashi, “Nenok lenmang asoshi mechi mesüra yangku, mesüra amtsük mesüra sen, mesüra semoksü talila ka danga teben.

⁴Aser koba kidangisa nenok idir, iba yimtiji metoktsü tashi idakji liang, aser ang nungjagi pila-a oang.

⁵Aser kongsa parnoki nenok magizüklir, kodang iba yimti nungi nenok pila-a odir, parnok anema kuli asütsü asoshi nenok tetsüng nungi auyi temdokang.”

⁶Aser parnoki pila, aser parnoki anebja aser Osangtajung sayutsüngia yimtem semjema ao.

⁷Tang Herod Galil nung yimsüsüsangi ya inyakba mapa ajak indangji angashi aser pa kanga atitaka aküm, kechiaser Yohan tasü nungi shia aruogo ta kari jembia liasü.

⁸Aser kari Elija jungkai adoka lir ta ashi, ano tangar kari tejen ainketertem rongnungi ka shia arua lir ta ashi.

⁹Aser Herodi ashi, “Yohan kolak ni atang, saka ano ya shiba indang ni angashir?” Aser pai pa ngunüa bushi.

¹⁰Aser tenyartemji arua parnoki kechi inyak aji pa dang ashi. Aser pai parnok anir pila aser yimti ka tenüng agi Bethsaidai ao.

¹¹Saka kodang telokti-i ya angazük, parnoki pa sülen anitak, aser pai parnok agizüka parnok dang Tsüngrem yimli indang jembi aser tanebtsü nüngdaka alirtem pai anebtsü.

¹²Nikongtsütsü akümdang teranaji pa dangi arua ashi, “Temeket yimtem aser linüki oa chiyungtsü alitsü aser ayiptsü asoshi telokti yokadokang, kechiaser parnok yangi azüngmeyakdak tesem ka nung lir.”

¹³Saka pai parnok dang ashi “Parnok nem langka tachitsü nenoki agüjangma.” Saka parnoki langzü, “Onoki oa item nisung ajak asoshi chiyungtsü malira, amtsük pungu aser ango ana dak alema onok kecha maka.”

¹⁴Kechiaser parnok tebur danga meyi pungu shi liasü. Aser pai pei nütsüngtem dang ashi, “Parnok tenem-nem shi telok telok mendakjangma.”

¹⁵Aser parnoki aji oda inyak aser parnok ajak mendaktsü.

¹⁶Aser amtsük pungu aser ango anaji amer anünglen shia ajir pai itemji moatsü aser sangsa, aser telok nem anganüa agütsütsü asoshi nütsüngtem nem agütsü.

¹⁷Aser parnoki achi aser tepok asüng, aser tanüngba molok terana sünga benden.

¹⁸Kodang pa kisüng sarasadema liasü pa nütsüngtem pa den liasü, aser pai parnok dang asüngdang, “Nisungtemi ni shiba ta ashir?”

¹⁹Aser parnoki langzü, “Yohan Baptitsüba ta,” aser kari ashir, “Elija”; aser ano tangar kari “Tejen ainkartem” ka shia arua lir ta ashir.

²⁰Aser pai parnok dang ashi, “Saka nenokia ni shiba a ta ashir?” Idangji Peteri langzü, “Tsüngrem meyong Khrista.”

²¹Saka ya shinga danga teshi ta pai parnok dang ajang ajanga ozüng agütsü aser ashi,

²²“Nisung Chir kanga tuo-ashitsüla aser tamburtemi, tamarenba putirtemi aser tezülurtemi pa mezüngmeshitsü aser tepsettsü aser asemnübuba nung shia arutsü.”

²³Aser pai parnok dang ashi, “Kari kü sülen arunüra, pai pei sasa tesükshima aser pei kangki anogoshi apur kü sülen anitakang.

²⁴Kechiaser shibai pei taküm kümzüknüdir aji samatsü, aser shibai ni atema taküm samadir iba nisungji kümzüktsü.

²⁵Kechiaser nisung kati alima ajonga ajangzüker pei taküm samara mesüra madokra pai kechi ajangzüktsü?

²⁶Kechiaser shibai ni aser kü otem asoshi nüma metanglir, Nisung Chir-ia kodang pei sentsüwangshi nung, Tebu aser temeshi kotak tenyartem den sentsüwangshi nung arudir, idangji pa asoshi nüma matangtsü.

²⁷Saka atangji ni nenok dang shidi, idaki noktaka alir rongnung kari Tsüngrem Yimli mangu tashi tasüba majurutsü.”

²⁸Item o jembir anogo ti shi lir külen pai Peter, Yohan aser Yakob pa den anir sarasademtsü tenemi atu.

²⁹Aser pa sarasadem dang, pa tejak tereprangtsü melenadok, aser pa süoshi sentsüpranga mesüng mesünga aküm.

³⁰Aser ajiang, nisung ana, Mosa aser Elija pa den jembia liasü.

³¹Parnoki sentsüwangshi nung jungkai adoka, tatsüka lir pa Yirusalem nung asüba ajanga Tsüngremer nükjidong ataloktsütsü indang jembi.

³²Tang Peter aser pa den alirtem kanga anünüa liasü, saka kodang parnoki saksalema aküm parnoki pa sentsüwangshi aser pa den noktakba nisung anaji angu.

