Read njo TAZÜNGKUNEM 13 Bible Online

TAZÜNGKUNEM 13 - njo bible

TAZÜNGKUNEM 13

¹“Nenok rongnung tiyazü ainkar ka mesüra pungmang pungmanger ka adoka temaitsü ka mesüra sayatenya ka nenok nem agütsüra,

²aser asenoki tangar tsüngremtem shir nai memetet item sülen odi aser nenok tenzükdi ta pai nenok dang ashiba temaitsü mesüra sayatenyaji atalokra,

³nenoki iba tiyazü ainkar mesüra pungmang pungmanger oji mangatsüla; kechiaser KIBUBA nenok Tsüngremi ne mulung ajak agi aser ne nela ajak agi KIBUBA nenok Tsüngremji atangji meimer asü masü aji metettsü nenok tendanger.

⁴KIBUBA nenok Tsüngrem sülen nenoki anitaktsüla, aser pa tsübutsüla, aser pai melabatem benshitsüla, aser pa o angatsüla aser pa dang nenoki tenzüktsüla aser nenoki pa dak akanga azüittsüla

⁵Saka iba tiyazü ainkar mesüra pungmang pungmangerji südaktsütsüla, kechiaser KIBUBA nenok Tsüngrem shibai nenok Ijip alar tia nungi alangzüka anir aru, pa anema pai jembi aser KIBUBA ne Tsüngremi ne dang melaba lenmang nungi nenok anientsü pai meranger. Nenoki temenenji nenok rongnung jentoktsüla.

⁶“Nenui mesüra ne jabasoi mesüra ne jala mesüra nai meimba kinungtsü, mesüra ne tembar chiri na miima mesüzüka, nai mesüra ne tsüraburi memetetba tsüngremtem,

⁷oda na meketa aliba nübur tsüngremtem, na anasa mesüra na nungi talang nung, ali tatem külen nungi külen tatem tashi aliba tsüngremtemji asenoki külemdi ta shira,

⁸nai pa dang haura makatsüla, mesüra pa dang mangatsüla, aser ne tenük agi pa dang maochitsüla, mesüra nai pa takümji mekümzüktsüla.

⁹Saka atangji nai pa tepsettsüla; pa südaktsütsü asoshi pa dak nai tama teka aitsüla, iba sülenjiang tangar teka aitsü.

¹⁰Nai pa lung agi onsettsüla, kechiaser na Ijip alar ki nungi anitetba KIBUBA ne Tsüngrem nungi na anientsü pai bushi.

¹¹Idangji Israel ajaki aji angashitsü aser tsübutsü, aser iba amala mapa tamajung nenok rongnung kodanga meinyaktsü.

¹²“KIBUBA ne Tsüngremi nenok alitsü agütsüba yimti mashi-i ka nung kari yamai ashiba angashia,

¹³nenok rongnung samesa nisung kari oagi yimti nung alir kar mesüzüka, ‘Asenok oa nenoki memetetba tsüngremtemji tenzükdi’ ta shira,

¹⁴idangji nai ibaji kanga junga asüngdangtepa bushitsüla. Aser nenok rongnung iba tesempatsü mapaji inyakogo ta atangji kuli shitak ngutetra,

¹⁵iba yimti nung alirtemji nenoki nok agi meshi meshia samatsütsüla. Idakji aliba nisungtem aser kiset shiruru ajakji nok agi meshi meshia samatsütsüla.

¹⁶Temakzükba oset ajakji nai yimdong tiyongi bener arutsü, aser yimti aser temakzükba oset ajakji KIBUBA ne Tsüngrem dang ajonga arongba tenla ama mi agi rongtoktsüla, aser aji teti asoshi teraksa aser kodanga meyanglushitsü.

¹⁷Idakji menentokba oset kecha ne ket nung malitsüla, anungji KIBUBAi pa anir adokba nungi meyipa nenok dang taochi sayutsü, oda nenok tsüraburtem dang na soyapokyatsü ta nangzükba ama ne dang aria bilemtsü.

¹⁸Tanü ni ne nem agütsüba pa temelabatem ajak nai benshira, aser KIBUBA ne Tsüngrem madang kechi shitak aji inyakra aser KIBUBA ne Tsüngrem ola nai angashira yamaji alitsü.