Read njo TAZÜNGKUNEM 32 Bible Online

TAZÜNGKUNEM 32 - njo bible

TAZÜNGKUNEM 32

¹“Tenarong tenang, nenok anüngtem, aser ni jembidi; aser alimai kü bang o angadakjang.

²Kü tesayuba tzünglu ama jenzüka tsükdakjang, Kü o azüngtsü ama jenzükdakjang; ai tanep manung tzünglu nana ama, aser tzünglupu süngolio manung ama;

³ni KIBUBA tenüngji sangoktsütsü. Ozü Tsüngrem uluba tenüng sangang.

⁴“Pa Lung lir, pa mapa tabensa, kechiyong pa lenmang ajak shitak; temulung alemtsü aser tai maketba Tsüngrem, pa ochi aser tsüngchir lir.

⁵Pa dang parnoki mejungi benshi, parnok pa chirtem masü, aji parnok tai lir; parnok mashileni aoba aser tekirak putu lir.

⁶Tamashi aser shisa maka nübur nenoki KIBUBA dang yamai benshir no? Pa nenok yangluba nenok Tebu masü no? Pai nenok yanglu aser yangertet.

⁷Akhi anogotem bilemtetang, küm putu aika indang shisadangang, nebu dang asüngdangang, pai ne dang ashitsü, ner tamburtem dang asüngdangang aser parnoki ne dang ashitsü.

⁸ Kodang Tematibai kintem nem senmangtsü agütsü, kodang meimchir rongnung pai telemsa yanglu, pai Israel chirtem yongsük yari nüburtem arrtsü toktsü.

⁹Kechiaser KIBUBA shilemji pei nüburtem lir. Pa senmangtsü lemzükbaji Yakob lir.

¹⁰“Pai pa lisem lima nung, aser tajenzük arüa aliba arem nung angu; pai pa meketa lungbang, pa asoshi anebalu, pa nükdang metoklashi ama pai pa nüka ali.

¹¹Mongzüi pei tesep raksaja, pei techanu madak yimzüba ama, pai pei tashikang sarar parnok agizük, pai pei tashikang nung parnok aben.

¹²KIBUBA mesüngi dang pa anir ao, aser pa den bendanger tsüngrem maliasü.

¹³Pai pa alima temalen mendaktsü, aser pai ali nungi adokba chidaktsü; aser pai pa nem lung nungi ninang mojitzü, aser lungkeprak nungi totzü mesepdaktsü.

¹⁴Nashi aser san nungi mamatzü, san chanu tetsüdi nungi temo, Bashan nashi pungchi aser nabong nungi, tezüngjang temo aser wheat am; aser tsükmenatzü zü nungi nai yi ajem.

¹⁵“Saka Yeshurun yiraa aküm, aser atepten; na yiraa lir, na melemmelema yinogo, na süsüa kümogo. Idangji pa yangluba Tsüngrem pai senzüka toktsüogo, aser pa tekümtet Lung züpa züpa-a züngshi.

¹⁶Bendanger tsüngremtem agi pai nükmia kümdaktsü, tesempatsü agi parnoki pa jashidaktsü.

¹⁷ Parnok memetetba tsüngremtem, tawa aruba tasen tsüngremtem, shirnok nenok tsüraburi metsübu, koba tsüngremtem masü, mojing[2] dang, parnoki tepseta tenla agütsü.

¹⁸Na abenba lung nai senzüka yutsü, aser na sodaktsüba Tsüngrem nai amadok.

¹⁹Aser KIBUBAi aji angu, aser parnok sempa, kechiaser par jabaso aser jalatemi ain adokdaktsü.

²⁰Aser pai ashi, Ni parnok nungi kü tejak miimtsü. Parnok tatem kechi kümdir ni reprangdi. Kechiyong parnok kanga tashi manga putu, tamang makatsüba chirtem lir.

²¹ Koba Tsüngrem masü, kümdaktsü, iba jagi ni nükmitsüsa; parnok amajok mapatem agi ni ain aitdaktsü; anungji shir kin ka masü, par den ni nükmia kümdaktsütsü; ni tamashi kin ka den parnok ain adokdaktsütsü.

²²Kechiyong, taroktiba kangla[3] tonga ronga, aser alima telunga aser iba nung adokba meyoka, aser tenem kimung nung mi adoka, kü ain adokba nung mi jangrua lir.

²³“Ni parnok madak timtemtsü nungtentsütsü, ni parnok dak kü lijakjang agimatsü;

²⁴Tayaba agi parnok samatsü, aser mijang tatsük agi meyoktsü, aser kanga tamajung tesama adoktsü. Parnok shisatsütsü shirurutem, aser parnok mimsettsü pertem ni parnok madak yoktsü.

