Read njo TAZÜNGKUNEM 24 Bible Online

TAZÜNGKUNEM 24 - njo bible

TAZÜNGKUNEM 24

¹ “Tebur kati tetsür ka den kibong kümer külen la dak langka tajitettsü adokba yong lai pa mepeladaktsüi kümadokra, pai la nem tepalaba shiti ka zülur la ket nung agütsür par ki nungi la yoktsü,

²aser la par ki nungi pilaa or tangar nisung ka kibutsü kümra,

³aser tanabuba kinungpu jagi la anema mepelai kümadokra, pai la nem tepalaba shiti zülur la nem agütsür par ki nungi yokadokra, mesüra pa süadokra,

⁴idangji la mezüng kinungpu shibai la paladok, lai memerüki aküm nungji pai la tanaben agitsü makok. Kechiaser KIBUBA ne Tsüngremi ne nem senmangtsü agütsüya aliba limaji nai memenendaktsütsüla.

⁵“Kodang tebur kati tetsür tasen ka agidir, pa tongbangi maotsüla, mesüra pa nem mapa kecha magütsütsü. Küm kabo pa kidang sadem sadema lidaktsütsüla aser pai agiba tetsürji pelaa lidaktsütsüla.”

⁶“Shingaia temenüngba lung mesüra temenüngba lungpak temaba agi azüngashi masütsüla, ashiko pai aji taküm ka agi azüngashir asütsü.

⁷ “Nisung kati pei nisung Israel chirtem kar auya-a, aser pa dang alar ama benshiba mesüra ayokba putetra, nisung auyasangji asütsüla, Yamaji nenok rongnungi nai temenenji endoktsüla.

⁸ “Zütsüra adokra Levi putirtemi nenok dang kechisa sayudir itemji nendaka inyaktsü kümdangang. Ni parnok dang melaba ama nenoki itemji kümdanga benshitsüla.

⁹ Nenok Ijip nungi adokdang lenmang nung KIBUBA ne Tsüngremi Miriam dak kechi inyak bilemtetang.

¹⁰ “Kodang ne kiyonger nem nai langka aputsüdir, pai azüngashir apuba osetji abeni nai par kidangi maitsüla.

¹¹Na kima atatsüla, aser shiba nem nai aputsü pai azüngashiba osetji ne dangi bener adoktsü.

¹²Nisungbaji sensaker süra pai azüngashiba oset nungji nai memejangtsüla.

¹³Kodang anü yidir nai pa nem pei osetji meyipa agütsütsüla, anungji pa iba nungji mejangtsü; aji na asoshi KIBUBA ne Tsüngrem tsüngdang temeshiba ama alitsü.

¹⁴“Nai ne linük yimtitem nung alir ne adianu süshia aener süshia sensaker, anüngakonger aser shiba ayanger lir pa mekangshitsüla.

¹⁵Anü maidangsa nai pa anogoshia taaji agüjang, kechiaser pa sensaker asünung aji imlaseta lir.

¹⁶ “Chirnur asoshi tsürabur mesüdaktsütsüla, mesüra tsürabur asoshi chirnur mesüdaktsütsüla, nisung shia pei temenen asoshi südaktsütsü.

¹⁷“Aener mesüra lajar anema nai ochibaji metusatsütsüla, mesüra amitsür süoshiji nai kuli mesüa teyu,

¹⁸saka Ijip nung na alar süa liasü, aser KIBUBA ne Tsüngremi idak nungjagi na alangzük ta bilemtetang.

¹⁹ “Kodang nai ner lu rudir, aser alu nungji nai tsükpong ka amadokdir, nai aji abentsü maotsüla, aji aener, lajar aser amitsür asoshi alitsü, anungji nai inyakba ajak nung KIBUBA ne Tsüngremi na moatsütsü

²⁰Kodang ner oliv dong nungi süngjang ongdir, süngsang bushia tanaben maotsüla, aji aener, lajar aser amitsür asoshi alitsü.

²¹Kodang ner tsükmenatzü jang bendendir, nai tanaben ajagi maotsüla; aji aener, lajar aser amitsür asoshi alitsü.

²²Na Ijip nung alar süa liasü ta bilemtetang. Anungji ni ne dang ibai inyaktsü melar.