Read njo TAZÜNGKUNEM 25 Bible Online

TAZÜNGKUNEM 25 - njo bible

TAZÜNGKUNEM 25

¹“Kodang nisungtem rongnung mangatettep adokdir, parnoki aji obendangdaki bener arutsü, aser obendangertemi parnok o bendangtsü aser parnoki ochishisangji metendaktsütsü, saka aibelena alisangji aitsütsü.

²Taisang dakji azüktsü temsüa lira, obendanger jakdang paji ali nung mepitaka yutsütsü aser pai aibelenba yari pa dak zükdaktsütsü,

³ saka pai lirben dak tali azüktsü melatsü makok. Iba dak alia pa dak zükdaktsüra, nai ne adianu ne nükdang ludaktsür.

⁴ “Nashi pungchi mo anetdang nai tebang tenembang.

⁵“Adianu külemi aliba mapang parnok rongnung kar techir meyutsü südokra, tasüba kinungtsüji aener ka den kibong mekümdaktsütsüla. La tebuba adianui la agitsü aser kibong küma la dang adianu kinungpur ka teinyaktsü mapa inyaktsü.

⁶Lai asoba mezüng jabasoi tasüba adianuji melentsüla, anungji Israel nungi pa tenüngji meindoktsü.

⁷ “Saka nisungba jagi pei adianu kinungtsüji maginüra, idangji lai yimti süngkhüm nung tamburtem dangi oa ashitsü, ‘Kü kinungpu adianui pa adianu tenüng Israel nung ayutsü memulunger; pai kü dang pei adianu kinungpur teinyaktsü mapa meinyakli asür.’

⁸Idangji yimti tamburtemi pa jar jembitsü, saka pai memulungi, ‘Ni la agitsü memulunger’ ta shira,

⁹idangji pei adianu kinungtsüi Israel tamburtem tsüngdang pa dangi tur pa tetsüng nungi tsüngsem semzüktsütsü aser pa tejak nung metsü metsülokja ashitsü, ‘Nisung shibai pei adianu kibong tarensen meyanglunür, pa dang iba amai inyaktsü.’

¹⁰Aser Israel nung pa tenüng dang, ‘Tsüngsem salaba kibong ta ajatsü.’

¹¹“Kodang nisung ana raratepdir aser ka kinungtsüi pei kinungpu den raraya aliba ket nungi pei kinungpu kümzüktsü asoshi arua tangarba dak la teka songtoka miim oset nung sotakra,

¹²nai la dang kecha maochi-i la teka leptoktsüla.

¹³ “Ne juli nung touzükba lung tapu balaka, taret aser tepungba mayutsüla.

¹⁴Ner kidang tetakzükba melok balala tulu aser tila mayutsüla.

¹⁵KIBUBA ne Tsüngremi ne nem agütsüba linük nungji na arishi talang alitsü asoshi chichiba touzükba shitak aser tetakzükba tabensa shitak ayutsüla.

¹⁶Kechiaser iba ama mapa inyaker, oda ochi mashi mapa inyaker ajak KIBUBA ne Tsüngrem madang tesempatsü lir.

¹⁷ “Nenok Ijip nungi adokdang lenmang nung Amaleki kechi inyak bilemtetang.

¹⁸Kodang na tashi maiti aser lula-a liasü, pai ne den ajurutepa aser ne sülen alir tashi maitertem pai leptangadok, pai Tsüngrem metsübu.

¹⁹Anungji kodang KIBUBA ne Tsüngremi nenok meketa aliba tsükchir ajak nungi nenok nem anisüngzük agütsüdir, anüng kübok Amalek bilemtetba nai aitoktsüla. Nenoki aji mamatsüla.