Read njo TAZÜNGKUNEM 12 Bible Online

TAZÜNGKUNEM 12 - njo bible

TAZÜNGKUNEM 12

¹“KIBUBA nenok tsüraburtem Tsüngremi nenok nem agütsüba linük iba lima nungji nenok taküm ali tashi item telatet ozüngtem aser obendangbatem nenoki kümdanga benshitsüla.

²Nenoki aridokba kintem par tsüngremtem külemdak tenem talangtem nung, tokong nung aser süngdongtem kübok tesem ajakji meshi meshia raksatsütsüla.

³ Parnok tenladak sabangtemji raksajang, par temeshi tongshitem anüka akusajang aser par Ashera süngratemji rongdokjang; par süngyanglu tsüngremtemji lepzüka yokang aser idakji par tenüngtemji samajang.

⁴“Parnoki inyakba amaji KIBUBA nenok Tsüngrem dang meinyaktsüla,

⁵saka KIBUBA nenok Tsüngremi nenok kidong ajak nungi pa tenüng ayutsü koba tenem shimdir, pa alidak ajagi nenoki bushia arutsüla

⁶Ajagi nenoki tarongba tenla, nenok tetepsetba tenla, ter shilem, tatemzükba aser temulunger tenla, nashi aser san telok mezüng mepuba nenoki bener arutsüla.

⁷Idakji KIBUBA nenok Tsüngrem madang nenok kibong shiai nenok teka agi inyakba ajak nung KIBUBA nenok Tsüngremi moatsüba asoshi pelatepa achitsüla.

⁸“Tanü asenoki inyakba ama nenok nisung shingaia pei sünütsü süa kecha mebenshitsüla,

⁹kechiaser KIBUBA ne Tsüngremi nenok nem agütsütsü aliba nenok anisüngzükdak aser senmangji nenoki ano matong.

¹⁰Saka kodang nenok Yordan ajangdir, aser KIBUBA nenok Tsüngremi nenok nem agütsüba lima nung lidir, pai nenok tsükchirtem nungi anisüngzük agütsütsü, aser nenok kümzüka alitsü.

¹¹Idangji KIBUBA nenok Tsüngremi pa tenüng ayutsü asoshi koba linük shimtetdir, ajagi ni nenok dang melaba ajak: nenok tarongba tenla, tetepsetba tenla, ter shilem, nenok teka agi inyaktetba tenla, nenoki shimtetba tatemzükba tenla koba nenoki KIBUBA dang atemzük, item tenlatem ajakji nenoki abentsüla.

¹²Aser idakji nenok jabasotem aser jalatem nenok tetsür tebur ajak, oda kilir aser kilitsür, aser Levi nunger shir nenok yimtak alir, kechiaser parnok nenok den senmang maka parnok den pelatepang.

¹³Nai anguba tesem mashi-i nung tarongba tenla metenlatsü kümdangang,

¹⁴saka nenok kidongtem rongnungi KIBUBAi koba shimdir idakji nai tarongba tenlatemji agüjang, aser yangji ni ne dang melaba ajak inyakang.

¹⁵“Aji saka KIBUBA ne Tsüngremi ne nem agütsüba temoatsü yari, mesü shi aser shitsü shi ama, nenok süngkhüm kübok meshiteta alir aser memeshiteti alir ajaki pei chinütsü achitsü akok.

¹⁶ Nai azü dang machitsüla, nai aji ali nung tzü ama shitokang.

¹⁷Ne tsük tenla nungi mesüra tsükmenatzü yi, mesüra totzü mesüra ne san telok nungi mezüng mepuba tenlatem nungi abenba ter shilem mesüra tatemzükba tenla koba nai atemzüka ayu mesüra temulunger tenla mesüra ne teka mapa nungi machitsüla.

¹⁸Saka KIBUBAi shimtetdak na, ne jabaso jalatem, ne kilir aser kilitsürtem aser Levi nunger shirnok yimtitem nung alir, KIBUBA ne Tsüngrem madang achitsüla, aser nai inyakba ajak nung KIBUBA ne Tsüngrem madang na pelaseta alitsü.

¹⁹Na ne li nung ali tashi Levi nunger senzüka metoktsütsü kümdangang.

²⁰“Kodang KIBUBAi ne dang nangzükba ama ne litsü ulushidaktsüdir, aser nai, ‘Ni shi achitsü’ ta shidir, kechiaser nai shi achitsü jangrar, idangji nai kodaka chinür achitsü akok.

²¹Aser san telok KIBUBAi ne nem agütsüba nungi tepsetang, aser ni ne dang melaba ama, na kodaka chinür aji ne süngkhüm kübok chiang.

²²Itemji mesü shi o shitsü shi na achiba ama nai chiang; meshiteta alir aser memeshiteti alir ajaki achitsü akok.

²³Azü dang machitsü kümdangang, kechiaser azüji taküm lir, aser nai takümji shi den machitsüla.

²⁴Nai aji machitsüla; nai aji ali nung tzü ama shitokang.

²⁵KIBUBA nükdang kechi shitak aji nai inyakang, aser ne sülen ne chirtem junga alitsü asoshi nai aji machitsüla.

²⁶“Ne meyong temeshi oset kechisa ali aser ne tatemzükba tenlatemji bener KIBUBAi shimtetdaki oang.

²⁷Ne tarongba tenlatem shi aser azüji tenladak sabang nung KIBUBA ne Tsüngrem dang tenla-ang; aser tetepsetba shiruru züji KIBUBA ne Tsüngrem tenladak sabang nungji shiloktsütsü, aser shiji nai achitsüla.

²⁸Nai KIBUBA ne Tsüngrem madang dang kechi tajung aser shitak, aji inyakdang na, aser ne sülen ne chirtem junga alitsü. Ne dang melaba ajak benshiang aser angang.

²⁹“Kodang KIBUBA ne Tsüngremi nenoki agitsü aoba kintemji nenok jakdang nungi samatsüdir, aser nai parnok atsüngtetdir, aser par linük nung lidir,

³⁰aser parnok sang nung mepudaktsütsü asoshi kümdangang, aser nai parnok tsüngremtem indang asüngdangtepa, iba kini parnok tsüngremtem koda tenzüker, oda nia yamaji inyaktsü ta teshi.

³¹Nai KIBUBA ne Tsüngrem dang yamaji teinyak; kechiaser Tsüngrem madang tesempatsü mapa ajak koba pai sempar aji parnoki pei tsüngremtem asoshi inyakogo. Par tsüngremtem asoshi parnoki parnok jabaso jalatem mi agi rongsetdaktsüogo.

³²“Ni nenok dang kechisa melar, aji nenoki kümdanga benshiang, nai iba nungji tebendenlok mesüra ajema tekümdaktsü.