Read njo TAZÜNGKUNEM 26 Bible Online

TAZÜNGKUNEM 26 - njo bible

TAZÜNGKUNEM 26

¹“Kodang KIBUBA ne Tsüngremi nenok nem senmangtsü agütsüba linüki nenok idir, aser aji atsüngtetdir, aser iba nung lidir,

² KIBUBA Tsüngremi nenok nem agütsüba lima nungi anguba ajak mezüng süngjang nenoki bener arutsü, aser aji molok nung yuang, aser KIBUBA ne Tsüngremi pa tenüng koba linük nung lidaktsütsü shimdir ajagi bener aotsüla.

³Iba mapang nung putir bangdakbuba dangi na aotsüla, aser pa dang shiang, ‘KIBUBAi asen tsürabur dang nangzükba limai ni aita lir ta tanü ni KIBUBA ne Tsüngrem dang sangoktsür.’

⁴Aser putiri ne ket nungi molokji agizüktsü, aser aji KIBUBA ne Tsüngrem tenladak jakdang ayutsü.

⁵Ajiser nai KIBUBA ne Tsüngrem jakdang ashitsü, ‘Kübu nemzüa aliba Aram nunger ka liasü, pa telok tila ka den Ijip nung alitsü alu, aser yangji pa tashi tulu kin ka aküm aser jenti aren,

⁶Ijip nungeri onok dang sashia benshi, onok ala-ashi, aser onok dang alar mapa nungloktsü;

⁷saka ozü tsürabur Tsüngrem dang onoki ayimten, aser KIBUBAi onok ola angashi, aser onok ala-ashiba, onok belema inyakba, aser onok kangshiba angu:

⁸aser KIBUBAi tashi tait teka, aser tepen songtoka, tetsübutsü tulu, temaitsü, aser sayatenya agi, onok Ijip nungi anitet;

⁹aser iba limai onok anir arua, pai onok nem, mamatzü aser ninang mojitzü ayimba lima agütsü.

¹⁰Aser tang, ajiang, Oh KIBUBA, nai kü nem agütsüba, ali nungi adokba mezüngbuba süngjang, ni bener arur.’ Aser nai KIBUBA ne Tsüngrem madang aji toktsütsü aser KIBUBA ne Tsüngrem madang külemang,

¹¹aser KIBUBA ne Tsüngrem nem aser ner kibong nem agütsüba tajung ajak, na, aser Levi nunger, nenok rongnung aliba aener dena pelatepang.

¹² “Kümsembuba nung, aji ter shilem agütsüba küm, kodang nai züsentetba ajak nungi ter shilem agütsübaji temdir, idangji nai aji Levi nunger, aener, tebu malir aser amitsür nem agütsütsüla, anungji parnoki nenok yimti süngkhüm nung aji chia tip atemtsü.

¹³Idangji KIBUBA ne Tsüngrem dang yamai shiang, ‘Nai kü dang melaba ama, ni ozü ki nungi ter shilem ajak agienogo, aser aji Levi nunger, semloka alir, tebu malir aser amitsür nem agütsüogo. Ne temelaba nungi ni meyipa mao, mesüra itemji ni mamadok.

¹⁴Ni itemji kü mangyim dang mechika, ni memerüki alidang ni kecha meindoka, mesüra tasen asoshi kecha magütsüka. KIBUBA kü Tsüngrem dang ni angaogo nai kü dang melaba ajak ni inyakogo.

¹⁵Ne temeshi talidak kotak nungi reprangzüka yokang, aser ne nübur Israel aser ozü tsürabur dang nangzükba, mamatzü aser ninang mojitzü ayimba lima nung onok moajangma.’

¹⁶“KIBUBA ne Tsüngremi telatet ozüng aser yimsü ozüngtemji kümdanga benshitsü asoshi, itemji ne mulung ajak agi aser ne nela ajak agi benshitsü tanü melar.

¹⁷KIBUBAji ne Tsüngrem asütsü, pa lenmang nung jajatsü, pa telatet ozüng, aser pai melaba pa obendangba aser pa o angatsü tanü nai atemzükogo.

¹⁸ Aser KIBUBAi tanü metetdaktsüba ama, oda pai nangzükba ama nenokji pa nübur, pa senmang, aser nenoki pa ozüngji benshitsü.

¹⁹Pai metetdaktsüba ama nenokji pai yangluba kin ajak madak tenüngsang, tetushi nung na temaba kümdaktsütsü aser pai nangzükba ama KIBUBA ne Tsüngrem asoshi nenokji temeshi nübur alitsü.”