Read njo TAZÜNGKUNEM 23 Bible Online

TAZÜNGKUNEM 23 - njo bible

TAZÜNGKUNEM 23

¹“Tebur shiba pei miim oset menüngrepa mesüra rangtoker ali, pa KIBUBA sentepi maitsü.

²“Kita chiri KIBUBAr sentepi maitsü; terbuba putu tashi pa dak jakzükba pur shingai KIBUBAr sentepi maitsü.

³ “Ammon nunger mesüra Moab nungeri KIBUBAr sentepi maitsüla; putu terbuba tashi parnok shinga KIBUBAr sentepi maitsü.

⁴ Kechiaser nenok Ijip nungi adokdang parnoki chiyungtsü aser tzü bener nenok lenji maru; aser nenok atakatemdaktsütsü asoshi Mesopotamia nung aliba Pethor nungi Beor jabaso Balaam parnoki a-a.

⁵ Aji saka KIBUBAi Balaam o manga, saka KIBUBA ne Tsüngremi atakatemji na asoshi temoatsü kümdaktsü, kechiaser KIBUBA ne Tsüngremi na meim.

⁶Nai ne taküm tepiyong parnok den yimjung aser tembar meyanglutsüla.

⁷“Nai Edom nunger mesempatsüla, kechiaser pa nenok sosem lir. Nai Ijip nunger mesempatsüla, kechiaser par lima nung na aener liasü.

⁸Putu asembuba nung asoba parnok chirtemi KIBUBAr sentepi aitsü akok.

⁹“Kodang nai ne tsükchirtem anema apusodir, temenen mapa ajak nungi meshiteta alitsüla.

¹⁰Nenok rongnung nisung kar aonung yimtokba agi memerüki kümra, pa tanendak nungi adokadoktsüla, pai tanendaki maitsüla.

¹¹Saka kodang nikongdang arudir pai tzü chigutsüla, aser anü yir külen pa tanendaki arutsü.

¹²“Ano tanendak kimalen metsümeshidak ka akatsüla, aser nai ajagi aotsüla.

¹³Ne nok o nü rongnung ali atepba ka alitsüla, aser kodang na tanendak kimalen metzü-meshidir, nai aji agi aliji atutsüla aser nai endokbaji nembanga yutsütsüla.

¹⁴Kechiaser KIBUBA ne Tsüngrem nenok kümzüktsü aser ne tsükchirtem nenok ket nung bendanga agütsütsü asoshi nenok tanendak senzür. Nenok tanendakji meshiteta alitsüla, anungji pai nenok rongnung memeshiba mangutsü aser meyipa maotsü.

¹⁵“Alar kar pei kibur nungi jena arua ne den lira, nai pa kibur nemji magütsütsüla.

¹⁶Nenok rongnung pai linüdak, aser pai koba yimti nung alitsü mulunga shimtetdir yangji pa ne den lidakjang; nai pa dak tamajung mebenshitsüla.

¹⁷ “Israeltsür süshia Israel tebur süshia shinga tekülemdak nüktapangtar makümtsüla.

¹⁸KIBUBA ne Tsüngrem kidangi tatemzükba tenla asoshi tetsür kati mesüra tebur kati nüktapangta mapa nungi taa anguba sen kecha bener marutsüla, kechiaser KIBUBA ne Tsüngrem madang anaprongji tesempatsü lir.

¹⁹“Ne adianu dang tetemlok, oda sen nung süshia chiyungtsü mesüra aputepa agiba kechisarena nung tetemlok keter maputsütsüla.

²⁰Bendanger ka dang nai tetemlok agi aputsütsü akok, saka nai koba lima agitsü yidagi idakji KIBUBA ne Tsüngremi na moatsütsü asoshi pei adianu nem nai tetemlok keter maputsütsüla.

²¹ “Kodang nai KIBUBA ne Tsüngrem dang langka atemzükdir, aji nai memenui agütsütsüla, kechiaser KIBUBA ne Tsüngremi atangji aji na nungi agitsüsa, aser aji na asoshi temenen alitsü.

²²Saka nai matemzüki lira na asoshi aji kecha temenen malitsü.

²³Ne tebang nungi kechisa jembizüka yokogo nai aji inyaktsüla, kechiaser nai ne mulung agi KIBUBA ne Tsüngrem dang atemzükogo.

²⁴“Kodang pei kiyonger tsükmenatzü lui na idir, tsükmenatzü jangji nai chinüba ama achitsü akok, saka nai ne molok nung kecha meinoktsüla.”

²⁵Kodang ne kiyonger tsük lui na idir nai ne teka agi tsükjongji meta achitsü akok, saka ne kiyonger tsük noktaka aliba dakji nai ninok meyoktsüla.