Read njo TAZÜNGKUNEM 16 Bible Online

TAZÜNGKUNEM 16 - njo bible

TAZÜNGKUNEM 16

¹ “Ahib ita nung KIBUBA dang Süia Aoba benjong mungang, kechiaser Ahib ita nung KIBUBA ne Tsüngremi aonung na Ijip lima nungi anitet.

²Nenoki süia aoba benjong atema san aser nashi telok nungi kong KIBUBA pa tenüng ayutsü shimdir idakji KIBUBA ne Tsüngrem dang tenla-ang.

³Piyazü enokba amtsük nai iba den machitsüla, kechiyong anogo tenet nai iba den piyazü meinokba amtsük oda timtemba amtsük nai achitsüla, kechiaser nenok Ijip nungi ilungseta adok, anungji nenok arishi tepiyong nenoki Ijip toktsüba anogo bilemtettsü.

⁴Nenok alidak kecha nunga anogo tenetnü piyazüji mungudaktsütsüla, aser anogo mezüngnü nikongdang tepsetba shiji anepdang tashi kecha manüngtsüla.

⁵“KIBUBA ne Tsüngremi nenok nem agütsüba yimti kecha nunga nenoki süia aoba benjong tenlaji magütsütsüla,

⁶saka KIBUBA ne Tsüngremi kong pa tenüng ayutsü shidir, yangji nikongdang anü taoi nenok Ijip nungi adokba mapang nenoki süia aoba benjong tenlaji agütsütsüla.

⁷Idakji KIBUBA ne Tsüngremi shimtetdak soruchioka achitsüla. Aser anepdang nenok pei süki dangi meyiptsüla.

⁸Anogo troknü nenoki piyazü meinokba amtsük achitsüla, aser tenetnübuba nung KIBUBA ne Tsüngrem dang temeshi sentep ka alitsü, aser nenoki mapa kecha meinyaktsüla.

⁹ “Nenok tsük nung mezüngbuba ninok yokba nungi tenzüka hapta tenet züngdangang,

¹⁰aser KIBUBA ne Tsüngremi nenok moatsüba yari, ne Tsüngrem dang nisung shiai temulunger tenla agüja hapta benjong amungtsüla,

¹¹ne jala jabasotem, ne kilir aser kilitsürtem, aser nenok yimti nung aliba Levi nunger, aener aser lajar aser amitsür shir nenok rongnung lir, parnok den külemi KIBUBA ne Tsüngremi pa tenüng ayutsü shimtetdak KIBUBA ne Tsüngrem madang nenoki pelateptsüla.

¹²Nenoka khenbo Ijip nung alar süa liasü ta nenoki bilemtettsü, anungji nenoki item telatet ozüng kümdanga benshitsüla.

¹³ “Ne motsüngnem nungi tsük aser tsükmenatzü menüngdak nungi bendener külen anogo tenet sempak benjong amungtsüla.

¹⁴Ne jabaso jala, kilir aser kilitsür, nenok yimti nung aliba Levi nunger, aener, lajar aser amitsür shir nenok rongnung lir, parnok den külemi KIBUBA ne Tsüngrem madang nenoki pelateptsüla.

¹⁵Anogo tenetnü KIBUBAi shimtetdak KIBUBA ne Tsüngrem asoshi benjong ka akatsüla, kechiaser KIBUBA ne Tsüngremi nai züsentetba ajak nung, aser ne keti inyakba ajak nung na moatsütsü, aser ne pelaba teperi akümtsü.

¹⁶“Küm nung asemben tashi nenok tebur ajaki KIBUBA ne Tsüngrem madangi pai shimtetdaki arutsüla, piyazü menokba amtsük benjong, hapta benjong aser sempak benjong nung. Parnoki KIBUBA madangi teka tazüng marutsüla.

¹⁷Nisung shia KIBUBA ne Tsüngremi ne nem moatsüba yari pai akokba agütsütsüla.

¹⁸“Nenok asoshi tanishirtem aser obendangertem nenok kin shia nungi yimti shia shimtsüla, aser parnoki KIBUBA ne Tsüngremi nenok nem agütsütsü aliba nungji ochi agi nüburtem o bendangtsü.

¹⁹ Nai ochi mashiba mapa meinyaktsüla mesüra tejak mereprangtsüla. Nai süpokrem magitsüla, kechiaser süpokrem agi shisa takar tenük pokdaktsür, aser temeshipur o meyipsatsür.

²⁰Ochi aser ochishiba sülen dang nai aotsüla, anungji KIBUBA ne Tsüngremi ne nem agütsütsü aliba linükji nai amangtsü.

²¹ “KIBUBA ne Tsüngrem asoshi tenladak yangluba dak alema nai Ashera ama kecha süngdonga matemtsüla,

²² mesüra nai temeshi tongshi kecha mazüngtsüla, kechiaser itemji KIBUBA ne Tsüngremi sempar.