Read njo TAZÜNGKUNEM 11 Bible Online

TAZÜNGKUNEM 11 - njo bible

TAZÜNGKUNEM 11

¹“Anungji nai KIBUBA ne Tsüngrem meimtsüla aser pai melaba pa ozüngtem, pa obendangba, aser pa temelaba ajak benshiang.

²Tanü nenoki metetang, nenok chirtem shirnoki ya memetet aser KIBUBA ne Tsüngremi tarütsüba, pa uluba, pa tashi tait teka aser tepen songtokba pa temaitsütem mangu, parnok den ni mejembir,

³ aser temaitsütem, pa mapatem Ijip chuba Farao aser Ijip nunger yongtsü nung aser Ijip lima ajak nung inyak;

⁴ pai Ijip nunger temerangertem parnok kor aser talungtsütem dak kechi inyak, kodang parnoki nenok aria aru, pai parnok temerem tzüyim nung lungbangdaktsü, aser KIBUBAi parnok meshi meshia samatsü.

⁵Aser nenok iba yagi maru tashi pai lisem lima nung nenok dak kechi inyak;

⁶ aser pai Reuben chir Eliab jabaso Dathan aser Abiram dak kechi inyak, koda ali pei tebang lapoka Israel ajak madak par kibong, par süki aser parnok sülen anitakba taküm aliba ajak den parnok meyok;

⁷saka KIBUBAi mapa tulu inyakba ajak nenok tenük agi nguogo.

⁸“Tanü ni nenok dang melaba ozüng ajak nenoki benshitsüla, anungji alinük koba nenoki agitsü idagi ajagi nenok tashi ita litettsü

⁹aser mamatzü o ninang mojitzü yima aliba lima koba KIBUBAi nenok tsürabur aser par chirnurtem nem agütsütsü azüngashi, anungji nenok yangji ari shia alitsü.

¹⁰Kechiaser alinük koba nenoki agitsü idagi, aji nenok aruba linük Ijip ama kong nenok metsü proka, ne tsüng agi tzü aenba ansotsü tsüki amato masü.

¹¹Saka alinük koba nenoki agitsü idagi, aji tenem aser lenten linük, aser anüng nungi tzü ajemer.

¹²KIBUBA ne Tsüngremi anebaluba linük küm tetenzük nungi tatem tashi maneni KIBUBA ne Tsüngremi tenük yokba linük.

¹³ “Anungji tanü ni nenok dang melaba ozüngtemji nenoki angara, aser ne mulung ajak agi, ne nela ajak agi KIBUBA ne Tsüngrem meimtsü aser tenzükdi süra,

¹⁴tsüngkhüm shitak nung pai nenok asoshi tzünglu yoktsü, oda mezüng tzünglu aser tesüben tzünglu agütsütsü, anungji nenoki nenok tsük, yi aser totzü bendentsü.

¹⁵Ano pai nenok kiset shirurutem asoshi moapu nung rem adokdaktsütsü, aser nenoki chir tipatemtsü.

¹⁶Nenok temulungjang ashiokja nenoki tangar tsüngremtem dangi meyipa oa parnok tenzüka mekülemtsü asoshi kümdangang.

¹⁷Aji oda mesüra KIBUBA ainji nenok anema adoktsü, aser pai anüngtem shibanga tzünglu marudaktsütsü, anungji alinük nungji tzünglu marura ali-i tejang metangtsütsü, idangji KIBUBAi nenok nem agütsüba linük nungji nenok yakta samatsü.

¹⁸ “Anungji nenoki kü otem ya nenok mulung aser tanela nung rizünga yuang; itemji temaitsü ka amato nenok teka nung alenlokang aser tenütsü nung temaitsü asoshi ajenlokang.

¹⁹Aser item nenoki pei chirtem dang sayuang, na kidang amendang, na lenmang nung jajadang, na mejangdang aser na shishidang item indang nai jembiang.

²⁰Itemji nai ne ki kikümdong nung aser kima süngkhümtem nung itemji züluang.

²¹Anungji alima temalen anüngtem ali tashi, KIBUBAi nenok tsüraburtem dang parnok nem agütsütsü azüngashiba linük nung ne taküm aser ne semchirtem ari shia alitsü.

²²“Kechiaser ni nenok nem agütsüba item ozüng ajak ya nenoki kümdanga benshira KIBUBA ne Tsüngrem dang meimtsü, pa lenmang ajak nung jajatsü aser pa dak akanga sota lira;

²³idangji nenok madang nungi item kin ajak KIBUBAi aridoktsü aser nenok dang tuluba aser tashi taitba kintem nenoki atsüngdoktsü.

²⁴ Kongsa nenok meyong alitsü; nenok litsüji lisem lima nungi Lebanon tashi aser Eufrata ayong nungi anüolen tzüyim tashi alitsü.

²⁵Nenok anema shingaia menoktaktettsü; aser pai nenok dang ashi ama, KIBUBA nenok Tsüngremi nenok kechinungsa tetsüng ayaokdir linük ajak nung nenok tsübuba aser taoksaba adokdaktsütsü.

²⁶“Ajiang, tanü ni nenok madang temoatsü ka aser atakatem ka yutsür:

²⁷tanü ni nenok nem agütsüba KIBUBA nenok Tsüngremi melaba nenoki angara temoatsü alitsü;

²⁸Saka KIBUBA nenok Tsüngremi melaba mangai, tanü ni nenok dang melaba nungi meyipa or nenoki memetetba tangar tsüngremtem sülen anitaka ora, atakatem alitsü.

²⁹ Kodang nenoki agitsü oya aliba linüki KIBUBA ne Tsüngremi nenok anir arudir, nenoki temoatsüji Gerizim tenem nung ayutsü aser atakatemji Ebal tenem nung sangoktsütsüla.

³⁰Moreh nung sülemdong anasa Gilgal tejaklen Araba nung alir Kanan nunger linük nung, Yordan atena or anü ailen itemji mali no?

³¹Kechiaser KIBUBA nenok Tsüngremi nenok nem agütsüba linük agitsü asoshi Yordan ajanga tair lir. Kodang nenoki aji agidir aser idakji lidir,

³²tanü ni nenok madang yutsüba telatet ozüng aser obendangba ajak nenoki kümdanga benshitsüla.