Read njo TAZÜNGKUNEM 28 Bible Online

TAZÜNGKUNEM 28 - njo bible

TAZÜNGKUNEM 28

¹ “Ni tanü nenok nem agütsüba, pai melaba ajak benshitsü KIBUBA ne Tsüngrem o nenoki nentaka angadi süra, KIBUBAi alima kin ajak madak nenok yutsütsü,

²aser KIBUBA ne Tsüngrem ola nenoki angadi süra, item temoatsü ajak nenok madaki arutsü, aser nenok sülen anitaktsü.

³“Yimti nung na moatsü aser alu nung na moatsü.

⁴“Ne temang metsü, ne ali süngjang, aser ne kiset shiruru techanu, aser ne nashi aser ne san chanu züinba nung na moatsü;

⁵Ne molok aser semki moatsü.

⁶“Na arudang na moatsü, aser na aodang na moatsü.

⁷“Tsükchir shibai ne den raradir KIBUBAi ne jakdang jenshidaktsütsü, na anema parnoki lenmang kati arutsü, saka parnoki lenmang tenetsüi ajentsü.

⁸“Ner jendang nung aser ne ket agi inyakba ajak nung KIBUBAi ne dangi temoatsü arung ta melatsü, aser KIBUBA ne Tsüngremi ne nem agütsüba lima nung pai na moatsütsü.

⁹“KIBUBA ne Tsüngremi melaba nai benshira aser pa lenmang nung jajara, KIBUBAi ne dang nangzükba ama pa asoshi pai na temeshi nübur ka kümdaktsütsü.

¹⁰Aser alima kin ajaki na KIBUBA tenüng nung ja-a lir ta angutsü, aser parnoki na tsübutsü.

¹¹KIBUBAi nenok tsürabur dang ne nem agütsütsü ta nangzükba lima nung, ne mang metsü nung, ne kiset shiruru nung, ne ali süngjang nung KIBUBAi na jenti azükarudaktsütsü.

¹²KIBUBAi ne teka mapa ajak moatsütsü asoshi aser ne ali nung mapang shitak nung tzünglu yoktsü asoshi pai terizüngdak tajung anüng lapoktsütsü. Nai kin aika nem aputsütsü, saka nai parnok nungi maputsü.

¹³KIBUBAi na teben masü tekolak kümdaktsütsü; aser na teküboklen masü, temalen dang alitsü; nai dang KIBUBA ne Tsüngrem temelaba koba tanü ni ne nem agütsüdar aji kümdanga benshira,

¹⁴tanü ni nenok nem agütsüba ozüng nungi pila-a tangar tsüngremtem tenzüktsü asoshi tajichilen mesüra tabeleni temeyip.

¹⁵“Saka tanü ni nenok nem agütsüba KIBUBAi melaba aser pa telatet ozüng ajak benshitsü asoshi KIBUBA ne Tsüngrem ola mangali süra, item atakatem ajak ne dangi arutsü.

¹⁶“Yimti nung na atakatemtsü, aser alu nung na atakatemtsü

¹⁷Ne molok aser semki atakatemtsü.

¹⁸Ne temang metsü, ne ali süngjang, ne nashi aser san telok chanutem atakatemtsü.

¹⁹Na tarudang, aser na taodang atakatemtsü.

²⁰“Nai ni senzüka tokja nai inyakba tamajung atema na mesamatsü tashi aser na yakta marem tashi, KIBUBAi ne madak nai inyakba ajak nung atakatemba, timtem tejashitsü, aser tarütsüba, yoktsü.

²¹Na koba lima agitsü idagi iba lima nungi na mesamatsü tashi KIBUBAi ne dak timtemtsü wara menaloka yutsütsü.

²²KIBUBAi ne dak yaretba, shirang aitba, temang awakba, temang tsüka metaba, aser nok agi, poksatsüba agi, poknüng awakba agi tongdaktsütsü; aser item jagi na mesamatsü tashi na arishitsü.

²³Aser ne kolak temalen aliba anüngji yongmenyin alitsü, aser ne teküboklen aliba alimaji merang alitsü.

²⁴Ner lima nung tzüngluji KIBUBAi auyi aser anak kümdaktsütsü, na mesamatsü tashi anüng nungi aji ne madak aludaktsütsü.

