Read njo TAZÜNGKUNEM 15 Bible Online

TAZÜNGKUNEM 15 - njo bible

TAZÜNGKUNEM 15

¹“Küm tenet tatembang shia nai sentsü ajak atoktsüla.

²Aji nai yamai inyaktsüla, taputsür shiai pei kiyonger nem kechisa apuja ali aji atoktsüla. Pai aji pei kiyonger mesüra adianu nungi khangzüka magitsüla, kechiyong techioktsü KIBUBAi sangoktsüogo.

³Aener nungi nai aji meshitsü akok, saka ne adianu kari ne dang sentsü tsüa lira nai aji atoktsüla.

⁴“KIBUBA ne Tsüngremi nenok nem senmangtsü agütsütsü aliba linük nungji pai nenok takar kümdaktsütsü, anungji nenok rongnung sensaker shinga malitsü,

⁵nenoki dang KIBUBA ne Tsüngrem dang angara, aser pa temelaba ozüng ajak koba tanü ni nenok nem agütsüdagi aji kümdanga benshira.

⁶Kechiaser pai nangzükba ama KIBUBA ne Tsüngremi na moatsütsü, aser nai kin aika nem aputsütsü saka nai shinga nungia maputsü. Nai kin aika madak yimsü asütsü, saka parnoki ne madak yimsü masütsü.

⁷ “KIBUBA ne Tsüngremi agütsüba linük nungji nenok yimtitem nung ne adianu kar sensaka lira, ne adianu anema ne mulung meranga teküm mesüra pa nungi ne teka mamreptsüla.

⁸Saka nai ne ket pa dang salatsüla, aser pa tenüngdaktsü kechisa aka ajakji mokoroi aputsütsüla.

⁹Küm tenetbuba sentsü atokba küm anasa lir ta ne mulung nung tamajung bilema pa nüngdak magütsüi teli, ashiko pai KIBUBA dang na anema ayimtentsü aser na tai nung alitsü.

¹⁰ Nai pa nem mulungsoa agütsütsü, aser nai pa nem agütsüdang ne mulung mekuremtsüla; kechiyong ibai asoshi KIBUBA ne Tsüngremi nai kechisa inyakdir ajak nung na moatsütsü.

¹¹Kechiaser alima nung sensaker teti alitsü. Anungji ne adianutem, sensaker aser nüngdakba purtem dang nenok teka sadema salatsü ni nenok dang melar.

¹² “Ne adianu Ibri nunger tebur mesüra tetsür kari pei sasa ne dang yokra pai na küm trok tenzüktsü, saka küm tenetbuba nung nai pa chioktsüla.

¹³Aser kodang nai pa chiokdir nai pa teka tazüng meyoktsüla.

¹⁴KIBUBA ne Tsüngremi na moatsüba yari, pa nem nai mokoroi ne san telok nungi, motsüngnem aser tsükmenatzü menüngdak nungi pa nem agütsütsüla.

¹⁵Khenbo nenoka Ijip alar tia nung liasü, aser KIBUBA ne Tsüngremi nenok alangzük ta bilemtetang. Ibayongji tanü ni nenok nem iba ozüng ya agütsür.

¹⁶“Saka pai ne dang ni ne mapa metoktsütsü ta shira, kechiaser pai na aser ner kibong meim, aser ne dang junga inyak,

¹⁷idangji nai merang shijok ka bena arua kishileni anir arua pa tenarongji tupoktsü, aser paji teti ne lar asütsü. Yamajisa nai alatsür danga inyaktsüla.

¹⁸Nai menungnangi ne mapa nungi pa chioktsüla, kechiaser küm trok nungji ayanger nisung ka ta-a anasü dang nungi talangba pai na tenzükogo, aser nai inyakba ajak nung KIBUBAi na moatsütsü.

¹⁹ “Ne nashi aser san telok nungi mezüng mepuba ajak KIBUBA ne Tsüngrem nem bendanga agütsütsüla. Mezüng mepuba nashi pungchi nem mapa meinyakdaktsütsüla, mesüra mezüng mepuba san züng memejeptsüla.

²⁰KIBUBAi shimtetdak na aser ner kibongi aji küm shia KIBUBA ne Tsüngrem madang aji achitsüla.

²¹Saka shiruru dakji tajitettsü kar lira, oda tetsüng tatsük mesüra tenük tapok, mesüra onsara mejungi tajitettsü kar lira, nai aji KIBUBA ne Tsüngrem nem tenla magütsütsüla.

²²Nenoki aji pei amung kübok achitsüla. Aji meshiteta alir aser memeshiteti alir ajaki achitsü akok, oda mesü aser shitsü shi achiba ama.

²³ Nenoki azü dang machitsüla, aji tzü ama ali nung shitoktsüla.