Read njo TAZÜNGKUNEM 31 Bible Online

TAZÜNGKUNEM 31 - njo bible

TAZÜNGKUNEM 31

¹Aser Mosai item o Israel pur ajak dang oa jembi,

² aser pai parnok dang ashi, “Tanü ni küm noklang ka ser metsü lir; joko ni oli aruli asütsü makoker, aser KIBUBAi kü dang ashi, nai iba Yordan ajanga maotsüla.

³KIBUBA ne Tsüngrem ne jakdang aotsü; Pai item kin ne jakdang nungi samatsütsü, aser nai itemji agitsü; aser KIBUBAi ashiba ama, Yihusua nenok jakdang aotsü.

⁴ KIBUBAi Amor nunger chubatem Sihon aser Og dang, aser par lima dang inyakba ama, parnok dakjia inyaktsü aser parnok samatsütsü.

⁵Aser KIBUBAi parnok nenok nem bendanga agütsütsü, aser temelaba ajak amato ni nenok dang ashiba ama nenoki parnok dang inyaktsü,

⁶Tashi itang, aser tasü itang; tetsübu, aser parnok tsübua teli; kechiyong KIBUBA ne Tsüngrem, ne den aosangji pa lir, pai na metoktsütsü, mesüra senzüka meyutsütsü.”

⁷Idangji Mosai Yihusua aja, aser Israel pur ajak tsüngdang ashi, “Tashi itang aser tasü itang, kechiyong iba nübur den, KIBUBAi parnok tsürabur nem agütsütsü nangzükba limai na aitsü aser nai parnok nem aji amangdaktsütsü;

⁸ ne jakdang aosangji pa KIBUBA lir, pa ne den alitsü; pai na metoktsütsü mesüra senzüka meyutsütsü, tetsübu mesüra aoksa-a teli.”

⁹Aser Mosai iba ozüng zülu, aser pai aji KIBUBA Ozüng Süngden abener, Levi jabaso putirtem, aser Israel tambur ajak nem bendanga agütsü.

¹⁰ Aser Mosai parnok dang mela-a, ashi, “Küm tenet shia tatembang nung, sentsü atokba küm mapang tatazük nung tekülemdak süki benjong nung,

¹¹kodang Israel pur ajak KIBUBA ne Tsüngrem madang pai shimtetdak sentepdir, nai Israel pur ajak madang, parnoki angashia, iba ozüng azüngtsüla.

¹²Teburtem, tetsürtem, tila tanurtem, aser nenok rongnung aliba aener, oda Tsüngrem O angashitsü, aser angazüktsü, aser nenok Tsüngrem tsübutsü, aser iba ozüng o ajak benshia inyaktsü sentepdakjang.

¹³Parnok chirtem shirnoki iba ozüng memetet, parnoki aji angashitsü aser Yordan ajanger nai agitsü aliba lima nungji ali tashi KIBUBA ne Tsüngrem tsübua alitsü.”

¹⁴Aser KIBUBAi Mosa dang ashi, “Na tasütsü anogo anasa aitdagi; Yihusua ja-ang, aser ni pa nem ketdang asütsü mapa agütsütsü asoshi, sentep süki-i nenok arung.” Aser Mosa aser Yihusua ao, aser parnok sasa sentep süki nung noktak,

¹⁵idangji süki nung mepet tongshi nung KIBUBA adok, aser mepet tongshiji süki temalen noktak.

¹⁶Idangji KIBUBAi Mosa dang ashi, “Ajiang, na ne tsürabur den mejangtsü, aser iba nübur kong parnok alitsü idagi, iba lima bendanger rongnung par tsüngrem sülen jabujaria oa apusotsü, aser ni senzüka toktsütsü, aser tezüngzüktepba koba ni parnok den yanglu aji raksatsü.

¹⁷Idangji iba anogo nung kü ain parnok anema adoktsü, aser ni parnok senzüka toktsütsü, aser ni parnok nungi kü tejak miimtsü, aser parnok meyokadoktsü, aser tamajung aser timtem aika parnok dangi arutsü; anungji iba anogo nung parnoki ashitsü, ‘Asen Tsüngrem asenok den maliba yong item timtem tamajung asenok dangi arur masü no?’

¹⁸Aser parnoki tamajung ajak inyaka bendanger tsüngremtem dangi meyipba yong, ni atangji iba anogo nung kü tejak miimadoktsü.

¹⁹Anungji tang iba ken züluang aser Israel chirtem dang sayuang, oda Israel chirtem anema iba ken ni asoshi kuli ka asütsü asoshi parnok tebang nung ibai enokjang.

²⁰Kechiyong kodang, mamatzü aser ninang mojitzü yima aliba, parnok tsürabur dang nangzükba limai, ni parnok anir arudir, aser parnok tepok süngdir, aser teyari kümdir; idangji parnoki tangar tsüngrem dangi meyiptsü, aser parnok tenzüktsü, aser ni sensatsütsü, aser kü tezüngzüktepba raksatsü.

²¹Kodang timtem aser tamajung aika parnok dangi arudir, iba ken ya parnok anema kuli ka amai asütsü; kechiaser parnok chirnuri ibai mamatsü, kechiaser ni parnok nem agütsütsü ta nangzükba limai ni parnok anir maitdangyongi parnok sentong kechi asütsüar ni meteta lir.”

²²Anungji Mosai panüjisa iba ken zülu, aser Israel chirtem dang aji sayu.

²³ KIBUBAi Nun jabaso Yihusua nem mapaji bendanga agüja ashi, “Tashi itang aser tasü itang, kechiaser ni parnok dang nangzükba lima jagi Israel nüburtem anir arutsü, aser ni ne den alitsü.”

²⁴Mosai item ozüng o ajakji tetenzük nungi tatem tashi kaket ka nung zülu,

²⁵aser Mosai KIBUBA Ozüng Süngden abener Levi nunger dang mela-a ashi,

²⁶“Iba ozüng kaket agiang, oda KIBUBA nenok Tsüngrem Ozüng Süngden anasa, yangji nenok anema kuli asütsü yuang.

²⁷Kechiaser nenoki anema noktakba aser tekong merangba ni meteta lir. Ajiang ni nenok den taküm alidang, nenoki KIBUBA anema noktak; süra ni süadoker külen nenok koda tali asütsü?”

²⁸Nenok kidong tamburtem, aser bangdakpur ajak narong nung item o jembitsü, aser parnok anema anüng agi kuli asütsü asoshi kü dangi sentepdakjang.

²⁹Kechiyong ni sür külen ni nenok dang melaba lenmang nungi nenoki meyipa oa, nenok sasa kanga majungtsü ta metet, aser tesülenbo tamajung agi nenok dak atongtsü; kechiaser nenok teka mapa ajanga pa ain adokdakja, KIBUBA madang koba tamajung aji nenoki inyak.

³⁰Idangji Israelpur tesenteper ajak narongi angashia Mosai iba ken matem tashi jembi.