Read njo TAZÜNGKUNEM 30 Bible Online

TAZÜNGKUNEM 30 - njo bible

TAZÜNGKUNEM 30

¹“Kodang item ajak nenok dak atalokdir, temoatsü süshia atakatem süshia ni nenok jakdang kechi yutsüogo, aser koleni KIBUBA ne Tsüngremi nenok aridok, item kin ajak rongnung nenok mulung nung item apitetang,

²aser nenok aser nenok chirtem, KIBUBA ne Tsüngrem dangi meyipa arura, aser nenok mulung ajak agi aser tanela ajak agi, tanü ni nenok dang melaba pa ola angadi süra,

³idangji KIBUBA ne Tsüngremi nenok kolenisa prokshidakja ali, kin ajak nungi tanaben nenok anitena, nenok dang aria bilema, KIBUBA ne Tsüngremi nenok tia yanglushitsütsü.

⁴Nenok jentoka aliba pur kar nüngjang tatemlen oa liaka, idak nungjagi KIBUBA ne Tsüngremi nenok anitentsü, aser idak nungjagi pai nenok anir arutsü.

⁵Aser KIBUBA ne Tsüngremi nenok tsüraburi agiba limai nenok anir arutsü aser aji nenoki agitsü; aser pai nenok azükarudaktsütsü, aser nenok tsürabur dang nungi tali soyapokyadaktsütsü.

⁶Aser nenok taküm lidaktsütsü asoshi, KIBUBA ne Tsüngrem ne mulung ajak agi aser ne tanela ajak agi meimdaktsütsü asoshi, KIBUBA ne Tsüngremi na aser ne chirnur mulung mejeptoktsütsü.

⁷Aser KIBUBA ne Tsüngremi, iba atakatem ajak ne tsükchirtem shirnoki na sempar aser rishikangshir, parnok dak enloktsütsü.

⁸Aser nenoki meyipa arutsü aser KIBUBA ola angatsü, aser tanü ni nenok nem agütsüba pai melaba ajak benshitsüla.

⁹Aser KIBUBA ne Tsüngremi nenoki inyakba ajak nung azükarudaktsütsü nenok chirnur nung, nenok kiset shiruru jakzükba nung, aser nenok ali nungi adokba nung; kechiyong nenok tsürabur dang ama, tanaben KIBUBAi nenok azükaruba nung pelatsü.

¹⁰Nenoki dang ozüng kaket nung zülua aliba ama, pa ozüng aser melabatem benshia nenoki KIBUBA ne Tsüngrem ola anga-a lira; aser KIBUBA ne Tsüngrem dangi ne mulung ajak agi aser tanela ajak agi meyipa arura.

¹¹“Kechiyong iba temelaba koba ni tanü nenok dang melar, ya nenok asoshi onsara tasak masü, mesüra nenoki matongtsüsa masü.

¹² Aji onoki inyaktsü asoshi, aser aji onok dangi bener arua, onok nem aji angashidaktsütsü asoshi shiba onok asoshi anüngi atutsü! ta nenoki ashitsüsa, aji anüng nung mali.

¹³Mesüra, onoki aji inyaktsü asoshi, shibai tzüyimi ozü asoshi oa aji onok dangi bener arua, onok nem angashidaktsütsü! ta nai ashitsüsa, aji tzüyim atena oa mali.

¹⁴Saka, nai inyaktsü asoshi, aji na kanga anasa, ne bang nung, aser ne mulungjang nung lir.

¹⁵“Ajiang, tanü ni ne madang taküm aser tajung, tasüba aser tamajung yutsür.

¹⁶Tanü ni nenok nem KIBUBA ne Tsüngrem meimba agi, pa lenmang nung jajaba agi, pai melaba aser telatet ozüng, aser yimsü-ozüng anga-a benshidi süra, idangji na taküm alitsü aser soyapokyatsü, aser nenoki agitsü yia aliba lima nung KIBUBA ne Tsüngremi nenok moatsütsü.

¹⁷Aji saka, nenok mulungjang meyipa oa, aser temulung magütsü, bendanger tsüngrem dang külemtsü, aser parnok tenzüktsü atsüngzüka ora,

¹⁸ni tanü nenok dang ashir, nenoki agitsü asoshi Yordan ajanga aiba lima nung talangka meli-i, atangji nenok samatsü.

¹⁹Nenok madang taküm aser tasü, temoatsü aser atakatem yutsüogo ta nenok anema tanü kuli asütsü ni anüng aser ali jazüker. Anungji taküm shimtetang, oda na aser ne chirnur taküm litettsü asoshi;

²⁰ KIBUBA ne Tsüngrem meimtsü, Pa ola angatsü, aser Pa dak azüita liang; kechiyong Paji ne taküm aser ne arishi anogo lir; oda KIBUBA, ne tsürabur Abraham, Isak aser Yakob dang, parnok dang agütsütsü nangzükba lima nung na litettsü.”