Read njo TAZÜNGKUNEM 22 Bible Online

TAZÜNGKUNEM 22 - njo bible

TAZÜNGKUNEM 22

¹ “Ne adianu nashi pungchi mesüra san len aia aoba ngura, nai aji metoktsütsüla, saka itemji pa dangi anir aotsüla.

²Saka ne adianuji na anasa melira, mesüra aji shir meyong nai memetetra, nai parnokji ner kidangi anir arua pai aji bushia maru tashi ayutsüla. Aser pa nem aji meyipa agütsütsüla.

³Yamajisa ne adianu Gado mesüra süoshi mesüra pa samaba kechisarena atema inyaktsüla. Nai itemji mereprangi metoktsütsüla.

⁴“Nai ne adianu meyong Gado mesüra nashi pungchi lenmang nung laoa ngura nai aji mereprangi metoktsütsüla. Shiruruji pei tetsüng agi menoktaktet tashi yariang.

⁵“Tetsür kati tebur süoshi mesobutsüla, mesüra tebur kati tetsür süoshi mesobutsüla, kechiaser shibaisa yamalaji inyakdir KIBUBA ne Tsüngrem madang tesempatsü lir.

⁶“Ne lenmang nung ozü sep ka süngdong nung mesüra ali nung aliba ngura, aser tetsütiji techanu manung mesüra entsü manung muka lira,

⁷nai techanuji agitsü akok saka tetsütijibo odaktsütsüla; angji na junga aser arishi langa alitsü.

⁸“Kodang nai ki tasen ka südir, kilemji meketa tetaktangtsü yangluang, anungji nisung kar kilem nungjagi tsükra iba taiji ner kibong madaki bena marutsü.

⁹ “Nai ne tsükmenatzü lu nung metsü tapu ana meproktsüla, nai yamaji inyakra nai prokba metsü aser tsükmenatzü anapronglaji menenadoktsü.

¹⁰“Nai nashi pungchi aser gado külemi alu maladaktsütsüla.

¹¹“Nai tezüngsü aser kümpa sü na külemi taktepba sü mabentsüla.

¹² Nai abenba sü nungji kinük pezüsülen sütsüng yangluang.

¹³“Nisung kati tetsür ka agia la den medemer külen laji maginüi,

¹⁴maksü mapa la dak enlokja la tenüng menükdakja, ‘Ni iba tetsür agi, aser ni la anasa arudang ni la dak tasüngtet aiür yimya mangu’ ta shira,

¹⁵idangji aiürla tebu aser tetsüi yimti tamburtem dangi süngkhümi laji tasüngtet ta kuli sayua anir arutsü.

¹⁶Aiürla tebui tamburtem dang ashitsü, ‘Ni kü jala iba nisung nem kibutsü asütsü agütsü, saka pai la sempar,

¹⁷aser ajiang pai la maksüdakja ashi, ni ner jala dak tasüngtet aiür yimya mangu. Saka ibai kü jala tasüngtet aiür yimya kuli lir.’ Aser parnoki yimti tamburtem madang sü lema toktsütsü.

¹⁸Aser yimti tamburtemi nisungbaji anir arua pa dak azüktsü.

¹⁹Parnoki pa dang senchi taribi, noklang ka achitsü, aser aiürla tebu nem aji agütsütsü, kechiaser iba nisungi Israel tasüngtet aiür madak tenüng tamajung bena arutsü. La pa kibutsü asütsü aser pa taküm ali tashi la paladoktsü makok.

²⁰“Saka aji shitak ta putetra, oda la dak tasüngtet aiür yimyaji mungura,

²¹laji pei tebuer kishi-i anir adoka la yimti nüburtemi lung agi onseta südaktsütsüla, kechiaser la tebuer kidang nüktapangta inyakba ajanga Israel nung temenen benshi. Anungji nai nenok rongnungi temenenji endoktsüla.

²²“Nisung kati tangar kinungtsü den nüktapangtaya ngura, tetsür shiba den tebur medem, aser tebursang den medemba tetsür tenapronglaji asütsü, yamaji nai Israel nung temenenji endoktsüla.

²³“Aniasünga aliba tetsür kar tebur kati yimti nung ajurua, la den nüktapangtara,

²⁴nai tenapronglaji yimti süngkhümi anir adoka lung agi onsettsüla, tetsürlaji yimti nung liaka lai teyari asoshi mayimten, aser tebursangi pei kiyonger kinungtsü ka aibelendaktsü. Yamaji nai nenok rongnungi temenenji endoktsüla.

²⁵“Saka aniasünga aliba tetsürji tebursang jagi alu nung ajurua la dak tashiyim amshia la den medemra, idangjibo tebur shibai la den medem paji dang asütsü.”

²⁶Tetsürla dak nai kecha teinyak, lai tasütsüsa temenen kecha meinyak, kechiaser ibai nisung kati pei kiyonger anema apusor pa tepsetba ama dang lir.

²⁷Kodang aniasünga aliba tetsürji pai alu nung angu, lai ayimten, saka la kümzüktsüsa yangji shinga maliasü.

²⁸Nisung kati tasüngtet aiür ka shiba ano aniasünga mali, la ngua tashiyim agi la den medemra aser parnokji putetra,

²⁹pai aiürla tebu nem senmen taribi shekel tenem agütsütsüla aser la pa kibutsü asütsü, kechiaser pai la raksatsü. Pa arishi tepiyong pai la paladoktsü makok.

³⁰“Nisung shingaia pei tebu kinungtsü magitsüla, pai pei tebu yipten memenentsüla.”