Read njo TAZÜNGKUNEM 14 Bible Online

TAZÜNGKUNEM 14 - njo bible

TAZÜNGKUNEM 14

¹“Nenok KIBUBA nenok Tsüngrem chirtem asünung, tasürtem atema mang ayimdang nenok sasa maleptsüla mesüra nenok tenütsü mesütoktsüla.

²Kechiaser KIBUBA nenok Tsüngrem atema nenokji temeshi nübur, aser alijak ajak nungi pei nübur asütsü asoshi KIBUBAi nenokji shimtet.

³“Nai tesempatsü oset kecha machitsüla

⁴Item shiruru ya nai achitsü akok: nashi, san, nabong,

⁵mesü, shitsü, ongbang shitsü, shio, arem nashi aser tenem san.

⁶Shiruru kobasa temesüla ana küma rangsar lir aser rem shilu mejaker itemji nai achitsü akok

⁷Aji saka remshilu mejakba aser temesüla rangsaba shiruru rongnung nai itemi machitsüla: ut, azümungshi, shisen, kechiaser remshilu mejak-aka parnok temesüla merangsa, parnokji nenok asoshi memerük lir.

⁸Ano ak-a memerükba shiruru lir, kechiaser temesüla rangsa-aka remshilu memejaker. Item shiji nenoki machitsüla mesüra item tasümang dak nenoki mekongshitsüla.

⁹“Tzü nung aliba shiruru ajak nungi nenoki tashikangjok aser tip aliba ajak achitsü akok.

¹⁰Saka tashikangjok aser tip maliba kecha nenoki machitsüla; aji nenok asoshi memerük lir.

¹¹“Ozü temerük ajak nenoki achitsü akok.

¹²Saka item ya nenoki machitsüla: orija, hogon, ango achiba mongzü,

¹³asür mongzü, osülung, aser mongzü tapu balala,

¹⁴waro tapu balala ajak,

¹⁵Ostrich, ammang mongzü, tzüyim ozü, mongzü tapu ajak,

¹⁶pokpo tulu aser tila, tzü ozü,

¹⁷lisem pokpo, hogon, cormorant,

¹⁸tzü patak, tzü ozü tapu ajak, ungerkentenbong aser lah.

¹⁹Ayazüba shiruru tila tashikang atenba ajak nenok asoshi memerük alitsü, parnokji machitsüla.

²⁰Saka tashikang atenba shiruru kobasa temerük lir itemji nenoki achitsü akok.

²¹ “Pei sasa asüba kecha nenoki machitsüla. Nenoki aji nenok yimti nung alir aener kar nem agütsütsüla, aser pai aji achitsü akok, mesüra aji bendanger kar dang ayoktsü akok, kechiaser nenok KIBUBA ne Tsüngrem asoshi nenokji temeshi nübur lir. “Nenoki nabong chanu tetsü mamatzü nung memetatsüla.

²² “Küm shia ne alu nungi adokba ajak nungi ter shilem agütsütsüla.

²³Nenok tsük, nenok tsükmenatzü yi tasen, nenok totzü aser nenok nashi aser san telok nungi mezüng mepuba item ter shilem ajakji KIBUBA ne Tsüngremi pa tenüng ayutsü asoshi koba tesem shimtetdir, idakji achitsüla, angji nenoki KIBUBA aser Tsüngremi nenok moatsüba nungi ter shilemji bener arutsü mokokra;

²⁴nenoki aji bener marutettsüsa lenmangji kanga talang süra, kechiaser KIBUBA ne Tsüngremi pa alidak shimtetbaji nenok nungi talangka nung oagi lira, idangji KIBUBAi kong nenok moatsüdir;

²⁵nenoki aji sen agi melentsüla, aser iba senji KIBUBA ne Tsüngremi shimtetba tesem jagi bener aotsüla.

²⁶Item sen jagi nai kechisa alitsü mulunger oda nashi pungchi, san, tsükmenatzü yi mesüra yi tesashi, mesüra nai kechisa alitsü mulunger itemji aliang. Aser aji na aser ner kibongi KIBUBA ne Tsüngrem madang achitsü aser pelateptsü.

²⁷Nenok yimti nung aliba Levitem mesendoktsüla, kechiaser nenok den pa shilem mesüra senmang kecha maka.

²⁸“Kümsembuba tatembang shia nenok ter shilem ajak nenok yimtitem nung rizünga ayutsüla,

²⁹aser Levi nunger shir shilem mesüra senmang kecha maka, aser aener tebu malir, amitsür shir nenok yimtitem nung lir parnok arua itemji jangratema achitsü, aser KIBUBA ne Tsüngremi nenoki inyakba mapa ajak nung nenok moatsütsü.