Read njo TAZÜNGKUNEM 1 Bible Online

TAZÜNGKUNEM 1 - njo bible

TAZÜNGKUNEM 1

¹Yordan anüdoklen arem Suf tejaklen Araba nung Paran aser Tofel tsüngda Laban Hezerot aser Dizahab nung Israel chir ajak dang Mosai jembiba o itemi lir.

²Horeb nungi Seir tenem lenmang kadesh-Barneai aobaji anogo terkanü lenmang lir.

³Küm lirbuba ita terkabuba mezüng anogo nung Israel nunger asoshi KIBUBAi pa dang melaba ajak Mosai jembi.

⁴ Ya Heshbon nung aliba Amor chuba Sihon, Bashan chuba Og shiba Ashtarot aser Edrei nung liasü, pai parnok koker külen liasü.

⁵Yordan anüdoklen Moab lima nung Mosai iba ozüng ya rasa-a ashi.

⁶“KIBUBA asen Tsüngremi Horeb nung asenok dang ya ashi, ‘Nenok iba tenem nung lishia liogo.

⁷Aramesoang aser Amor nunger tenem linüki aser Araba ali wabetsa aser iba meketa aliba tenem linüktem, Negeb aser tzüyimküm, Kanan nunger linük aser Lebanon aser ayong tulu Eufrata ayong tashi oang.

⁸Ajiang ni nenok jakdang alinükji yutsüogo, KIBUBAi nenok tsürabur Abraham, Isak aser Yakob nem agütsütsü züngzüktepba lima jagi iang aser agiang.”

⁹Iba mapang ni nenok dang shiogo, “Ni kü kijai nenok khu abentsü makok.

¹⁰KIBUBA nenok Tsüngremi nenok kanga rendaktsüogo, aser tanü nenok anüng petinutem ama lir.

¹¹KIBUBA nenok tsüraburtem Tsüngremi nangzükba ama nenok meyirijangben agi tali rendakjang aser moajangma!

¹²Saka koda sür nenok tebilemtsütem khuret aser nenok tsüngda mangatettep ajak kü kijai abentsü?

¹³Nenok kidong shia nungi shisa akaba tangatetba akaba aser ajaki akhümtsübuba nisung kar shimtetang, aser ni nenok madak parnok tanishir kümdaktsüdi.

¹⁴Aser nenoki kü dang langzüogo, nai ashibaji onok asoshi junger.

¹⁵Anungji ni nenok kidong shia nungi tanishirtem shisa taka aser ajaki akhüm tsübua aliba nisungtem shimteta nenok meyirijang noklang, tenem aser ter madak tanishirtem yutsüogo.

¹⁶Idangji nenok obendangertem dang ni shiogo, ‘Nenok adianutem tsüngda nung o angang aser nisung kati pei adianu den süshia mesüra pa den aliba bendanger kar den süshia ochi shia o bendangang.

¹⁷O bendang kecha nunga tejak tereprang, tulu aser tila ajak dang kasa angang. Nenoki nisung shinga tetsübu kechiaser o bendangbaji Tsüngrem meyong lir. Nenok asoshi o tasakji kü dangi bener arung aser ni aji angatsü.

¹⁸Iba mapang nung nenoki kechisa inyaktsü item ajak indang ni nenok dang shiogo.

¹⁹“Idangji KIBUBA asen Tsüngremi melaba ama, asenoki Horeb nungi apusoa asenoki anguba tetsübutsü arem tuluji ajanga Amor nunger tenem limaleni oa asenok kadesh-barnea atong.

²⁰Aser ni nenok dang ashi, KIBUBA asen Tsüngremi agütsüba Amor nunger limai nenok aruogo.

²¹Ajiang KIBUBA ne Tsüngremi alinükji ne jakdang yutsüogo. KIBUBA nenok tsüraburtem Tsüngremi ashiba ama tuang aser alinükji agiang. Tetsübu, mesüra tasü maiti teli.

²² Saka nenok kü dangi arua ashi, asenok asoshi linükji lemdangtsü aser asenok koba lenmangi aotsü aser koba yimtitemi asenok arutsü; iba osang asenok dangi abentsü asen jakdang asenoki nisung yokdi.