²⁵“Ne tsükchir madang KIBUBAi na kokdaktsütsü, nai parnok anema lenmang kati aotsü, saka na lenmang tenetsüi parnok madang ajentsü, aser alima yimli ajak madang na taoksatsü ka asütsü

²⁶Ne tasü mangji anüng ozü ajak, aser alima shiruru asoshi chiyungtsü asütsü, aser parnok aridoktsü shinga malitsü.

²⁷KIBUBAi na kodanga manepba Ijip tepzünu agi, komo agi, poktetra agi, anakra agi tongdaktsütsü.

²⁸KIBUBAi ne dak yiamataba, tenük apokba, aser taoksaba agi tongdaktsütsü;

²⁹aser nükpokeri ammang nung ajemzüa jajaba ama na anüngdang ajemzüa jajatsü, aser na taküm nung azükaru malitsü, saka teti na dang kangshitsü aser rakzükraktemtsü, aser na kümzüktsü shinga malitsü.

³⁰“Nai tetsür ka aniasüngtsü, saka tangar nisungi la den ayiptsü; nai ki yanglutsü, saka iba nung na malitsü, nai tsükmenatzü lu ayimtsü, aser iba süngjang nai magitsü.

³¹Ne nashi pungchi ne nükdang tepsettsü, saka nai aji machitsü; ne gado ne jakdang teka yia rakzüka bener oadoktsü, saka ne nem meyipa meshilangtsütsü.

³²Ne jabaso jalatem tangar nisung nem agütsütsü, aser anogo tepiyong nai parnok yongyaseta reprangnüaka mangutsü aser ne ket nung kecha tashi malitsü.

³³Ne ali süngjang aser nai züsentetba ajak, nai memetetba kin katiang chiadoktsü aser na dang kangshitsü aser menüngsa-a yoktsü;

³⁴anungji nai kechi ngudir iba tanguba jagi na yiamata-a kümdaktsütsü.

³⁵Ne tetsüng temesüla nungi tekolak tekojong tashi KIBUBAi ne dak tepzünu komo tamajung adokdaktsütsü, koba nungi na anebtsü makoktsü.

³⁶“KIBUBAi na aser nai ne madak ayuba chuba, nai mesüra ne tsüraburtemia memetetba kin dangi yoktsü, aser yangji nai tangar tsüngremtem tenzüktsü.

³⁷KIBUBAi na koleni aridokdir iba nüburtem rongnung na taoksatsü, tatishitsü aser tansütsü ka akümtsü.

³⁸“Nai metsü jenti alui bener aotsü, saka tera dang arutsü, kechiyong süngkui aji chimatsütsü.

³⁹Nai tsükmenatzü lu ayimtsü aser inyaktsü, saka nai tsükmenatzü yi majemtsü mesüra tejang mebendentsü, kechiyong meseni itemji achitsü.

⁴⁰Ner li ajak nung oliv süngdong alitsü, saka nai ne sasa totzü memezütsü, kechiyong ne oliv jetzükadoktsü.

⁴¹Na nungi jabaso jalatem jakzüktsü, saka parnok ne meyong masütsü, kechiyong parnok tepuokdaki aitsü.

⁴²Aser ne süngdong ajak aser ne ali süngjang süngkui metembangtsü.

⁴³“Ne den aliba aener ang ne dang temaba temabai atutsü, aser na tekübokba tekübokbai alutsü.

⁴⁴Pai ne nem aputsütsü, saka nai pa nem maputsütsü; pa tekolak, aser na teben alitsü.

⁴⁵Aser na mesamatsü tashi, item atakatem ajak ne madak arutsü, aser na arishitsü, aser na manebtsü, kechiyong pai ne dang melaba aser pa telatet ozüngtem benshitsü asoshi KIBUBA ne Tsüngrem ola manga.

⁴⁶Itemi teti asoshi na aser ner chirnur dang temaitsü aser tesüngmangtsü alitsü;

⁴⁷kechiaser na talubosa aliba mapang nung nai KIBUBA ne Tsüngrem pelashishia aser ne mulung tepela agi metenzük;

⁴⁸aji asünung yaseta, tzüraseta, mangsa, aser oset ajak agi anüngakonga KIBUBAi na anema yokba tsükchirtem nai tenzüktsü aser na mesamatsü tashi, pai na tekong nung merang süngra pungoktsütsü.

⁴⁹“Mongzü yimzür ama, KIBUBAi na anema talang nungi, alima tatem nungi kin ka anir arutsü, iba kin oshiji nai mangatettsü;

⁵⁰tereprangtsü tetsübutsü kin ka shirnoki tambur dang akhüm metsübur mesüra lanur dang maochir.

