Read njo TAZÜNGKUNEM 21 Bible Online

TAZÜNGKUNEM 21 - njo bible

TAZÜNGKUNEM 21

¹“KIBUBA ne Tsüngremi na alitsü agütsüba lima nungji moapu nung nisung kar, shibai zükset aji memeteti mepitaka ngura,

²nenok tambur aser obendanger aotsüla, aser pa tepsetba temeket yimtitem kopiga aji asadangtsüla,

³aser tasü mang anatiba nung aliba yimti tamburtemi mapa meinyakdangba aser alu maladangba nashi ka agitsüla.

⁴Iba yimti tamburtemi kodanga alu mayimba metsü meyokdangba tzü yima alidak lenten kati anir alutsü, aser lenten nungji nashi tekongji raksatsütsüla.

⁵Aser Levi jabaso putirtemi anasa arutsüla, kechiyong parnoki pa tenzüktsü, aser pa tenüng nung moatsütsü KIBUBA ne Tsüngremi parnok shimtet, aser yamaji rongrong ajak aser züktepba ajak parnoki bendangtsü.

⁶Aser iba yimti tambur ajak shir tasü mang anasa alir, lenten nung nashi tekong raksaba manung teka metsüktoktsü.

⁷Ajiser parnoki ya oda ashitsü, ‘Onok teka agi iba zü metokshi, mesüra onok tenük agi ibai inyakya munguka;

⁸ne nübur Israel shirnok nai kümzük tai tokang, Oh KIBUBA, aser tai makaba zü asoshi ne nübur Israel rongnung ataloka teyutsüma.’ Aser parnok dang azü tokshiba tai atoktsü.

⁹Yamaji KIBUBA madang kechi shitak lir aji nai inyak dang tai makaba zü nenok rongnungi meshitettsü.

¹⁰“Kodang ne tsükchirtem anema na tongbangi odir, aser KIBUBA ne Tsüngremi ne ket nung parnok agüja nai parnok tepuoker kümdaktsüdir,

¹¹aser tepuokertem rongnungji tobur tajung tetsür ka ngua nai aginüra, laji ne kibutsü asütsü agitsü akok.

¹²Laji ner kidangi anir arua, la ku mejeptoktsü aser temezüng lentoktsü,

¹³aser lai tepuoker süoshi endoktsü, aser la tebu aser tetsü asoshi ita ka mang yima alitsü, iba sülenjiang nai la dangi aitsü aser la ne kinungtsü asütsü.

¹⁴Saka nai la maginüra, la onüleni la odakjang. Nai la sen yong mayoktsüla, mesüra alatsür ama mebenshitsüla, kechiaser nai la maksüdaktsüogo.

¹⁵“Nisung ka kibutsü ana lira, pai ka dang meimer saka ka dakbo pai memeimer, aser tenapronglai pa nem jabaso sotsü, saka pa mezüng jabasoji pai memeimlai tama aso,

¹⁶kodang pei jabasotem nem pei senmang agütsüdir, pai pei mezüng jabaso senmangji pai memeimlai asoba jabasoji shiba tama aso ibaji paitoker pai meimlai asoba nemji pei mezüng jabaso senmangji agütsütsüla.

¹⁷Pai memeimlai asoba pei mezüng jabaso nemji pei akaba senmangji shilem anasü agütsütsüla. Kechiaser ibaji pei mezüng tashi tenzükbaji lir. Mezüng asoba jabaso senmangji pa meyong lir.

¹⁸“Nisung kar jabaso tekong temerang aser tashi manga, oda pei tebu mesüra tetsüi arüjaka parnok dang tashi mangai lira,

¹⁹pa tebu aser tetsüi par yimti tamburtem dang süngkhümi pa anir arutsü.

²⁰Aser parnoki yimti tamburtem dang ashitsü, ‘Ozü jabaso ya tekong temerang aser tashi mangar. Pai onoki ashiba mangar. Pa chidiyungdi aser yi agi mesepba nisung lir.’

²¹Idangji yimti nung aliba nisung ajaki pa lung agi onseta südaktsütsüla. Nenok rongnungi nenoki temenenji endoktsüla, aser Israel ajaki ya angashia tsübutsü.

²²“Nisung kari tasütsü temsüa temenen menara, aser paji süngdong ka nung soseta südaktsür,

²³pa temangji ammang tepiyong süngdong nungji mayutsüla, saka kasa anogo nungjisa pa remadoktsüla. Kechiaser shibasa soseta südaktsüdir, pa Tsüngrem atakatem kübok lir. KIBUBA ne Tsüngremi nenok senmangtsü agütsüba linük nenoki memenentsüla.