²³ Ibaji kü nükdanga junga bilem nung ni nenok nisung terana kin shia nungi ka ka shimtet.

²⁴Parnoki tenem linük leni atu aser Eskol lenteni arua aji ladang.

²⁵Linük nung atangba süngjang kar parnoki amer asenok dangi osang bener arua ashi, KIBUBA asen Tsüngremi agütsüba limaji kanga tajung lir.

²⁶ “Saka nenoki ajagi metuli asü, aser KIBUBA nenok Tsüngremi melaba anema apuso;

²⁷aser nenoki nenok süki nung nemnemtepa ashi, ‘Kechiaser KIBUBAi asenok aniteta Amor nunger ket nung samatsütsü anir aru.

²⁸Asenok kongi aotsü? Asen adianutemi asen mulung zürepdakja ashi; nisungtemji asen dang nungi tuluba aser talangba, yimtitemji kanga tulu aser anüng tashi atsübanga lir, aser yangji aso tulu Anakim chirtem onoki angu.

²⁹“Idangji ni nenok dang shiogo, ‘Taoksa mesüra parnok tsübua teli.

³⁰KIBUBA nenok Tsüngrem shiba nenok jakdang aor, pai Ijip nung nenoki ngua inyakba amato, nenok asoshi raratsü,

³¹ aser arem nung tebui pei jabaso apungba ama nenoki iba tesem ya matong tashi KIBUBA nenok Tsüngremi nenok lenmang tepiyong anir aruogo.’

³²Ni nenok dang yamaji shiaka nenoki KIBUBA nenok Tsüngrem dak mamang,

³³shibai nenok süki yangludak bushitsü aser nenok aotsüba lenmang sayutsü asoshi aonung mi nung aser anüngdang mepet nung nenok jakdang ao.

³⁴“Kodang KIBUBAi nenok otem angashi, pai ain adoka azüngashia ashi,

³⁵‘Iba tamajung putu nisung katia alinük tajung koba nenok tsüraburtem nem ni agütsütsü nangzük, aji mangutsü.

³⁶Saka Yefune jabaso Kalebi dang aji angutsü, aser pa aser par chirtem nem pa tetsüng ajemokdak limaji agütsütsü; kechiaser pai bendanga KIBUBA sülen anidak.’

³⁷Ano nenok meji KIBUBAi kü dang ain adoka ashi, na-a ajagi maitsü.

³⁸Saka ne teyarir Nun jabaso Yihusua ajagi aitsü, pa ajungshiang kechiaser pai Israel nem aji amangdaktsütsü.

³⁹Ano nenok tila tanurtem shir tetepsettsü asoshi alitsü ta nenoki shiogo, nenok chir shiri tanü tajung tamajung memetet, parnok ajagi aitsü. Parnok nem ni aji agütsütsü aser parnoki aji agitsü.

⁴⁰Saka nenokbo meyipang aser temerem tzüyim len arem lenmang jagi iang.

⁴¹Idangji nenoki kü dang langzü, onoki KIBUBA anema tai menaogo, KIBUBA asen Tsüngremi melaba ama onoki tudi aser raradi. Anungji nenok nisung shiai tenem len jagi atutsübaji temela ta bilema pei nok o nü renem.

⁴²“Saka KIBUBAi kü dang ashi, ‘parnok dang shiang, nenoki raratsü asoshi tetu, kechiaser ni nenok den maten. Nenok tsükchirtemi nenok akoktsü.’

⁴³Anungji ni nenok dang yamaji ashi, saka nenoki manga. Nenoki KIBUBAi melaba anema apuso aser pei tiyaksanga tenem leni atu.

⁴⁴Idangji tenem nung aliba Amor nungertemi nenok anema arua ninang arishir ama nenok aridok, aser Seir nungi Horam tashi makdok.

⁴⁵Idangji nenoki meyip aser KIBUBA madang ajeb; saka KIBUBAi nenok ola mangashi mesüra nenok tsütsü pa tenarong magütsü.

⁴⁶Anungji nenok kadesh nung amung aser mapang talangka yangji ali.