Read njo TAZÜNGKUNEM 3 Bible Online

TAZÜNGKUNEM 3 - njo bible

TAZÜNGKUNEM 3

¹“Ajiser asenoki aenshia Bashan leni atu, aser Bashan chuba Og pa nübur ajak anir asenok anema Endrei nung tongbangi adok.

²Saka KIBUBAi kü dang ashi, ‘Pa tetsübu, kechiaser pa den pa nüburtem ajak aser pa linük ajak ni ne nem agütsüogo. Amor nunger chuba Heshbon nung yimsüsüsang Sihon dang inyakba ama nai pa dang inyaktsü.’

³“Anungji KIBUBA asen Tsüngremi Bashan chuba Og aser pa nüburtem ajak asenok ket nung agütsü, aser asenoki parnok ka danga anünga meyutsüi akok.

⁴Iba mapang nungjisa asenoki par yimti ajak agi, asenoki magiba yimti ka danga maliasü. Bashan chuba Og-i yimsü asüba Argob linük yimti roker asenoki maktet.

⁵Item yimtitemji jara talang agi atsübanger süngkhüm aser süngkhümrütsü agi atsübanga liasü, aser ano yimtsüng aika jara agi matsübangi liasü.

⁶“Heshbon chuba Sihon dang asenoki inyakba ama yimti ajak, tetsür tebur aser tanur ajak asenoki meshi meshia samatsü.

⁷Saka kiset shirurutem aser temakzükba osettem asenoki bener aru

⁸“Anungji iba mapang nungji item Amor nunger chuba ana nungi Yordan anüdoklen Arnon lenten nungi Hermon tenem tashi asenoki linükji agi.

⁹“Hermon dang Sidon nungeri Sirion aser Amor nungeri Senir ta ajar.”

¹⁰Lenten nung aliba yimti ajak, Gilead ajak, aser Bashan ajak Saleka aser Edrei tashi Bashan nung Og yimli yimti ajak asenoki agi.

¹¹Saka Bashan chuba Og dang Refaim nunger tanüngba rongnungji dena liasü. Pa yiptenji merang agi yanglua aser aji metong nung süklep tuku aser lenten nung süklep pezü liasü. Aji Amon nunger yimti Rabha nung melikama?

¹²“Item linük koba asenoki agi, Arnon lenten anüdoklentip Aroer nung Gilead tenem lima tesadang ka, aser item yimtitem Reuben aser Gad chirtem nem ni agütsü.

¹³Gilead tanüngba aser Bashan nung Og yimli ajak Manase kidong nem ni agütsü.” Bashan nung Argob tokong ajak dang Refaim linük ta ajar.

¹⁴Manase jabaso Yani Argob tokong ajak Geshur aser Makat arrtsü tashi agi, aser item yimtitem dang pa nüngkem tenüng agi, anungji tanü tashi Bashan dang Havvoth-Jair ta ajar.

¹⁵“Aser ni Makir nem Gilead agütsü.

¹⁶Saka Reuben aser Gad kidong nem Gilead nungi Arnon ayong tashi, lenten tepiyong aser iba arrtsü, Amon nunger arrtsü, aser Yabbok ayong tashi ni agütsü.

¹⁷“Anüolen arrtsü Araba tsütsü Yordan ayong, Kineret nungi anüdoklen tsütsü Pisga tenem tsüng metsü tzüyim tashi liasü.

¹⁸ “Iba mapang nung ni nenok dang mela-a ashi, ‘KIBUBA nenok Tsüngremi iba lima nenok meyong asütsü agütsüogo. Saka nenok tasü taiter ajak nok o nü bener ne adianu Israel jakdang aotsüla.

¹⁹Sakasa nenok kinungtsürtem, nenok chirtem aser nenok kiset shirurutem, kechiaser nenok kiset shirurutem jenti ta ni metet; parnokbo ni nenok nem agütsüba yimtitem nung alitsü,

²⁰oda nenok nem ama KIBUBAi ne adianutem nem anisüngzük magütsü tashi, aser KIBUBA nenok Tsüngremi parnok nem agütsüba lima Yordan ajanger aliba limaji parnoki magi tashi. Iba sülenjiang nenok ajak nem ni agütsüba dangi nenok nisung shia meyiptsü.’

²¹“Iba mapang nung ni Yihusua dang mela a ashi, ‘Item chuba ana dang KIBUBA nenok Tsüngremi inyakba ajak ne nüki nguogo, yamaji nai ni ajanga aotsüba yimli ajak dang KIBUBAi inyaktsü.

²²Parnok tsübua teli, KIBUBA nenok Tsüngremi nenok asoshi raratsü.’

²³ “Iba mapang nungji ni KIBUBA dang mepishia ashi,

²⁴‘Oh KIBUBA Tsüngrem, nai ne tenzüker dang na uluba aser ne tashi tulu sayutsü tenzükogo, kechiaser anüng nung mesüra alima nung tsüngrem shibai nai inyakba ama mapa tulu inyaktettsü?

²⁵Ni ne dang mepishir, Yordan ajanga or alima tajung aser Lebanon reprangtsü ni odakjangma.’

²⁶“Saka nenok meji nung KIBUBAi kü dang ain adok aser kü danga manga. Saka KIBUBAi ashi, ‘Ojang sang, iba indang kü dang joko teshi.

²⁷Pisga tenem kolak jagi tuang aser anüolen aser anüdoklentip, anüolentip aser anüdoklen reprangang. Ne tenük agi alimaji reprangang, kechiaser nai Yordan ajanga ilen jagi maotsü.

²⁸Saka Yihusua nem mapaji bendanga agüjang, pa ajungshiang aser tashi itdakjang, kechiaser pai iba nübur ajagi anir aitsü aser nai anguba limaji parnok nem agidaktsütsü.’

²⁹Anungji asenoki Bethpeor lenten nung ali.”