⁵¹Na mesamatsü tashi parnoki ne kiset shiruru chanu aser ne ali süngjang achitsü. Parnoki ano na meraksatsü tashi ne nem tsük, tsükmenatzü yi tasen, totzü mesüra, ne nashi aser san telok metoktsütsü.

⁵²Nai temulung alemba jara talang ajakji chirepa malu tashi pai ne yimtitem makbangtsü. KIBUBA ne Tsüngremi ne nem agütsüba linük nung ne yimtitem ajak parnoki amaktsü.

⁵³“Tsükchirtemi na lungbanga yur timtemdaktsüba agi nai pei chirnur, KIBUBA ne Tsüngremi ne nem agütsüba, ne jabaso jalatem shi achitsü.

⁵⁴Ajemaluba aser temeim agi sünga aliba nisungi pei adianu mesüra pai meimba kibutsü aser anünga aliba par chirtem dang maochitsü.

⁵⁵Aji asünung pai pei chir shi chia aliba shiji parnok shinga nema magütsütsü. Kechiaser tsükchirtemi nenok yimti ajak makbanga nenok timtemdaktsüba jagi pa tachitsüji aji dang asütsü.

⁵⁶Nenok rongnung tetsür shiba anebaneba aser anükanüka, oda tanepba aser anükba agi la tetsüng ali nung majemdaknütsüsa lir, lai la meim kinungpu dang aser la jala dang,

⁵⁷ aser la nu menden nungi aluba nusem, aser lai asoba tanur dang mejungi benshitsü; kechiyong ne yimti nung ne tsükchirtemi kangshia aser nungtepdakja lungbangba agi, kechisarena agi anüngba agi lai miima itemji achitsü.

⁵⁸“Iba kaket nung zülua aliba ozüng o ajak nai kümdanga mebenshira, aser KIBUBA ne Tsüngrem sentsüwangshi aser tetsübutsü tenüngji metsübura,

⁵⁹idangji KIBUBAi na aser ne semchirtem dak temerenshi tulu, talangka maneni aliba tetsübutsü wara, tejashitsü aser anebtsü makokba tashitak yoktsü.

⁶⁰Aser Ijip tashitak, koba nai tsübua liasü ajak pai ne dangi tanaben bener arutsütsü, aser item jagi ne dak azüita alitsü.

⁶¹Ano na mesamatsü tashi, iba ozüng kaket nung zülua maliba, shilushira ajak aser wara ajak KIBUBAi ne madak bener arutsütsü.

⁶²Nenok ken anüng nung petinu yongsük ama liaka, nenok yongsük ishika dang asütsü. Kechiaser nai KIBUBA ne Tsüngrem ola manga.

⁶³KIBUBAi mapang ka nung nenok dang ajungtsü aser renloka kümdaktsütsü pelaba ama, yamaji KIBUBAi nenok samatsütsü aser südaktsütsü pelatsü; aser nenok koba lima agitsü air, iba lima nungi nenok atsütoktsü.

⁶⁴“Aser alima külen tatem nungi külen tatem tashi kin ajak rongnung KIBUBAi nenok prokshidaktsütsü; aser nai aser ne tsüraburi memetetba tangar tsüngremtem süng aser lung tsüngremtem tenzüktsü.

⁶⁵Item kin rongnung na sadoksadoka malitsü, aser ne tsüng anisüngzük makatsü, saka KIBUBAi ne nem temulung zürepba, metizüktsüba tenük, aser lurepa aoba tanela agütsütsü;

⁶⁶ne taküm ne madang arentaka dang alitsü, aser nai aonung aser anüngdang tsübutsü; aser ne taküm indang kecha shitak malitsü;

⁶⁷ne mulungjang nung tetsübu agi aoksadaktsüba yong, aser ne tenük agi kechi angur iba yongji, anepdang nai ashitsü, ‘Nikongtsütsü ta danga Tsüngremi kümdaktsülasang! Aser nikongdang nai ashitsü, Anepdanga ta danga Tsüngremi kümdaktsülasang!’

⁶⁸KIBUBAi na tanaben Ijipi rong nung bener arutsütsü, koba lenmang indang ni ne dang, nai joko aji tanaben mangutsü, ta ashi aser yangji nenok sasa alar aser alatsür küma ayoktsü, aser shingai nenok malitsü.”