Read njo TAZÜNGKUNEM 20 Bible Online

TAZÜNGKUNEM 20 - njo bible

TAZÜNGKUNEM 20

¹“Kodang ne tsükchirtem anema na tongbangi odir aser kor, talungtsü aser nisungtemji ne dang timba ta nai ngudir, parnokji tetsübuma, kechiaser Ijip nungi na anitetba KIBUBA ne Tsüngrem ne den lir.

²Kodang na tongbangi odir, putir tejakleni arur nüburtem den jembitsü.

³Pai yamai ashitsü, ‘Angang, Oh Israel, tsükchirtem anema tanü nenok tongbang odagi. Nenok temulung ajema tekümdaktsü mesüra tetsübu. Parnok tsüngdang tatenten mesüra taoksa,

⁴kechiaser KIBUBA ne Tsüngrem nenok den odagi, pai nenok asoshi tsükchirtem den raratsü aser nenok kümzüktsü.’

⁵Ajiser tanishirtemi nübur dang ashitsü, ‘shibaisa ki tasen yanglur aji memeshitet lir, pai kidangi meyipa aotsü akok, aji oda mesüra pa tongbang nung süra, tangar nisungi aji meshitettsü.

⁶Shibaisa tsükmenatzü tema yur iba nungi süngjang mechidang? Pa kidangi meyipa aotsü akok, aji oda mesüra pa tongbang nung süra, tangar nisungi süngjangji agitsü.

⁷Shibasa tetsür asünga lir, saka la den ki meyimi lir? Pai kidangi meyipa aotsü akok, aji oda mesüra pa tongbang nung süra tangar nisungi la agitsü.

⁸Aser tanishirtemi nübur dang ano ashitsü, shibaisa tsübur aser temulung lula-a küma lir? Pa kidangi meyipa aotsüla; aji oda mesüra pa medemer pa ama temulung lula-a akümtsü.’

⁹Tanishirtemi nübur dang jembiba atemdang nübur madak temeranger arkotong parnoki shimtsüla.

¹⁰“Kodang nai yimti ka anema raratsü arudir, yimjung yanglutsü mela-ang.

¹¹Parnoki aji agizüka par süngkhüm lapoktsüra, idakji aliba nisung ajakji nenok kübok lia nenok tenzüktsü.

¹²Saka parnoki yimjung yanglutsü memulungra aser ne den rarara, iba yimtiji amaktsüla.

¹³Kodang KIBUBA ne Tsüngremi aji ne nem bendanga agütsüdir, nai tebur ajak nok agi tepsettsüla.

¹⁴Saka tetsür aser tanurtem, shiruru aser yimti nung aliba ajak temakzükba ama nai agitsü akok, aser KIBUBA ne Tsüngremi ne nem agütsüba tsükchir meyong temakzükbaji nai achitsü.

¹⁵Yimti koba na anasa aliba kintem meyong masü, na nungi talang nung oa aliba yimti ajak dang nai yamaji inyakang.

¹⁶“Saka KIBUBA ne Tsüngremi ne nem senmangtsü agütsüba yimtitem nungji nai taküm ka danga teyutsü.

¹⁷Saka KIBUBA ne Tsüngremi ne dang melaba ama, Hit nunger, Amor nunger, Kanan nunger, Periz nunger, Hiv nunger aser Yebus nunger ajak nai samatsütsüla.

¹⁸Aji oda mesüra parnoki par tsüngremtem tesempatsü mapa inyakba ajak nenok dang sayutsü aser nenoki KIBUBA ne Tsüngrem anema temenen menatsü.

¹⁹“Kodang nai yimti ka agitsü asoshi mapang talangka aji makbangdir, idakji aliba süngdongtem nenoki pu bener oa malentsüla, kechiaser moapu nung aliba süngdongji nai nisung ama mokbangtsü ama?

²⁰Saka süngdong kobasa tejang matangba süngdong ta nai meteta lir, itemji nai samatsütsü aser lensüktsü aser item nungjagi yimtiji melao tashi ne den raraba yimti anema nai meketa tenokdangtsü yanglutsü.