³³Mosa aser Elija pa toktsür pila aodang Peteri Yisu dang ashi, “Tesayur, asenok yangi alitsü junger. Asenoki semtu asem yangludi; na asoshi ka, Mosa asoshi ka, aser Elija asoshi ka.” Saka pai kechi jembir aji memetet.

³⁴Saka pai ya jembia alidang mepet ka arua parnok akhümbang, aser parnok mepet tiyongi aidang parnok tsübuadok.

³⁵Aser mepet nungjagi ola ka adoka ashi. “Ibai kü chir kü teshimtetba, pa dang angang.”

³⁶Aser kodang o jembiba olaji anenadok, Yisu kisüng dang angu. Aser parnoki ola madoki liasü aser parnoki kechi angu iba anogo nungji shinga danga mashi.

³⁷Aser tanünüji parnok kodang tenem nungi alu, telok tulu kati pa ajuru.

³⁸Aser ajiang, telok nungjagi nisung kati ayimten, “Tesayur, kü chir ajidangtsü ni ne dang kanga mepishir, kechiaser ozü chir pa dang lir;

³⁹aser ajiang, temenen tanela kati pa apur aser pai aoksa ayimtener, iba jagi paji poja adoka mekümdaktsü tashi ateptendaktsür aser pa ajensatsür aser pa dak nungi kodanga maor.”

⁴⁰Aser ni ne nütsüngtem dang ibai aridokjang ta mepishi, saka parnoki makok.

⁴¹Aser Yisui langzü, “Oh tamang makaba aser mashi jajaba putu, ni nenok den kopiga alitsü aser nenok dang aremzüktsü?”

⁴²Aser pa aruya alidang, temenen tanelai pa alangdakja pa ateptendaktsü. Saka Yisui temenen tanelaji arütsü, aser tanurji anebdaktsür tebu nem meyipa agütsü.

⁴³Aser Tsüngremer tamaren tashi ngua parnok ajaki süngmang.

⁴⁴Saka pai inyakba ajak indangji parnok ajaki süngmanga alidang, pai pei nütsüngtem dang ashi, “Item O nenok narongi idakjang kechiaser Nisung Chir nisungtem ket nung bendanga agütsütsü.”

⁴⁵Saka parnoki iba oji mangatet, parnoki aji mangatettsüsa parnok nungi aji miimbanga liasü, aser iba o indang parnoki pa dang asüngdangtsü tsübu.

⁴⁶Aser shiba tulutiba ta parnok rongnung toktepa jembitep.

⁴⁷Saka kodang parnok mulung nung bilembaji Yisui metet, pai tanur chanu ka anir arua pa anasa noktakdaktsü.

⁴⁸ Aser pai parnok dang ashi, “Kü nüng atema shibai ibala tanur chanu agizükdir, pai ni agizüker, aser shibai ni agizüker pai ni tenyasangjia agizüker, kechiaser shiba nenok ajak rongnung tilatiba lir paji tulutiba lir.”

⁴⁹Aser Yohani langzü, “Tesayur, nisung kati ne tenüng nung temenen tanelatem aridokba onoki angu, aser onoki pa nemtem, kechiaser paji asenok telok rongnung maten.”

⁵⁰Saka Yisui pa dang ashi, “Pa tenemtem, kechiaser shiba nenok anemer masü pa nenok tsütsü lir.”

⁵¹Kodang Yisu anir atutsü anogotem anasa ait, pai Yirusalemi aotsü mulungteta pa jak ilenji meyip.

⁵²Aser pai pa jakdang osang abenertem yok aser parnoki pa asoshi renemtsü Samaria nunger yim kati ai.

⁵³Saka pai Yirusalemi aotsü pa tejak meyip nung parnoki pa magizük.

⁵⁴Kodang pa nütsüngtem Yakob aser Yohani ya angu parnoki ashi, “Kibuba, parnok rongtoktsütsü asoshi onoki kotak nungi mi aludaktsütsü nai onok nem inyakdaktsünür asü?

⁵⁵Saka pai meyiper parnok ang arütsü.

⁵⁶Aser parnoki yim tanga kati ao.

⁵⁷Aser parnok lenmang nung oya alidang nisung kati pa dang ayimtena ashi, “Na kolenisa odir, ni ne sülen anitaktsü.”

⁵⁸Aser Yisui pa dang langzü, “Shirongtem lungki kar, aser anüng ozütem tesep kar, saka Nisung Chir tekolak atalokdak maka.”

⁵⁹Aser ano tangar ka dang pai ashi, “Kü sülen anitakang.” Saka pai ashi, “Kibuba, ni tama or kübu aremtsü mela-angma.”

⁶⁰Saka pai pa dang ashi. “Tasürtemi parnok tasürtem aremtsü tokjang, saka nabo oa Tsüngrem Yimli Osangtajung jungkai adokba sayuang.”

⁶¹Aser tangar katia pa dang ashi, “Ni ne sülen anitaktsü, Kibuba, saka tamasa kü kinungertem dang tepila o ashitsü mela-ang.”

⁶²Yisui pa dang ashi, “Shibaisa pei ket alu alaba nung soter tesülen shia repranger pa Tsüngrem Yimli asoshi metemsü.”