Read njo TAZÜNGKUNEM 29 Bible Online

TAZÜNGKUNEM 29 - njo bible

TAZÜNGKUNEM 29

¹KIBUBAi Israel nüburtem den Horeb nung tezüngzüktepba yangluba dak alaka, Pai Mosa dang Moab lima nung parnok den tezüngzüktepba yanglutsü melaba o itemi lir.

²Idangji Mosai Israel ajak aja, aser parnok dang ashi, “Ijip lima nung KIBUBAi Farao dang, pa tenzüker ajak dang, aser par linük ajak dang inyakba nenoki nguogo.

³Tetendangba tulu, temaitsü, aser sayatenya tulutemji nenoki nguogo,

⁴saka tanü tashi KIBUBAi nenok nem metettsü temulungjang, tangutsü tenük, tangashitsü tenarong magütsü.

⁵Küm lir ni nenok arem nung aniogo aser nenok süoshi tejen maküm, mesüra nenok tsüngsem meraksa.

⁶Nenoki ni KIBUBA nenok Tsüngrem ta metettsü asoshi nenoki amtsük machi, aser yi mesüra mejemtzü majem.

⁷ Kodang nenok iba linüki aru. Heshbon chuba Sihon, aser Bashan chuba Og, asenok anema tongbangi adok, saka asenoki parnok akok,

⁸ aser par lima asenoki agi, aser aji Reuben nunger nem aser Gad nunger nem aser Manase kidong tesadang nem senmangtsü asoshi agütsü.

⁹Anungji nenoki inyakba ajak nung azükarutsü asoshi iba tezüngzüktepba otem temulung nung yuang aser itemji inyakang.

¹⁰“Tanü nenok ajak KIBUBA nenok Tsüngrem madang noktaka lir, ner tanishirtem, ner kidongtem, ner tamburtem aser bangdakpurtem, oda Israel nisung ajak,

¹¹ner tila tanurtem, ner kinungtsütem, aser ne tanendak rongnung aliba aener, süng bener nungi tzütar tashi,

¹²oda KIBUBA ne Tsüngremi tanü ne den yangluya aliba, KIBUBA ne Tsüngrem tezüngzüktepbai aser Pa tenangzükbai na itettsü,

¹³oda Pai ne dang jembiba ama, aser Pai ne tsüraburtem, Abraham, Isak, aser Yakob dang nangzükba ama, oda tanü pai na pei nübur kümdaktsütsü, aser Pa ne Tsüngrem kümdaktsütsü asoshi.

¹⁴Iba tezüngzüktepba aser tenangzükba ya, ni nenok den dang yanglur masü;

¹⁵saka shiba tanü asenok den KIBUBA asen Tsüngrem madang noktaka lir pa den, aser ano tanü asenok den matenba pur den, ni yanglur.

¹⁶“Asenok Ijip nung koma liasü aser iba lenmangi arudang tangar kintem koma ajanga aru aji nenoki meteta lir.

¹⁷Aser parnok rongnung aliba, par süngyanglu, süng aser lung, taribi aser hon, parnok tesempatsü nenoki nguogo.

¹⁸ Nenok rongnung tebur mesüra tetsür, kidong mesüra kin nungi KIBUBA asenok Tsüngrem nungi temulung meyipa oa item kin tsüngremtem külemba agi taku tera madokdaktsütsü kümdangang.

¹⁹Kodang ibala nisungi iba tezüngzüktepba atakatem otem angashia pei mulung nung, ‘Ni temulung meranga jajaba ni tesünep nung alitsü’ ta shidir, tzü yima aliba limaji takong agi samatsütsü.

²⁰KIBUBAi pa dang tai matoktsü, saka idangji KIBUBA ain adokba aser pa tenükmiba iba nisung anema jangrutsü, aser iba kaket nung zülua aliba atakatem ajak pa dak kaotsü, aser pa tenüng anüng kübok nungi KIBUBAi aitoktsütsü;

²¹aser iba ozüng kaket nung züluba, tezüngzüktepba atakatem ajak ama, Israel kidong ajak nungi pa tamajung nem agütsütsü asoshi KIBUBAi pa agitetadoktsü.

²²“Idangji tarutsü aliba putu nung nenok chirnur ne sülen adoktsü, aser alima talang nungi aruba aeneri, KIBUBAi merenshiba timtem tekangshi aser shilu-shiraji ngua ashitsü,

²³‘Alima ajongaji mitsüktsü mozü aser metsü, terongsa, metsü meprokdak aser idakji ai memeyir, oda KIBUBAi pa ain aser mit adokdang meküpdokba Sodom aser Gomora, Adma aser Zeboiim ama kümogo.’

²⁴Oda kin ajaki ashitsü, ‘Kechiba KIBUBAi iba lima nung yamai inyak? Iba ama mit tulu adokba tetezü kechi!

²⁵Idangji nisungtemi ashitsü, kechiaser KIBUBAi Ijip lima nungi parnok anir adokdang pai parnok den yangluba, KIBUBA par tsürabur Tsüngrem den tezüngzüktepba parnoki senzüka yutsü,

²⁶aser parnoki memetetba, aser koba pai parnok nem magütsü, oagi tangar tsüngremtem tenzük, aser parnok külem;

²⁷anungji iba kaket nung züluba atakatem ajak iba madak bener arutsü, iba lima anema KIBUBA ain adok:

²⁸aser tanü tashi aliba amai, ain adokba agi, KIBUBAi parnok lima nungi parnok atsüdok.’

²⁹“Miima alibatem KIBUBA asen Tsüngrem meyong lir, saka asenoki iba ozüng otem ajak inyaktsü asoshi jungkai adoka alibatemjibo teti asoshi asenok aser asen chirnur meyong lir.