Read njo TAZÜNGKUNEM 2 Bible Online

TAZÜNGKUNEM 2 - njo bible

TAZÜNGKUNEM 2

¹ “Ajiser KIBUBAi kü dang ashiba ama temerem tzüyim tsütsü aremi asenok meyipa mapang talangka Seir tenem meketa senzü.

²“Idangji KIBUBAi kü dang ashi,

³‘Nenoki iba tenem meketa jajashia jajaogo; anüdoklentip leni meyipang.

⁴ Nüburtem dang mela-ang, Seir nung aliba nenok adianu Esau chirtem arrtsü atena aotsü tatonger lir, parnoki nenok tsübutsü. Anungji kanga kümdangang;

⁵Parnok den terara, kechiaser parnok li nungi ni nenok tetsüng ajemetdak kata magütsütsü, kechiyong Seir tenemji ni Esau nem senmang asoshi agütsüogo.

⁶Nenoki parnok nungi sen agi tachitsü aser tajemtsü tzü alitsü.’

⁷“Kechiaser KIBUBA nenok Tsüngremi nenok teka mapa ajak moatsüogo. Iba arem tulu ajanga nenok senzüba ajak nung pai nenok nüka liasü. Item küm lir tashi KIBUBA nenok Tsüngrem nenok den liasü, aser nenok kecha agia anünga maliasü.

⁸“Anungji Seir nung aliba asen adianu Esau chirtem ajanga asenok Seir Elat aser Ezion Geber nungi asenok Araba lenmangi asenok meyipa aser Moab arem len ajanga ao.

⁹ Idangji KIBUBAi kü dang ashi, ‘Moab den tanem mesüra rara temena, kechiaser ni parnok li nenok nem senmang kecha magütsütsü. Ni aji Lot chirtem nem senmang asoshi Ar agütsüogo.’ ”

¹⁰Mezüngbo idakji Anak nisungtem ama Emim nisung telok tuluka, nütsüng aika yangji liasü.

¹¹Anak nisungtem dang ama parnok dang Refaim[1] ta aja, saka Moab nungeri parnok dang Emim ta aja.

¹²Seir nung tamasabo Hor nunger liasü, saka Esau chirtemi parnokji atsüngdok, aser parnok jakdang itemji samatsür parnok idakji ali; oda KIBUBAi agütsüba alinük nung Israeli inyakba ama.

¹³“Tang aramesoang aser Zered ayongji ajanga oang, aser asenoki Zered ayongji ajang.

¹⁴ Asenoki kadesh-Barnea nungi apusor Zered ayong ajangba tashi nung küm semer-ti süiogo. KIBUBAi azüngashiba ama iba mapang tashi nung parnok putu rarai aortem ajak tanendak sama.

¹⁵Talisa parnok ajakji meshimeshia mesamatsü tashi par tanendak anema KIBUBA teka liasü.

¹⁶“Anungji nübur rongnungi rarai aor ajak samadaktsür külen

¹⁷KIBUBAi kü dang ashi,

¹⁸ ‘Tanü nenoki Moab arrtsü Ar ajangtsü.

¹⁹Kodang Ammon nunger arrtsü anasai nenok arudir, parnok tanem mesüra rara temena, kechiaser Ammon nunger li nungi nenok nem ni senmang kecha magütsütsü. Ni aji Lot chirtem nem senmang asoshi agütsüogo.’ ”

²⁰Iba dang ano Refaim linük ta jaa liasü, kechiaser akhidangbo Refaim nunger yangji liasü, saka Ammon nungeri parnok dang Zamzummim ta aja.

²¹Parnokjia Anak nübur ama tashi tait aso talang nütsüng aika liasü, saka KIBUBAi parnok jakdang itemji samatsü. Aser parnoki itemji atsüngdoker par alidak ali.

²²Seir nung alirtem Hor nunger dak Esau chirtem jakdang KIBUBAi inyakba ama pai parnokji aridoker idakji tanü tashi parnok lidaktsü.

²³Aser Avim nunger Gaza yimtsüng tashi aliba Kaftor nungi arurtem Kaftor nungertemi parnok samatsü aser parnok alidak ali.

²⁴“Aramesoang, aser Arnon lenten ajanga oang. Ajiang, Amor nunger Heshbon chuba Sihon aser par linük ni nenok ket nung agütsüogo; par linükji amaktsü tenzükang aser pa tongbangi jazükang.

²⁵Tanü nungi tenzüka anüng kübok alir nisung ajak dangi nenok indang taoksatsü aser tetsübutsü enloktsütsü. Kodang parnoki nenok indang osang angashidir, atententsü aser nenok meji temulung ayanga alitsü.

²⁶“Anungji Kedemot lisem lima nungi osangbenertem Heshbon chuba Sihon dangi yimjung bener yoka ashi,

²⁷‘ni ne lenmang ajanga odakjang. Ni lenmang nungji dang aotsü. Ni tajichilen mesüra tabeleni memeyiptsü.

²⁸Nai kü dang sen yong chiyungtsü ayoktsü aser ni itemji achitsü, aser nai kü dang tajemtsü asoshi tzü sen yong ayoktsü aser ni aji ajemtsü, oda ni dang ne arrtsü ajanga tetsüng agi jaja-a odakjang.

²⁹KIBUBA onok Tsüngremi onok nem agütsüba alinüki Yordan ajanga onok mao tashi Seir nung aliba Esau semchirtemi, aser Ar nung aliba Moab nungertemi onok dang inyakba ama.’

³⁰“Saka Hesbon chuba Sihoni pa alinük ajanga asenok mesüidaktsü. Kechiaser KIBUBA nenok Tsüngremi pa tekong merangdaktsü aser anema noktakdaktsü, oda tanü nenok ket nung pa bendanga agütsüba ama, oda pai tang inyakba ama.

³¹“Idangji KIBUBAi kü dang ashi, ‘Ajiang, Sihon par linük ni ne nem agütsütsü tenzükogo. Par limaji amangtsü asoshi aji agitsü tenzükang.’

³²Kodang Sihon aser pa nüburtem ajak asenok anema noktak, Yahaz nung tongbangi adok,

³³KIBUBA asenok Tsüngremi asenok nem pa bendanga agütsü; aser asenoki pa, par jabasotem aser pa nübur ajak tepset.

³⁴Iba mapang nung asenoki pa yimti ajak agi, aser shinga taküm metoktsüi tebur, tetsür aser tanur ajak meshi meshia tepset.

³⁵Saka asenoki maktetba yimtitem nungi taküm shirurutem aser temakzükba oset ajak asenoki agi.

³⁶Arnon lenten tatem nung aliba Aroer nungi lenten nung aliba yimti, oda Gilead tashi asenok asoshi yimti ka danga tashi ita maliasü. KIBUBA asen Tsüngremi item ajak asenok nem agütsü.

³⁷Saka KIBUBA asen Tsüngremi memela nung nenoki Ammon nunger linük anasa mesüra Yabbok ayong tsütsü mesüra tenem linük anasai maru.