Read njo TAZÜNGKUNEM 17 Bible Online

TAZÜNGKUNEM 17 - njo bible

TAZÜNGKUNEM 17

¹“Nai KIBUBA ne Tsüngrem nem tajitettsü aketba mesüra tarak aketba nashi pungchi mesüra san tetenla; kechiyong aji KIBUBA ne Tsüngrem madang tesempatsü lir.”

²Nenok rongnung aser KIBUBA ne Tsüngremi ne nem agütsüba yimti nung, pei tezüngzüktepba raksa-a teburi süshia tetsüri süshia KIBUBA ne Tsüngrem madang tamajung inyakra,

³ aser oagi tangar tsüngrem tenzükra, oda ni memelaba, anü mesüra ita, mesüra anüng nung aliba telok külema ngura;

⁴aser aji nenok dang shira, aser nenoki aji angashira, nenoki jungjunga bushiteptsüla, aser ajiang, aji shitak ta kuli adoka oda Israel nung iba ama tesempatsü inyak ta chichia lira;

⁵idangji nenoki tebur süshia tetsür süshia tamajung inyakba nisungji nenok amung atena anir adoka lung agi onsettsüla.

⁶ Nisung ana mesüra asem kuli agi taitsüba nisungji südaktsütsüla.

⁷ Pa südaktsütsü asoshi pa anema kulipurtemi tamasa teka asangtsüla, ajiserang nisung ajaki teka asangtsü; yamaji nenok rongnungi tamajungerji endoktsüla.

⁸“Na asoshi obendang agütsütsü kanga tasak kar arura, azü tokshiba süshia, ozüng tsütsü süshia, osettsüset indang mesüra bangsentep kar adokra, idangji nai aramesoa KIBUBA ne Tsüngremi shimtetdaki atutsüla.

⁹Levi nunger shir putir mapa teinyakdak lir, aser obendanger shir lir parnok dang asüngdangi oang, aser parnoki ne dang item indang obendangba metetdaktsütsü.

¹⁰KIBUBA ne Tsüngremi shimtetdak nungi parnoki kechisa telemtetba ne dang shidir nai yamaji inyaktsüla. Parnoki ne dang kechisa inyaktsü shidir, yamaji nai kanga kümdanga inyaktsüla.

¹¹Ozüngi melaba indang parnoki kechisa ne dang shidir, aser koba obendang telemtetba ne dang shidir, nai yamaji inyaktsüla; koba obendangba parnoki ne dang sayudir iba nungi nai tajichileni mesüra tabeleni memeyiptsüla.

¹²Nisung shibai KIBUBA ne Tsüngrem madang tenzüktsü noktaka aliba putir dangji mesüra obendanger dang mangai, pei sünütsü südir, iba nisungjibo asütsü. Yamaji nenoki Israel nungi temenenji endoktsüla.

¹³Idangji nisung ajaki ya angashitsü, aser tsübutsü aser pei sünütsü dangbo masütsü.

¹⁴ “Kodang KIBUBA ne Tsüngremi nenok nem agütsüba linük jagi nenok arudir aser aji nenok meyong küma lidir, aser nenok meketa aliba kintem ama chuba ka ayutsü ta lemtetdir,

¹⁵KIBUBA ne Tsüngremi nenok adianutem rongnungi shiba shimdir nai paji ne madak chuba kümdaktsütsüla. Ne nübur masüba bendanger ka nai ne madak mayutsüla.

¹⁶ Aji saka pei asoshi pai kor aika mayutsüla, mesüra kor aika ayutsü asoshi pai nüburtemji Ijipi meyoktsüla, kechiaser KIBUBAi nenok dang yamai shiogo, ‘Nenoki ilenjagi kodanga memeyiptsüla.’

¹⁷ Mesüra pa mulung meyipa aotsüsa pai kibutsü aika mayutsüla, mesüra taribi aser hon jenti merizüngtsüla.

¹⁸“Kodang pai chuba menden nung mendir, Levi putirtem madang aliba ozüng nungi pai pei asoshi iba ozüng ya kaket lung ka nung zülutsüla.

¹⁹Ibaji pa den ayutsü aser KIBUBA pa Tsüngrem tsübutsü, aser iba telatet ozüngji benshitsü aser kümdanga inyaktsü asoshi pai aji pa taküm tepiyong azüngtsüla;

²⁰aser pei mulung nung pei adianutem den pa tajungba ta mebilemtsü, anungji pa aser par chirtem maneni talangka pa yimli nung alitsü asoshi iba temelaba nungi pai tajichileni mesüra tabeleni memeyiptsüla.