Read njo TAZÜNGKUNEM 19 Bible Online

TAZÜNGKUNEM 19 - njo bible

TAZÜNGKUNEM 19

¹ KIBUBA ne Tsüngremi nenok nem agütsüba linük nung kintemji kodang KIBUBA ne Tsüngremi samatsüdir, aser nai parnok atsüngteta parnok yimtitem aser ki nung lidir,

²KIBUBA ne Tsüngremi ne nem agütsüba linük tiyongtsü nung yimti asem na asoshi balaka yuang.

³KIBUBA ne Tsüngremi ne nem amangdaktsüba linükji shilem asem küma lemsa-ang aser idakji lenmangtem yangluang, anungji nisung tepseter shia ajagi jena aotsü.

⁴Nisung tepseter shibai pei taküm kümzüktsü idakji jenokdir yamai alitsü, shibai akhidang sempatepa maliba tangar nisung ka tepsetdir,

⁵oda kodang nisung kati pei kiyonger den süng alentsü aremi odir, aser süng alendang pubang nungi pu adoka tangar dakji merepshira aser pa süadokra, iba nisungji item yimtitem ka nung jenoka alitsü.

⁶Aji oda mesüra azü tokshiba mang ayanger jagi mit adoka lenmang talang asünung nisung tepseter takümji tasütsü langa meliaka; kechiaser pai akhidang paji sempa-a maliasü pa takümji agiadoktsü.

⁷Aji asünung nenok asoshi yimti asem balaka ayutsü ni ne dang melar.

⁸KIBUBA ne Tsüngremi nenok tsüraburtem dang ne litsü ulushitsütsü azüngashiba ama aser pai nangzükba ama alima ajakji nenok nem agütsüra;

⁹tanü ni ne dang melaba ajak kümdanga benshira, KIBUBA ne Tsüngrem meimtsü aser Pa lenmang nung teti jajara, idangji item yimti asem dak alaka nai ano yimti asem enoktsü akok.

¹⁰Anungji KIBUBA ne Tsüngremi senmangtsü agütsüba linük nung tai makaba zü metokshitsü, aji mesüra azütokshiba tai ne dak enloktsü.

¹¹Saka nisung kari pei kiyonger sempa-a pa asoshi mita atar, pa anema apusoa tasütsüsa züker, item yimtitemji ka nung jenokra,

¹²idangji yimti nung tamburtemi pa idak nungjagi anir arutsü, aser pa südaktsütsü asoshi azü tokshiba mangyanger ket nung bendanga agütsütsüla.

¹³Nai pa dang maochitsüla, saka tai makaba zü tokshiba temenen Israel nungi agientsüla, anungji ne den junga alitsü.

¹⁴ “KIBUBA ne Tsüngremi nenok alitsü agütsüba nenoki amangtsü aliba linük nungji akhidang tejen nisungtem ne kiyonger den yanglua akaba arrtsüji nai magientsüla.

¹⁵ “Ozüng raksaba mesüra tai menaba nisung ka anema kuli ka agi dangbo maitsütsüla. Ibaji kuli ana mesüra asem agi aitsütsü akok.

¹⁶Tiyazü kuli kar agi nisung ka tai inyakba anema aitsüra,

¹⁷mangatettep adokba nisung anapronglaji KIBUBA madang, Putir aser iba mapang aliba obendangertem madang noktaktsüla.

¹⁸Obendangeri aji kanga junga bushitsüla, aser pei adianu anema agütsüba kuliji tiyazü ta bushitetra,

¹⁹idangji pai pei adianu dak inyakang. Yamaji nai nenok rongnungi temenenji endoktsüla.

²⁰Aser anünga alirtemi aji angashia tsübutsü, aser yamala temenenji nenok rongnung kodanga meinyaktsü.

²¹ Nai taochi mesayutsüla, taküm melen taküm, tenük melen tenük, tepu melen tepu, teka melen teka, tetsüng melen tetsüng.