²⁵Kimalen nok agi tasütsü, aser kilung nung taoksatsü alitsü; iba agi asangur aser tasüngtet aiür anaprong, mama ayonger kinü den kupu apur samatsütsü.

²⁶Ni parnok talang nung prokshidaktsütsü, nisung rongnung ni parnok mebilemtetdaktsütsü, ta ni shila;

²⁷Saka parnok tsükchirtemi mezümekümtsü, parnok temerirtemi aibelena ayimtentsü, asen teka agi takok tulu nguogo, iba mapa kecha KIBUBAi inyakba masü ta ashitsü ni tsübur.

²⁸“Kechiyong parnok shisatsü makaba kin lir, aser parnok dak tangatetba mali.

²⁹Oh, parnok shisa ka-a, parnoki ya angateta, oda parnok tesülen tia indang shisadanglasang!

³⁰Parnok Lungi parnok mayok asübo, KIBUBAi parnok bendanga magütsü asübo, kodaser kati meyirijang ka arishitsü, aser anati meyirijang ter jenshidaktsütsü?

³¹Kechiyong par lung asenok Lung ama masü, oda asen tsükchiria parnok sasa meteta lir.

³²Kechiyong parnok tsükmenatzü zü Sodom nungi aser Gomora tsüki nungi arur; par tsükmenatzü taku lir, parnok tejep taku lir.

³³Parnok yiji per mim, aser ongyang per mim tesashi lir.

³⁴“Kü terizüngdak ajemer, ibai kü den rizünga yua melika ma?

³⁵Parnok tetsüng kodang ajutokdir, mangyangba, aser meyipa agütsüba kü meyong lir; kechiyong parnok timatemtsü anogo anasa lir, aser parnok madak tataloktsütem kara-a arutsü.

³⁶Kechiyong, kodang parnok ain ogo ta ngudir, aser parnok kata alarsa mesüra nüji tia nunga melilir, KIBUBAi pei tenzükertem asoshi aria bilema pai par o bendangtsü.

³⁷Aser pai ashitsü, Parnok tsüngremtem kong ali? Parnok jenokba lungji kong ali?

³⁸Shirnoki parnok tetepsetba tenlatem achi, aser parnok tajemtsü tenla yi ajem, parnok aramesoa nenok yaridakjang, parnok dak nenok atsükokang.

³⁹“Ni alema tangar tsüngremtem shinga mali, ni pa lir, oda Nia, ta tang metetang. Ni tepseter, aser Ni taküm kümtettsür; ni zübu kettsür, aser Ni anebtsür: aser kü ket nungi rakzüktsü shinga mali.

⁴⁰Kechiyong Ni anünglen kü ket mekanger aser azüngashia ashir,

⁴¹Kü sentsüprang nok ni aitsü, aser Kü keti ochi nung amettsü; kü temerir nem Ni mangyangba agütsütsü; aser Ni sempar dang merenshitsü.

⁴²Tetepsetba aser tepuoker zü agi, kü lijakjang azü agi mesepdaktsütsü, tsükchir tanishirtem ku talanglang aliba kolak nungi kü noki shi meyoktsü.

⁴³ “Kin rongnung pelatepa ayimtenang, Oh nenok, par nüburtem, kechiyong pa tenzükertem zü asoshi pai tayang kepzüktsü, aser par lima, par nübur asoshi pai temenen pungitsü’

⁴⁴Idangji Mosa aser pa den Nun jabaso Yihusua arua nüburtem ajaki angashia iba ken aten.

⁴⁵Kodang Israel dang jembiba item o ajak Mosai tembanga aru,

⁴⁶pai parnok dang ashi, “Tanü ni nenok dang tekümdangtsü ashiba iba ozüng o inyaka benshitsü nenok chirnur nem ozüng agütsütsü asoshi ya ajak nenok mulung nung yuang.

⁴⁷Kechiyong ya nenok asoshi amajok mapa masü; kechiaser ya nenok taküm lir, aser ya ajanga, nenoki Yordan ajanga oa agitsü aliba lima nung nenok arishi anogo talang alitsü.”

⁴⁸Aser KIBUBAi panüjisa Mosa dang ashi,

⁴⁹“Moab lima nung, Yeriko len shia aliba, iba Abarim tenem, Nebo tenemi na tuang; aser Kanan lima koba ni Israel chirtemi agitsü agütsü, aji reprangang:

⁵⁰aser nedi Aron, kechi koma Hor tenem nung asü, aser pa pei pur den densem, yamaji na atudak tenem nung asütsü aser ne pur den atentsü.

⁵¹Kechiaser Zin arem nung, Kadesh nung Meriba tzü nung, Israel chir rongnung nenoki ni anema tai mena; kechiaser Israel chir rongnung nenoki ni meshiteta mayu.

⁵²Ne jakdang alimaji nai angutsü akok, saka ni Israel chir nem agütsüba limai nabo maitsü.”