Read njo TAZÜNGKUNEM 27 Bible Online

TAZÜNGKUNEM 27 - njo bible

TAZÜNGKUNEM 27

¹Idangji Mosa aser Israel tantsü tambutemi nüburtem dang ashi, “Tanü ni nenok nem agütsüba temelaba ajak benshiang.

²Aser KIBUBAi nenok nem agütsüba limai nenok Yordan ajanga aiba anogo nungjisa, lung tulu kar shinü teper nenoki azünga ayutsüla.

³Aser KIBUBA nenok tsürabur Tsüngremi nenok dang nangzükba amato KIBUBA ne Tsüngremi nenok nem agütsüba, ninang mojitzü aser mamatzü ayimba limai nenok aitsü asoshi nenoki item tema nung iba ozüng o ajak zülutsüla.

⁴Kodang nenoki Yordan ajangdir, tanü ni nenok dang melaba ama item lungji Ebal tenem nung azüngtsü, aser nai shinü ateptsüla.”

⁵Yangji KIBUBA ne Tsüngrem dang tenladak ka, lung agi yanglutsüla. Iba manungji merang oset kecha mataloktsüla

⁶KIBUBA ne Tsüngrem tenladakji mangenteti aliba lung agi yanglutsüla, aser iba nungji KIBUBA ne Tsüngrem dang nai tarongba tenla agütsütsüla.

⁷ Idakji yimjung tenla agüja aji achitsü, aser nenoki KIBUBA ne Tsüngrem madang pelateptsü.

⁸Aser nai azünga ayuba lung nungji iba ozüng o ya kanga jangja-a zülua ayutsüla.

⁹Idangji Mosa aser Levi pututemi Israel ajak dang ashi, “Ajem ajema angang Oh Israel! Tanü na KIBUBA ne Tsüngrem nübur kümogo.

¹⁰Anungji nai KIBUBA ne Tsüngrem Oh angang, aser Pa temelaba ozüng koba tanü ni nenok dang melar aji benshiang.”

¹¹Panüjisa Mosai nüburtem dang ozüng agüja ashi,

¹² “Kodang nenoki Yordan atendir item yagi nüburtem moatsütsü asoshi Gerizim tenem nung noktaktsüla: Simeon, Levi, Yihuda, Issakar, Yosef aser Benjamin,

¹³aser atakatemtsü asoshi item ya Ebal tenem nung noktaktsüla: Reuben, Gad, Asher, Zebulun, Dan aser Naftali.

¹⁴Levi nungeri Israel nübur ajak dang ola tulu agi ashitsü.”

¹⁵ “Shibai KIBUBA madang tesempatsü mapa teka agi chiteta süngyanglu mesüra mulusa-a yanglur aji temiimdak yudir, pa atakatem sang.” “Aser nisung ajaki langzütsü, ‘Amen.’

¹⁶ “ ‘Shibai tebu mesüra tetsü akhüm metsübulir pa atakatem sang.’ “Aser nisung ajaki ashitsü, ‘Amen.’

¹⁷“ ‘Shibai pei kiyonger ali arrtsü atendir pa atakatem sang.’ “Aser nisung ajaki ashitsü, ‘Amen.’

¹⁸ “ ‘Shibai nükpoker lenmang mashileni anidir pa atakatem sang.’ “Aser nisung ajaki ashitsü, ‘Amen.’

¹⁹ “ ‘Shibai aener, tebu malir, aser amitsür obendangba ajusatsüdir atakatem sang.’ “Aser nisung ajaki ashitsü, ‘Amen.’

²⁰ “ ‘Shibai pei tebu kinungtsü den nüktapangtadir, pai tebu teperem sü salatsü nungji pa atakatem sang.’ “Aser nisung ajaki ashitsü, ‘Amen.’

²¹ “ ‘Shibai shiruru kar den danga nüktapangtadir pa atakatem sang.’ “Aser nisung ajaki ashitsü, ‘Amen.’

²²“ ‘Shibai pei adianu, tebuer jala mesüra pei tetsüer jala den nüktapangtadir pa atakatem sang.’ “Aser nisung ajaki ashitsü, ‘Amen.’

²³ “ ‘Shibai pei kinungtsü tetsü den nüktapangtadir pa atakatem sang.’ “Aser nisung ajaki ashitsü, ‘Amen.’

²⁴“ ‘Shibai pei kiyonger miima tepsetdir pa atakatem sang.’ “Aser nisung ajaki ashitsü, ‘Amen.’

²⁵“ ‘Shibai tai makaba nisung tepsettsü asoshi süpokrem agidir pa atakatem sang.’ “Aser nisung ajaki ashitsü, ‘Amen.’

²⁶ “ ‘Shibai iba ozüng o meinyaki makangdaktsür pa atakatem sang.’ “Aser nisung ajaki ashitsü, ‘Amen.’