Read njo TAZÜNGKUNEM 10 Bible Online

TAZÜNGKUNEM 10 - njo bible

TAZÜNGKUNEM 10

¹“Iba mapang nungji KIBUBAi kü dang ashi, ‘Mezüng amato nai lungpak ana angentetang aser kü dangi tenemi atung. Ano süng agi süngden ka yangluang.’

²Aser nai tamasa raksaba lungpak nung aliba otemji nai lungpak nungji zülutsüla, aser nai itemji temeshi süngden nungji enoktsü.”

³“Anungji ni akashia süng agi süngden ka yanglu, aser mezüng ama lungpak ana angenteta kü teka nung amer tenem jagi atu.

⁴Aser mezüng züluba amato ozüng terji pai lungpak nungji zülu, koba nenok atenshiba anogo nung KIBUBAi tenem nung mi nungi nenok dang jembi; aser KIBUBAi itemji kü nem agütsü.

⁵Idangji ni tenem nungi meyipa alu, aser KIBUBAi kü dang melaba ama ni yangluba süngden nung aji ayu, aser aji tanga idakji lir.”

⁶ Tang Israel nüburtem Beeroth Bene-yakan nungi apusoa Moserai aru. Idakji Aron asü aser yangji pa rema yutsü aser pa jabaso Eleazari pa melena putir mapa inyak.

⁷Yang nungjagi parnok Gudgodai apusoa ao; aser Gudgoda nungi ayong tzü alidak Yotbat-i aru.

⁸ Iba mapang nungji KIBUBA Ozüng Süngden abentsü; KIBUBA madang noktaktsü, aser pa tenzüktsü aser pa tenüng nung moatsütsü, oda tanü tashi parnoki inyakba amai, KIBUBAi Levi kidong bendanga ayu.

⁹Iba yongji Levi pa adianutem den shilem mesüra senmang kecha maka, KIBUBA ne Tsüngremi pa dang ashi ama KIBUBAji pa senmang lir.

¹⁰ “Tang mezüng ama ni tenem nung anogo lir aser aonung lir ali, aser iba mapang nungjia KIBUBAi kü dang anga aser KIBUBAi nenok samatsütsü memulungi liasü.

¹¹Idangji KIBUBAi kü dang ashi, ‘Aramesoang, aser nüburtem tejaklen jagi na oang, parnok tsüraburtem dang ni parnok nem agütsütsü ta azüngashiba linük jagi parnok aitsü aser aji agitsü.’

¹²“Aser tang, Oh Israel, KIBUBA ne Tsüngremi ne dang nungi kechi akhanger? Saka KIBUBA ne Tsüngrem tsübutsü, pa lenmang ajak nung jajatsü, ne mulung ajak agi aser ne nela ajak agi pa dang meimtsü aser tenzüktsü,

¹³aser tanü ni nenok nem nenok ajungtsü asoshi agütsüba KIBUBA ozüngtem aser pa temelabatem benshitsü.

¹⁴Ajiang, anüng aser tematiba anüngtem, alima aser yangji aliba ajak KIBUBA ne Tsüngrem meyong lir.

¹⁵Aji saka KIBUBAi nenok tsürabur dak meimtsüsa parnok dak temulung atok, aser tanü amai tangar dang nungi tali par semchirtem oda nenok pai shimtet.

¹⁶Aji asü nung nenok mulungjang mejeptokang, aser nenok joko tekong meranga teli.

¹⁷ Kechiaser KIBUBA ne Tsüngremji tsüngremtem madak Tsüngrem, kiburtem madak Kibur, tulu, tashi tulu aser tetsübutsü Tsüngrem shibai tejak majir, mesüra süpokrem magir.

¹⁸Pai lajar aser amitsür asoshi ochi agi o bendanger aser aener nem süoshi aser chiyungtsü agüja meimer.

¹⁹Aji asü nung aener dang meimang, kechiaser nenoka khenbo Ijip nung aenersa liasü.

²⁰Nai KIBUBA ne Tsüngrem tsübutsüla; Pa dang nai tenzüktsüla, pa dak azüittsüla, aser pa tenüng agi azüngashitsüla.

²¹Paji ne tenüngsang lir aser paji ne Tsüngrem lir, shibai mapa tulu aser tetsübutsütem ne tenük agi ngua inyak.

²² Ne tsüraburtem parnok ajak agi neter Ijipi alu, aser tangbo KIBUBA ne Tsüngremi anüng petinutem ama na aika kümdaktsüogo.